Esekiele 8:1-18
8 Kabili mu mwaka walenga 6, pa bushiku bwalenga 5 ubwa mweshi uwalenga 6, ilyo naikele mu ng’anda yandi ninshi na bakalamba ba mu Yuda nabekala pa ntanshi yandi, ukuboko kwa kwa Shikulu Mulopwe Yehova kwalinjikete.
2 Ilyo naloleshe, namwene icali ngo muntu uwalemoneka ngo mulilo; ukutendekela mu musana ukuya kwi samba alemoneka ngo mulilo,+ e lyo ukutendekela mu musana ukuya ku muulu alebeeka kwati cela icabeeka icasakanamo silfere na golde.+
3 Lyena afungulwile icalemoneka ngo kuboko kabili anjimiishe ku mushishi wa ku mutwe wandi. Lyena mu cimonwa icafumine kuli Lesa, umupashi walinsendele pa kati ka calo no muulu wantwala na ku Yerusalemu pa mpongolo iyabelele ku kapinda ka ku kuso,+ apali akalubi ka kalumwa* akalenga Lesa aba na kalumwa.+
4 Kabili moneni! kulya e kwali ubukata bwa kwa Lesa wa kwa Israele,+ ubwalemoneka nga ubukata bulya namwene mu mpanga iyabatama.+
5 Lyena anjebele ati: “We mwana wa muntu, inwina amenso yobe ku kapinda ka ku kuso.” E ico nainwinine amenso yandi ku kapinda ka ku kuso, kabili lubali lwa ku kapinda ka ku kuso aka mpongolo ya ku ciipailo, apa kwingilila pali akalubi ka kalumwa.*
6 Kabili anjebele ati: “We mwana wa muntu, bushe wamona ifya bunani ifyabipa nga nshi, ifyo aba mu ng’anda ya kwa Israele balecita pano,+ ifilenga ndetaluka sana icifulo candi ica mushilo?+ Walamona ifya bunani na fimbi ifyabipa ukucila pali ifi.”
7 Lyena antwele apa kwingilila mu lubansa, kabili ilyo naloleshe, namwene icipunda mu cibumba.
8 E lyo anjeba ati: “We mwana wa muntu, tula icipunda icikalamba mu cibumba.” E ico nalitulile icipunda icikalamba mu cibumba, kabili namwene apa kwingilila.
9 Kabili anjebele ati: “Ingila mu kati no kumona ifyabipa kabili ifya bunani ifyo balecita pano.”
10 E ico nalingiile kabili ilyo naloleshe, namwene ifipashanya fya fikulika ifya misango yonse, ne finama fya bunani+ e lyo no tulubi twa bunani tonse* utwa mu ng’anda ya kwa Israele,+ ifyo balenga ukushinguluka icibumba conse.
11 Kabili kwali abakalamba 70 aba mu ng’anda ya kwa Israele abaiminine pa ntanshi ya fiko. Pali aba pali na Yaasania umwana wa kwa Shafani.+ Cila muntu alikete ica kufutumwinako ububani, kabili icushi ca bubani calefutumuka ukuya mu muulu.+
12 Lyena anjebele ati: “We mwana wa muntu, bushe naumona ifyo abakalamba ba mu ng’anda ya kwa Israele balecita mu mfifi, ilyo cila muntu ali mu muputule wakwe uwa mu kati umwaba ifilubi fyakwe? Pantu baletila, ‘Yehova tatumona. Yehova alisha icalo.’”+
13 Kabili anjebele ati: “Walamona ifya bunani na fimbi ifyo balecita ifyabipa ukucila na pali ifi.”
14 E ico antwele apa kwingilila pa mpongolo ya ku kapinda ka ku kuso iya ng’anda ya kwa Yehova, kabili kulya e ko namwene abanakashi nabekala kabili baleloosha lesa Tamusi.
15 Anjebele no kuti: “Bushe wamona ifi we mwana wa muntu? Walamona ifya bunani na fimbi ifyabipa ukucila na pali ifi.”+
16 E ico antwele mu lubansa lwa mu kati ulwa ng’anda ya kwa Yehova,+ pa mwinshi we tempele lya kwa Yehova. Pa kati ka muputule wa kwingililapo ne ciipailo, pali abaume nalimo 25 abafutatiile itempele lya kwa Yehova kabili baloseshe ifinso fyabo ku kabanga; balefukamina akasuba ku kabanga balefisha ne mpumi panshi.+
17 Anjebele ati: “Bushe wamona ifi we mwana wa muntu? Bushe mulandu uunono ifi aba mu ng’anda ya kwa Yuda balecita ifya bunani pano, ifi balelenga mu calo mwaba sana ulukakaala+ ne fi balenkalifya? Nomba balesunkila umusambo* ku myona yandi.
18 E ico nkakalipa nga nshi. Nshakabomfwile uluse;* kabili nshakabalangulukileko.+ Nangu bakalile ne shiwi ilikalamba mu matwi yandi, nshakabomfwe.”+
Amafutunoti
^ Nelyo “icimpashanya ca kalumwa.”
^ Nelyo “icimpashanya ca kalumwa.”
^ Ishiwi lya ciHebere ilyo bapilibula ukuti ubunani, lyalipalana ne shiwi lya ciHebere ilipilibula ukuti ubusali, kabili balibomfya nga balelanda pa fya muselu.
^ Nalimo uyu umusambo e o balebomfya mu kupepa utulubi.
^ Mu ciHebere, “amenso yandi tayakabomfwile uluse.”
