Esekiele 32:1-32
32 Kabili mu mwaka walenga 12 pa bushiku bwa kubalilapo ubwa mweshi walenga 12, na kabili Yehova anjebele ati:
2 “We mwana wa muntu, imba ulwimbo lwa bulanda* pali Farao imfumu ya ku Egupti, kabili umwebe auti,‘Wali nge nkalamo iyana* iya maka iya nko,Nomba balilenga waba tondolo.
Wali nga shimweshimwe wa muli bemba+ uwaleifubaula mu mimana yobe,Walefundaula ameshi na makasa yobe kabili walekowesha imimana.’*
3 “Shikulu Mulopwe Yehova atila:
‘Nkabomfya ibumba lya nko ishingi pa kufungulwila isumbu lyandi pali iwe,Kabili bakakukulila mu mukwau wandi.
4 Nkakusha pa mulundu;Nkakupoosa mu mpanga umushaba nangu kamo.
Nkalenga ifyuni fya mu lwelele fyonse fikekale pali iwe,Kabili nkalenga inama sha mu mpanga isha mwi sonde lyonse shikakulye ica kuti shikekute no kwikuta.+
5 Nkapoosa umubili obe pa mpiliKabili nkesusha imipokapoka ne fipimfya fya citumbi cobe.+
6 Nkalenga umulopa obe uukalapongoloka ukabomfye icalo ukufika na ku mpili,Kabili nkalenga utumilonga tukesulemo umulopa obe.’*
7 “‘Kabili ilyo nkakushimya nkafimba imyulu kabili nkalenga intanda shikafiite.
Akasuba nkakafimba amakumbi,Kabili umweshi tawakabalike.+
8 Ifya mu muulu fyonse ifisanika nkalenga fikafiite,Kabili nkalenga mu calo cobe conse mukabe imfifi,’ e fyo Shikulu Mulopwe Yehova alanda.
9 “‘Nkalenga imitima ya bantu aba mu nko ishingi ikasakamane ilyo nkalenga abantu bobe bakabasende bunkole mu nko shimbi,Ku fyalo uko ushaishiba.+
10 Nkalenga abantu aba mu nko ishingi bakatiine,Kabili imfumu shabo shikaba no mwenso pa mulandu ne fikakucitikila ilyo nkasunsha ulupanga lwandi pa cinso ca shiko.
Shikalatutuma fye kabili imo na imo ikalatiina ukufwa,Pa bushiku ukonaulwa.’
11 Pantu Shikulu Mulopwe Yehova atila:
‘Ulupanga lwa mfumu ya ku Babiloni lukesa pali iwe.+
12 Nkalenga amabumba yobe ayakalamba yakafwe ku lupanga,Bonse abakalukisha pa nko.+
Bakapwisha icilumba ca kwa Egupti, kabili amabumba yakwe yonse ayakalamba bakayalofya.+
13 Nkalofya ifitekwa fyakwe fyonse ifyaba mupepi na menshi yakwe ayengi,+Kabili amakasa ya bantu na mabondo ya fitekwa tayakatwalilile ukufundaula amenshi.’+
14 ‘Pali ilya nshita nkalenga amenshi yabo yakalengame,Nkalenga imimana yabo ikalepita nga mafuta,’ e fyo Shikulu Mulopwe Yehova alanda.
15 ‘Ilyo nkalenga icalo ca Egupti cikabe icibolya, ilyo nkalenga fyonse ifyabamo fikonaulwe,+Ilyo nkepaya bonse abekalamo,Bakeshiba ukuti nine Yehova.+
16 Ulu, lwimbo lwa bulanda, kabili nangu cibe shani abantu bakalwimba;Abana banakashi ba mu nko bakalwimba.
Bakembila Egupti na mabumba yakwe ayakalamba,’ e fyo Shikulu Mulopwe Yehova alanda.”
17 Lyena mu mwaka walenga 12 pa bushiku bwalenga 15 ubwa uyu mweshi, Yehova anjebele ati:
18 “We mwana wa muntu, loosha pa mabumba ayakalamba aya kwa Egupti kabili umubweseshe ku calo ca panshi, ena na bana bwakwe abanakashi aba mu nko isha maka pamo na baleya ku nindi.*
19 “‘Nani uo wacila ukuyemba? Kabiye ku nshiishi kabili uye ulaale pamo na bashasembululwa!’
20 “‘Bakafwila pamo na bo bakepaila ku lupanga.+ Nabamwipaya ku lupanga; mukulileni pamo na mabumba yakwe yonse ayakalamba.
21 “‘Abaishibisha ukulwa bakalanda nankwe mu kati ka Nshiishi,* ena e lyo na balemwafwa. Nangu cibe shani bakaya ku nshiishi kabili bakalaala nga filya fine abashasembululwa abo baipaila ku lupanga balaala.
22 Asiria aba kulya pamo ne bumba lyakwe. Inshiishi shabo shalishinguluka imfumu shabo, bonse balipaiwa ku lupanga.+
23 Inshiishi shakwe shaba mu kati ka nindi,* kabili ibumba lyakwe lyonse lyashinguluka inshiishi yakwe, bonse balipaiwa ku lupanga pantu balilengele abantu ba mu calo ca ba mweo baba no mwenso.
24 “‘Elamu+ ali kulya pamo na mabumba yakwe yonse ayakalamba, kabili nayashinguluka inshiishi yakwe, bonse abo baipaya ku lupanga, abalelenga abantu ba mu calo ca ba mweo baba no mwenso nabaya ku calo ca panshi ukwabula ukusembululwa. Nomba bakaseebanina pamo na baleya ku nindi.*
25 Nabamupangila ubusanshi pa bo baipaya pamo na mabumba yakwe yonse ayakalamba ayashinguluka inshiishi shakwe. Bonse tabasembululwa, balibepaya ku lupanga pa mulandu wa kuti balengele abantu ba mu calo ca ba mweo baba no mwenso; kabili bakaseebanina pamo na baleya ku nindi.* Nabamubika pamo na bo baipaya.
26 “‘Kulya kwine e kwaba Mesheke na Tubali+ pamo na mabumba yabo yonse* ayakalamba. Inshiishi shabo shalimushinguluka. Bonse tabasembululwa, balibalasa no lupanga pa mulandu wa kuti balilengele abantu ba mu calo ca ba mweo baba no mwenso.
27 Bushe tabakalaale pamo na baume abashasembululwa abaishiba sana ukulwa, abafwa, abaya ku Nshiishi* pamo ne fyanso fya nkondo? Kabili bakababikila impanga shabo ku mitwe yabo,* bakabika ne membu shabo pa mafupa yabo pantu aba abaume aba maka abaishibe sana ukulwa balecusha abantu ba mu calo ca ba mweo.
28 Lelo iwe bakakushonawila pamo na bashasembululwa kabili mukalaala pamo na bo baipaila ku lupanga.
29 “‘Edomu+ aba kulya, imfumu shakwe, ne ntungulushi shakwe shonse abalaala pamo na bo baipaile ku lupanga; nangu ca kuti balikwete amaka na bo bene bakalaala pamo na bashasembululwa+ e lyo na baleya ku nindi.*
30 “‘Kulya e kwaba bacilolo* bonse aba ku kapinda ka ku kuso, pamo na bena Sidone bonse,+ abaya ku nshiishi ninshi baliseebana, pamo na bo baipaya nangu ca kuti baletiinya abantu pa mulandu na maka ayo bakwete. Bakalaala abashasembululwa pamo na bo baipaila ku lupanga kabili bakaseebanina pamo na baleya ku nindi.*
31 “‘Farao akamona fyonse ifi kabili akasansamuka pa fyacitikiile amabumba yakwe yonse ayakalamba;+ Farao na bashilika bakwe bonse bakabepaila ku lupanga,’ e fyo Shikulu Mulopwe Yehova alanda.
32 “‘Pa mulandu wa kuti Farao alilengele aba ku calo ca ba mweo baba no mwenso, ena pamo na mabumba yakwe yonse ayakalamba, bakalaala pamo na bashasembululwa, abo baipaila ku lupanga,’ e fyo Shikulu Mulopwe Yehova alanda.”
Amafutunoti
^ Mu ciHebere, “imimana yabo.”
^ Nelyo “inkalamo iyana iyakwata amasense.”
^ Nelyo “ulwimbo lwa kuloosha.”
^ Mu ciHebere, “nkalenga ukesule mu tumilonga.”
^ Nelyo “inshiishi.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “inshiishi.”
^ Nelyo “inshiishi.”
^ Nelyo “inshiishi.”
^ Mu ciHebere, “amabumba yakwe.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nalimo bashilika abaishibe sana ukulwa abo bashiikile pamo ne mpanga shabo pa kuti babacindike.
^ Nelyo “inshiishi.”
^ Nelyo “intungulushi.”
^ Nelyo “inshiishi.”
