Kuli Filemone 1:1-25
1 Ine ne Paulo, ne mufungwa+ pa mulandu wa kwa Kristu Yesu, ndi na munyinane Timote,+ kabili twalembela iwe Filemone, umutemwikwa wesu kabili umubomfi munensu,
2 e lyo na Afia, nkashi yesu, na Arkipi,+ umushilika munensu, ne cilonganino icaba mu ng’anda+ yobe:
3 Icikuuku ca kwa Lesa no mutende ukufuma kuli Shifwe na Shikulu Yesu Kristu fibe na imwe.
4 Lyonse ndatootela Lesa wandi nga nakulumbula mu mapepo,+
5 pantu ndomfwa ifyo watetekela ne fyo watemwa Shikulu Yesu na ba mushilo bonse.
6 Ndapepa ukuti icitetekelo ico iwe na bambi mwakwata, cilelenga uleishiba ifisuma fyonse ifyo twapokelela kuli Kristu.
7 Pantu nalisekelele no kusansamuka nga nshi ilyo naumfwile ifyo watemwa aba bwananyina, apo walisansamusha* aba mushilo.
8 E mulandu wine nangu ca kuti nalikwata amaka ya kukweba mwi shina lya kwa Kristu ico ulingile ukucita,
9 ndekupaapaata pa mulandu wa kuti waliba no kutemwa, pantu walishiba ukuti ine, ne Paulo, ne mukalamba, ndi mufungwa pali ino nshita pa mulandu wa kwa Kristu Yesu.
10 Ndepaapaatilako Onesimu,+ umwana wandi mu fya kwa Lesa, uo nafyele+ ilyo bankakile mu cifungo.
11 Kale takukwatiile incito, lelo pali ino nshita nakukwatila incito kabili na ine wine nankwatila incito.
12 E ico ndemubwesesha kuli iwe, nalimutemwa sana.
13 Kuti natemwa naba nankwe kuno pa kuti alencitilako fimo ilyo ndi mu cifungo pa mulandu wa mbila nsuma,+ pantu iwe tauli kuno.
14 Lelo nshilefwaya ukucita nangu cimo ukwabula ukuti usuminishe, pa kuti wicita icisuma pa mulandu wa kukupatikisha fye, lelo ucite mu kuitemenwa.+
15 Nalimo e mulandu wine afumiine kuli iwe pa nshita iinono,* pa kuti akabwelelele kuli iwe,
16 ukuti ekaba fye na kabili umusha,+ lelo akacile na pa kuba umusha, akabe uwa bwananyina uwatemwikwa,+ uo natemwa sana, lelo uo wingatemwa ukucilanapo, apo musha obe kabili ni munonko muli Shikulu.
17 E ico nga ca kutila umona ukuti nine cibusa obe, umupokelele bwino nge fyo wingampokelela.
18 Kabili nga alikubifishe nelyo nga alikukwatila inkongole, nine nkesalipililamo.
19 Ine ne Paulo ndelemba ku minwe yandi nati: Nkakubwesesha. E lyo ibukisha ukuti na iwe wine walinkwatila inkongole.
20 We munyinane, ndekulomba ukuti ungafwe apo bonse tukonka Shikulu; nsansamusha* apo bonse tukonka Kristu.
21 Icalenga nkulembele ni co nalicetekela ukuti uli wa cumfwila, kabili ninjishiba ukuti ukacita ukucila na pa fyo nalanda.
22 Ndelomba no kuti umpekanishishe umwakwikala, pantu ndesubila ukuti amapepo mupepa yakalenga nkese kuli imwe*+ na kabili.
23 Epafra+ umufungwa munandi pa mulandu wa kwa Kristu Yesu, amuposha.
24 Marko, Aristaaki,+ Dema+ na Luka,+ ababomfi banandi nabo bamuposha.
25 Icikuuku ca kwa Shikulu Yesu Kristu cibe na imwe bonse pa mulandu wa mibele yenu.
Amafutunoti
^ Nelyo “walisansamusha imitima ya.”
^ Mu ciGriki, “pe awala limo.”
^ Nelyo “sansamusha umutima wandi.”
^ Nelyo “nkalubuke pa kuti nkese kuli imwe.”
