Impendwa 15:1-41
-
Amafunde ya pa mituulo (1-21)
-
Abena Israele na balebeshi balingile ukulakonka amafunde yamo yene (15, 16)
-
-
Imituulo ya pa membu isha mu kukanaishiba (22-29)
-
Ifya kukanda uwabembukila ku mufulo (30, 31)
-
Uwapulile mwi funde lye Sabata bamwipaya (32-36)
-
Ukubika insenkebele ku fisempe fya fya kufwala (37-41)
15 Yehova aebele Mose no kuti:
2 “Eba abena Israele auti, ‘Ilyo mukafika mu calo ico nkamupeela, ico mukalaikalamo+
3 kabili nga mwatuulila Yehova umutuulo wa koca, pa ng’ombe shenu nangu pa mbushi shenu, nangu pa mpaanga shenu, nampo nga mutuulo wa koca+ nelyo lilambo lya kulapilapo umulapo waibela nangu mutuulo wa kuitemenwa fye+ nelyo uwa pa nshita ya mitebeto yenu,+ pa kuti uletele Yehova akacena akasuma,*+
4 uwaleta umutuulo wakwe kuli Yehova afwile no kuleta oma imo* iya mutuulo wa ngano uwa buunga bwapeleka,+ ubo basaakanya na makapu* yatatu aya mafuta.
5 Mulingile ukuleta no mutuulo wa mwangashi, amakapu yatatu aya hini, pamo no mutuulo wa koca+ nelyo ilambo lya kana ka mpaanga kamo akalume.
6 Nga lilambo lya mpaanga iilume, mufwile ukuleta umutuulo wa ngano uwa buunga ubwapeleka, indupe shibili, ubo basaakanya na mafuta ayengengila mu makapu ya hini 4.
7 Kabili mufwile ukuleta umwangashi amakapu ya hini 4 pa kuti yakabe umutuulo wa mwangashi, uwa kuletela Yehova akacena akasuma.*
8 “‘Lelo nga mulefwaya ukutuula ing’ombe iilume pa kuti ibe umutuulo wa koca+ nelyo ilambo lya kulapilapo umulapo waibela+ nangu ukutuulila Yehova amalambo ya mutende,+
9 mulingile ukutuula ing’ombe iilume pamo no mutuulo wa ngano uwa buunga ubwapeleka,+ indupe shitatu, ubo basaakanya na mafuta ayengengila mu makapu ya hini 6.
10 Kabili mulingile ukutuula umutuulo wa mwangashi,+ amakapu ya hini 6, pa kuti ukabe umutuulo wa pa mulilo, uwa kuletela Yehova akacena akasuma.*
11 Ifi e fyo mufwile ukulacita pa kutuula ing’ombe iilume imo na imo nelyo impaanga iilume imo na imo nangu akana ka mpaanga kamo na kamo akalume nelyo imbushi.
12 Ifi fine e fyo mulingile ukulacita pa kutuula inama imo na imo, nangu shifule shani.
13 Ifi e fyo umwina Israele onse akalecita pa kutuula umutuulo wa pa mulilo, uwa kuletela Yehova akacena akasuma.*
14 “‘Lelo nga ca kuti umulebeshi nelyo onse uo mwaikala nankwe mu nkulo shenu, alefwaya ukutuula umutuulo wa pa mulilo, uwa kuletela Yehova akacena akasuma,* afwile ukucita filya fine imwe mucita.+
15 Imwe mwe ba mu lukuta pamo na balebeshi abo mwikala nabo, mukalekonka ifunde limo line. Mufwile ukulalikonka mu nkulo shenu shonse. Ifyo Yehova amumona e fyo amona no mulebeshi wine.+
16 Imwe na balebeshi abo mwikala nabo mulingile ukulakonka fye ifunde limo line no bupingushi bumo bwine.’”
17 Kabili Yehova aebele Mose ati:
18 “Eba abena Israele auti, ‘Ilyo mukafika mu calo ico ndemutwalako
19 kabili mwalya ifya muli cilya calo,+ mulingile ukupeela Yehova umusangulo.
20 Mufwile ukulasangula imikate iyo bapangila no buunga bwa nsembe ubwa fisabo fyabalilapo ukupya.+ Mukalesangula iyi mikate filya musangula imisangulo iya palya mupumina ingano.
21 Mu nkulo shenu shonse, mukalesangwilapo Yehova ubuunga bwa nsembe ubwa fisabo fyabalilapo ukupya.
22 “‘Nomba nga mwalufyanya kabili mwafilwa ukukonka amafunde yonse ayo Yehova aeba Mose,
23 yonse ayo Yehova amweba ukupitila muli Mose ukutula pa bushiku Yehova amupeele amafunde ukufika na mu nkulo shenu shonse,
24 kabili nga ca kuti ulukuta lwalufyanya mu kukanaishiba e lyo pa numa lwaishiba, ninshi lufwile ukutuula umutuulo wa koca uwa ng’ombe iilume iyana, uwa kuletela Yehova akacena akasuma,* pamo no mutuulo wa ngano e lyo no mutuulo wa mwangashi ukulingana ne fyo lucita lyonse,+ e lyo na akana ka mbushi kamo pa kuti kabe umutuulo wa pa lubembu.+
25 Shimapepo akafutileko ulukuta lonse ulwa bena Israele, e lyo bakelelwa,+ pantu balufyenye mu kukanaishiba, kabili pa fyo balufyenye balileteele Yehova umutuulo wa koca no mutuulo wa pa lubembu pa cinso ca kwa Yehova.
26 Aba mu lukuta lonse ulwa bena Israele na balebeshi abo bekala nabo bakelelwa, pantu abantu bonse balufyenye fye mu kukanaishiba.
27 “‘Umuntu* nga abembuka mu kukanaishiba, alingile ukuleta imbushi iikota iya mwaka umo pa kuti ibe umutuulo wa pa lubembu.+
28 Kabili shimapepo akafutileko umuntu* uwacitile ulubembu mu kukanaishiba pa cinso ca kwa Yehova, kabili akelelwa pa lubembu acitile.+
29 Nampo nga uwalufyanya mu kukanaishiba mwina Israele nelyo mulebeshi uo mwikala nankwe, bonse mulingile ukulakonka ifunde limo line.+
30 “‘Lelo umuntu* uwalufyanya ku mufulo fye,+ nampo nga mwina Israele nelyo mulebeshi, ninshi napontela Yehova, kabili afwile ukwipaiwa.
31 Apo nasuula amashiwi ya kwa Yehova kabili takonkele amafunde yakwe, uyo muntu* afwile fye ukwipaiwa.+ Akafwila pa lubembu lwakwe.’”+
32 Nomba ilyo abena Israele bali mu matololo, basangile umwaume umo aleteeba inkuni pa bushiku bwe Sabata.+
33 Abamusangile aleteeba inkuni bamutwele kuli Mose na Aarone na ku lukuta lonse.
34 Balimulindike,+ pantu tabaishibe bwino bwino ifyo balingile ukumucita.
35 Lyena Yehova aebele Mose ati: “Uyo muntu afwile ukwipaiwa,+ ulukuta lonse lufwile ukumupoola amabwe kunse ya nkambi.”+
36 E ico ulukuta lonse lwamufumiishe kunse ya nkambi kabili lwalimupoolele amabwe ica kuti alifwile, nga filya fine Yehova aebele Mose.
37 Kabili Yehova aebele Mose ati:
38 “Eba abena Israele auti mu nkulo shabo shonse, bakalepangila insenkebele ku fisempe fya fya kufwala fyabo, kabili pa muulu wa nsenkebele bakalebikapo umwando wa bluu.+
39 ‘Mufwile ukulapangilako insenkebele, pa kutila nga mwashimona mukaleibukisha amafunde yonse aya kwa Yehova kabili mukaleyakonka.+ Tamulingile ukulakonkelela imitima yenu na menso yenu, ifilelenga mwilaba aba cishinka kuli ine.*+
40 Ili ifunde lyakulamwibukishako amafunde yandi yonse kabili muleyakonka pa kuti Lesa wenu alemumona ukuti muli ba mushilo.+
41 Nine Yehova Lesa wenu, uwamufumishe mu calo ca Egupti pa kuti imulange ukuti nine Lesa wenu.+ Nine Yehova Lesa wenu.’”+
Amafutunoti
^ Nelyo “aka kutalalika umutima.”
^ Muli oma imo mwaleingila ifingengila mu cipe ica malita ukucilako panono pali yabili. Moneni Ifyebo Fyalundwako pa B14.
^ Amakapu 12 e yaleingila muli hini imo. Moneni Ifyebo Fyalundwako pa B14.
^ Nelyo “aka kutalalika umutima.”
^ Nelyo “aka kutalalika umutima.”
^ Nelyo “aka kutalalika umutima.”
^ Nelyo “aka kutalalika umutima.”
^ Nelyo “aka kutalalika umutima.”
^ Nelyo “umweo nga wabembuka.”
^ Nelyo “umweo.”
^ Nelyo “umweo.”
^ Nelyo “umweo ufwile.”
^ Nelyo “mulecita ubucende na balesa bambi.”