Esekiele 31:1-18
-
Ifyo Egupti umukedari uukalamba ukawa (1-18)
31 Mu mwaka walenga 11, pa bushiku bwa kubalilapo ubwa mweshi walenga butatu, na kabili Yehova anjebele ati:
2 “We mwana wa muntu, eba Farao imfumu ya ku Egupti na mabumba yakwe ayakalamba+ auti,‘Nani walingana nankwe ubukalamba?
3 Kwali umwina Asiria, umukedari wa ku Lebanone,Uwakwete imisambo iisuma, uwafumba kabili uwakwete icintelelwe icikalamba, uutali;Akantongolilo ka uko kafikile mu makumbi.
4 Amenshi e yalengele ukuti ukule sana, imilonga ya menshi yalengele ulepe sana.
Apo baulimbile pali utumilonga tweka tweka;Utu tumilonga twaletapilila ifimuti fyonse ifya mu mpanga.
5 E mulandu wine ici cimuti calepeele ukucila ifimuti fyonse mu mpanga.
Amampanda ya ciko yalifulile ne misambo ya ciko yalilepelePa mulandu wa kuti utumilonga twalikwete amenshi ayengi.
6 Ifyuni fya mu lwelele fyonse fyapangile ifinsa ku mampanda ya ciko,Inama sha mu mpanga shonse shalefyalila mwi samba lya misambo ya ciko,Kabili inko shonse ishakwata abantu abengi shaleikala mu cintelelwe ca ciko.
7 Imisambo ya ciko yaishileba iikalamba, iisuma kabili iitali,Pantu imishila ya ciko yaile panshi mu menshi ayengi.
8 Mwi bala lya kwa Lesa+ tamwali umukedari nangu umo uwalingene naco.
Takwali umukupri uwakwete amampanda nga ayo cakwete,Kabili takwali umuarmone nangu umo uwalingene naco imisambo.
Mwi bala lya kwa Lesa tamwali icimuti nangu cimo icalingene naco ubusuma.
9 Nalengele caba icisuma nga nshi, cafumba,Kabili ifimuti fyonse ifya mu Edeni, mwi bala lya kwa Lesa wa cine, fyalecifimbila.’
10 “E ico Shikulu Mulopwe Yehova atila: ‘Pa mulandu wa kuti calilepele* ica kuti na kantongolilo ka ciko kafikile mu makumbi, kabili pa mulandu wa kuti caishileba ne cilumba mu mutima wa ciko pa mulandu wa kuti calilepele,
11 nkacipeela kuli kateka wa nko uwa maka.+ Nangu cibe shani akacicita akantu, kabili nkacikaana pa mulandu ne fyabipa ifyo cicita.
12 Kabili abalebeshi abakalukisha pa nko shonse bakacitema, kabili bakacisha pa mpili, na mabula ya ciko yakaponena mu mipokapoka yonse, kabili imisambo ya ciko bakaiputaula mu tumilonga tonse utwa mu calo.+ Abantu ba mu nko sha pe sonde bonse bakafuma mu cintelelwe ca ciko kabili bakacisha.
13 Ifyuni fya mulwelele fyonse fikalaikala kuli ici cimuti ninshi caliwa, kabili inama sha mu mpanga shonse shikalaikala pa misambo ya ciko.+
14 Ico cikabela ifi ni pa kuti kwikaba icimuti nangu cimo pa fimuti ifyaba mupepi na menshi icikalepa sana nelyo icikafisha akantongolilo ka ciko mu makumbi. Na pa kuti kwikaba icimuti nangu cimo icitapililwa bwino icikalepa nge fi fimuti, pantu fyonse fikafwa, fikaya ku calo ca panshi pamo na bana ba bantu abaleya ku nindi.’*
15 “Shikulu Mulopwe Yehova atila: ‘Pa bushiku cikaya ku Nshiishi* nkalenga kukabe ukuloosha. E ico nkacilika utumilonga twa menshi, kabili nkalenga utumilonga twikalafumya amenshi pa kuti amenshi ayengi yakaleke ukufuma. Nkalenga Lebanone akafiite pa mulandu wa ici cimuti kabili ifimuti fya mu mapanga fyonse fikoma.
16 Ilyo icongo ca kuwa kwa ciko cikomfwika, nkalenga inko shikatente ilyo nkalenga cikaye ku Nshiishi* pamo na bonse abaleya ku nindi,* kabili ifimuti fyonse ifya mu Edeni,+ fyonse ifyawamisha ne fimuti ifisuma nga nshi pa fimuti fya mu Lebanone, fyonse ifyo batapilila bwino fikasansamushiwa mu calo ca panshi.
17 Nafiya ku Nshiishi* pamo nankwe, abo baipaila ku lupanga,+ pamo na balemutungilila* abaleikala mu cintelelwe cakwe mu nko.’+
18 “‘Cimuti nshi pa fimuti fya mu Edeni icalingene na iwe ubukata no bukulu?+ Lelo nangu cibe shani bakakwipaila pamo ne fimuti fya mu Edeni kabili mukaya ku calo ca panshi. Ukalaala pamo nabashasembululwa abo bakepaila ku lupanga. Ifi fikacitikila Farao na mabumba yakwe yonse ayakalamba,’ e fyo Shikulu Mulopwe Yehova alanda.”
Amafutunoti
^ Mu ciHebere, “iwe walilepele.”
^ Nelyo “ku nshiishi.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “inshiishi.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “ukuboko ukwalemutungilila.”
