Impendwa 14:1-45
14 Lyena aba mu lukuta bonse basanswile amashiwi, kabili batwalilile ukulila no kuloosha ubushiku bonse bulya.+
2 Abena Israele bonse batendeke ukuilishanya pali Mose na Aarone,+ kabili ulukuta lonse lwabebele aluti: “Kanshi nga twafwilile fye mu calo ca Egupti, nangu kanshi nga twafwilile fye muli aya yene amatololo!
3 Mulandu nshi Yehova atuleteele muli cino calo? Bakatwipaya no lupanga.+ Abakashi besu na bana besu bakabekata no kubasenda. Bushe te kuti ciwame tubwelelemo+ fye ku Egupti?”+
4 Bafikile fye na mu kulanda abati: “Natuisalile intungulushi, tubwelele ku Egupti!”+
5 E lyo Mose na Aarone bawile ubukupeme pa cinso ca lukuta lonse ulwa bena Israele abalongene.
6 Yoshua+ mwana Nuni na Kalebu+ mwana Yefune, abali pa balengwile cilya calo, balepwile ifya kufwala fyabo,
7 kabili baebele ulukuta lonse ulwa bena Israele abati: “Icalo ico twailelengula, cisuma nga nshi.+
8 Yehova nga atemwa, nangu cibe shani akatwingisha muli ici calo kabili akatupeela cikaba cesu, icalo umwaba umukaka no buci.+
9 Nomba tamufwile ukupondokela Yehova; kabili tamufwile ukutiina abantu ba muli cilya calo,+ pantu tukabacimfya fye bwangu bwangu.* Tabakwete uwa kubacingilila, lelo Yehova ali na ifwe.+ Mwibatiina.”
10 Lelo ulukuta lonse lwalefwaya ukubapoola amabwe.+ Nomba abena Israele bonse bamwene ubukata bwa kwa Yehova pe tenti lya kukumaninamo na Lesa.+
11 Lyena Yehova aebele Mose ati: “Aba bantu nalibacitila ifishibilo ifingi. Ni lilali bakaleka ukunsaalula?+ Ni lilali bakatampa ukuntetekela?+
12 Leka mbatumine icikuko kabili mbalofye, e lyo iwe nkulenge ube uluko ulukalamba kabili ulwa maka ukubacila.”+
13 Lelo Mose aebele Yehova ati: “Nga mwacita ifi, aba mu Egupti umo mwafumishe abantu benu ku maka yenu bakomfwa,+
14 kabili bakebako abekala muli ici calo. Aba bantu nabo balyumfwa ukuti imwe mwe Yehova mwaba na bantu benu,+ kabili mwalimonana nabo icinso ne cinso.+ Nimwe Yehova, ne kumbi lyenu liminina pali bena, kabili nimwe mubatangilila mu ntumba ye kumbi akasuba na mu ntumba ya mulilo ubushiku.+
15 Nga mwaipaya aba bantu bonse pa muku umo, inko ishaumfwa ululumbi lwenu shikatila:
16 ‘Yehova alifililwe ukwingisha aba bantu mu calo ico alapile ukuti ali no kubapeela, e co abepaile mu matololo.’+
17 E ico nomba mwe Yehova, lekeni amaka yenu yamoneke, ukulingana ne fyo mwalaile amuti:
18 ‘Yehova, uukokola ukukalipa kabili uwaba sana no kutemwa ukushipwa,*+ uwelela abantu pa filubo fyabo na pali bumpulamafunde bwabo, lelo uushakafilwe ukukanda abafwile ukukandwa, uukandila abana, abeshikulu ne fishikulula pa membu sha bashibo.’+
19 Shi eleleni aba bantu pa filubo fyabo ukulingana no kutemwa kwenu ukushipwa, nga filya fine fye mubeleela ukutula fye ilyo bafumine mu Egupti ukushinta na lelo.”+
20 Lyena Yehova atile: “Nabelela ukulingana ne fyo walanda.+
21 Nomba ndeti, na pali ne mwine, mwi sonde lyonse mukaba ubukata bwa kwa Yehova.+
22 Lelo abantu bonse abamona ubukata bwandi kabili abamwene ne fishibilo+ ifyo nacitile mu Egupti na mu matololo nomba abatwalilila fye ukunjesha+ iyi miku 10 kabili abashing’umfwila+
23 bena tabakatale abamona icalo ico nalapile ukuti nkapeela bashibo. Bonse fye abashincindika tabakacimone.+
24 Lelo umubomfi wandi Kalebu,+ apo ena alipusanako kabili alitwalilila ukung’umfwila no mutima wakwe onse, nkamwingisha mu calo ico ailelengula, kabili abana bakwe bakekalamo.+
25 Apo pali ino nshita abena Amaleke na bena Kanaani+ e bekala mu mupokapoka,* mufwile ukubweluluka mailo, mukalole ku matololo, mukapite mu nshila yaya kuli Bemba Wakashika.”+
26 Lyena Yehova aebele Mose na Aarone ati:
27 “Ni lilali ulu ulukuta ulubi lukaleka ukuilishanya pali ine?+ Ning’umfwa ifyo abena Israele baleilishanya pali ine.+
28 Bebe auti, ‘Yehova atila, “Na pali ne mwine, ifyo mulandile e fyo nkamucita!+
29 Muli aya matololo e mo ifitumbi fyenu fikalambalala,+ bonse abo mwalembele, ukutula pa wa myaka 20 ukuya pa muulu, bonse mwe bailishanya pali ine.+
30 Imwe bonse tamwakengile mu calo ico nalapile* ukuti mukekalamo,+ kano fye Kalebu umwana wa kwa Yefune na Yoshua umwana wa kwa Nuni e bakengilamo.+
31 “‘“Kabili abana benu abo mwatile bakabekata no kubasenda,+ nkabengisha mu calo kabili bakeshiba icalo ico mwakaana.+
32 Lelo ifitumbi fyenu fikalambalala muli aya amatololo.
33 Nomba abana benu bakaba bakacema mu matololo pa myaka 40,+ kabili bakakandilwa pa membu shenu,* mpaka imwe bonse mukafwile mu matololo.+
34 Ukulingana ne mpendwa ya nshiku mwalengwile icalo, inshiku 40,+ e fikaba inshiku mukakandilwa pa membu shenu, ubushiku bumo bukaba umwaka umo, ubushiku bumo umwaka umo, mpaka imyaka 40+ ikapwe, pa kuti mukeshibe ififuma mu kukanang’umfwila.*
35 “‘“Ine ne Yehova, ninanda. Ifi e fyo nkacita aba muli ulu lukuta lonse ulubi, bonse abalongana pa kuti bandwishe: Muli aya amatololo e mo bakafwila kabili e mo bakalobela.+
36 Abaume abo Mose atumine ukuyalengula icalo kabili abalengele ulukuta lonse luilishanye pali ena ilyo babwelele pa mulandu wa kuti baletele ilyashi ilibi pali cilya calo,+
37 abo abaume Yehova akabakanda kabili akabepaya.+
38 Lelo Yoshua mwana Nuni na Kalebu mwana Yefune, abali pa baume abailelengula cilya calo, bena tabakafwe.”’”+
39 Ilyo Mose aebele abena Israele bonse aya amashiwi, abantu batendeke ukuloosha nga nshi.
40 Kabili bacelele ukuya pa muulu wa lupili, kabili baleti: “Natubembuka. Lelo natuipekanya ukuya ku cifulo ico Yehova atulaile.”+
41 Lelo Mose abebele ati: “Cinshi ico mulepulila mwi funde lya kwa Yehova? Ifyo mulefwaya ukucita tafyabombe.
42 Mwiyako, pantu Yehova tali na imwe; abalwani benu baleyamucimfya.+
43 Abena Amaleke na bena Kanaani nga bayalwa na imwe,+ baleyamwipaila ku lupanga. Apo tamwaumfwilile Yehova, Yehova tabe na imwe.”+
44 Lelo bena bapamine fye ukuya pa muulu wa lupili.+ Nomba icipao ca cipangano ica kwa Yehova tacafumine pa kati ka nkambi+ kabili Mose na o wine tafuminepo.
45 Lyena abena Amaleke na bena Kanaani abaleikala muli lulya lupili balitentemwike, batampa no kubakomaula kabili balibafulumwine mpaka bayabafisha ku Horma.+
Amafutunoti
^ Mu ciHebere, “pantu bali fye nge ca kulya kuli ifwe.”
^ Nelyo “icikuuku.”
^ Nelyo “mu mpanga iyabatama.”
^ Mu ciHebere, “Ico naimiishepo ukuboko.”
^ Mu ciHebere, “pa bulalelale bwenu.”
^ Nelyo “ifyo ciba nga mwaba abalwani bandi.”
