Estere 2:1-23
2 Pa numa ya ifi fintu, ilyo ubukali bwa Mfumu Ahasuerusi+ bwacepeleko, yaibukishe ifyo Bashti acitile+ ne fyo bamupingwile.+
2 Lyena abalebombela imfumu batile: “Lekeni bafwaile imfumu abakashana banacisungu abasuma.
3 Kabili imfumu isonte abantu mu fitungu fyonse ifyo iteka,+ nabo bayefwaya banacisungu abasuma no kubaleta kwi sano mu Shushani,* mu ng’anda ya banakashi.* Lekeni Hegee+ mutungwi wa mfumu uusunga abanakashi, akalebasakamana, kabili bakalebayemfya.*
4 Kabili umukashana uo imfumu ikatemwisha e ukapyana Bashti+ pali bunamfumu.” Imfumu yalitemenwe ifyo balandile, kabili ifi fine e fyo yacitile.
5 Kwali umwaume umuYuda uwalebombela kwi sano mu Shushani,*+ ishina lyakwe ali ni Mordekai+ umwana wa kwa Yairi umwana wa kwa Shimei umwana wa kwa Kishi, umwina Benjamini.+
6 Kishi ali pa bo Nebukadnesari imfumu ya Babiloni yasendele mu kuyaba bankole ukufuma ku Yerusalemu pamo na Yekonia*+ imfumu ya baYuda.
7 Mordekai e wakushishe Hadasa, uo baleita no kuti Estere, umwana mwanakashi wa kwa munyina+ wa kwa wishi Mordekai, pantu takwete wishi na nyina. Estere ali mwanakashi uwayemba kabili alemoneka bwino. Ilyo bawishi na banyina bafwile, Mordekai alimusendele kabili alemusunga fye ngo mwana wakwe.
8 Ilyo abantu baumfwile ifyo imfumu yalandile ne funde ilyo yapangile, kabili ilyo abakashana abengi babalonganike kwi sano mu Shushani* pa kuti Hegee+ alebasakamana, Estere na o balimutwele ku ng’anda ya mfumu.*
9 Hegee alitemenwe Estere kabili ali ne cikuuku* kuli ena. E ico bwangu bwangu alisalile abakulamuyemfya*+ no kulamupeela ifya kulya ifisuma, kabili alimupeele abakashana 7 abalebombela mu ng’anda ya mfumu pa kuti balemusakamana, kabili amukuushiishe ku ncende iisuma sana mu ng’anda ya banakashi* pamo na bakashana abalemusakamana.
10 Estere talelandapo pa bantu bakwe nelyo pali balupwa lwakwe,+ pantu Mordekai+ alimukonkomeshe ukuti talingile ukwebako nangu umo.+
11 Cila bushiku Mordekai alepita mupepi no lubansa lwa ng’anda umo abanakashi baleikala* pa kuti eshibe ifyo Estere ali ne fyo balemusunga.
12 Imyeshi 12 iyo baleyemfeshamo abakashana nga yapwa, cila mukashana aleya ku Mfumu Ahasuerusi. Pa kubayemfya* balebasuba amafuta ya muri*+ pa myeshi 6, e lyo pa myeshi imbi 6 balebasuba amafuta ya balsamu+ ne fintu fimbi ifyo balebomfya pa kubayemfya.*
13 Lyena umukashana aleya ku mfumu, kabili conse ico alelomba ilyo ashilaya ku ng’anda ya mfumu ukufuma ku ng’anda ya banakashi,* balemupeela.
14 Umukashana aleya ku mfumu icungulo, e lyo ulucelo abwelela ku ng’anda ya bubili ukwaleikala abakashi banono aba mfumu* abo Shaashgasi mutungwi+ wa mfumu alesakamana. Taali na kuya ku mfumu na kabili, kano fye nga ca kuti imfumu naimutemwa kabili pa kumwita yalumbula ishina lyakwe.+
15 Inshita ya kuti Estere aye ku mfumu yalifikile. Estere umwana wa kwa Abihaili munyina wa kwa wishi Mordekai, uo alesunga fye ngo mwana wakwe,+ talombele fimbi pa kuya ku mfumu ukucila pa fyo Hegee mutungwi wa mfumu uwalesunga abanakashi amwebele. (Abantu bonse abalemona Estere balemutemwa.)
16 Estere bamutwele ku Mfumu Ahasuerusi kwi sano mu mweshi walenga 10, e kutila umweshi wa Tebete,* mu mwaka walenga 7+ ukufuma apo yatendekeele ukuteka.
17 Imfumu yalitemenwe Estere ukucila abanakashi bambi, kabili yali ne cikuuku* kuli ena ukucila ifyo yali ne cikuuku kuli banacisungu bambi. E ico yalimufwikile ica kufwala ca ku mutwe ica bunamfumu,* kabili yamubikile pali bunamfumu+ pa kuti apyane Bashti.+
18 Pa kucindika Estere, imfumu yapangiile bacilolo na babomfi ba iko bonse umutebeto uukalamba. Kabili imfumu yabilishe ukuti abantu bonse mu fitungu ifyo yaleteka balubuke, kabili yalitwalilile ukupeela abantu ifintu pantu yalikwete sana icuma.
19 Nomba ilyo balonganike banacisungu*+ pa muku walenga bubili, Mordekai aikele pa mpongolo ye sano lya mfumu.
20 Estere talelandapo pali balupwa lwakwe nelyo pa bantu bakwe,+ nga filya fine Mordekai amwebele, kabili Estere alitwalilile ukumfwila Mordekai nga filya fine alemumfwila ilyo alemusunga.+
21 Ilyo Mordekai aleikala pa mpongolo ye sano lya mfumu, ababomfi babili aba kwi sano, e kutila Bigtani na Tereshe, abalelonda pa fiibi, balikalipe kabili balepanga ukwipaya Imfumu Ahasuerusi.
22 Lelo Mordekai alishibe ifyo balepanga ukucita, kabili ilyo line alyebeleko Namfumu Estere. Lyena Estere alyebele imfumu ifyo Mordekai amwebele.*
23 E ico balifwailishe ili lyashi kabili basangile ukuti lya cine, lyena aba baume balibakulike pa fimuti; kabili ifyacitike balifilembele mwi buuku lya malyashi ya kale ninshi ne mfumu+ ilemonako.
Amafutunoti
^ Nelyo “Susa.”
^ Nelyo “umwaleikala abanakashi pamo nga bakashi ba mfumu nelyo abakashi banono aba mfumu.”
^ Nelyo “balebacina.”
^ Nelyo “Susa.”
^ E o beta no kuti Yehoyakini pali 2 Ishamfumu 24:8.
^ Nelyo “Susa.”
^ Nelyo “isano.”
^ Nelyo “ukutemwa ukushipwa.”
^ Nelyo “abakumucina.”
^ Nelyo “umwaleikala abanakashi pamo nga bakashi ba mfumu nelyo abakashi banono aba mfumu.”
^ Nelyo “umwaleikala abanakashi pamo nga bakashi ba mfumu nelyo abakashi banono aba mfumu.”
^ Nelyo “ukubacina.”
^ Nelyo “ukubacina.”
^ Nelyo “ing’anda umwaleikala abanakashi pamo nga bakashi ba mfumu nelyo abakashi banono aba mfumu.”
^ Nelyo “ing’anda yalenga bubili umwaleikala abanakashi pamo nga bakashi ba mfumu nelyo abakashi banono aba mfumu.”
^ Moneni Ifyebo Fyalundwako pa B15.
^ Nelyo “ukutemwa ukushipwa.”
^ Nelyo “icifimbo ca bunamfumu.”
^ Nelyo “abakashana.”
^ Nelyo “alilandiileko Mordekai.”
