Impendwa 16:1-50
16 Lyena Kora+ mwana Isari,+ mwana Kohati,+ mwana Lebi,+ alimine pamo na Datani na Abiramu, abana baume ba kwa Eliabu,+ na One mwana Pelete, abatuntwike muli Rubene.+
2 Bena pamo na baume abena Israele 250 baimiine Mose. Aba baume bali ni ntungulushi sha lukuta, abo basalile mu lukuta, abaume ba lulumbi.
3 E ico balonganiine+ Mose na Aarone kabili babebele abati: “Mwacilamo! Abantu bonse muli ulu lukuta ba mushilo+ kabili Yehova ali nabo.+ Inga cinshi muitutumwina pa lukuta lwa kwa Yehova?”
4 Ilyo Mose aumfwile ifi, ilyo line awile ubukupeme.
5 Lyena aebele Kora na bali ku lubali lwakwe ati: “Mailo ulucelo Yehova akalenga tukeshibe umuntu wakwe+ kabili uwa mushilo, uufwile ukupalama kuli ena,+ kabili uo akasala+ e ukapalama kuli ena.
6 Iwe Kora na bali ku lubali lobe+ citeni ifi: Buuleni ifya kubikamo umulilo,+
7 kabili mailo mukabikemo umulilo no bubani, lyena mukafilete pa cinso ca kwa Yehova, kabili umuntu uo Yehova akasala,+ ninshi e wa mushilo. Imwe ba mwana Lebi+ mwacilamo!”
8 Lyena Mose aebele Kora ati: “Umfweni, mwe bana ba kwa Lebi.
9 Bushe mulemona ukuti ifi Lesa wa kwa Israele amusala mu lukuta lwa kwa Israele+ pa kuti mulepalama kuli ena ku kubomba umulimo wa pe tenti lya mushilo ilya kwa Yehova, kabili muleiminina pa ntanshi ya lukuta ku kulubombela,+
10 ne fi apalamike iwe kuli ena pamo na bamunonko, abana baume ba kwa Lebi finono? Bushe mulefwailapo na bushimapepo mwa?+
11 Ifi mulecita, iwe na bali ku lubali lobe abalongene pamo mulelwisha Yehova. E lyo nga ni Aarone, cinshi acitile pa kuti muleilishanya pali ena?”+
12 Pa numa, Mose atumine aba kuyaita Datani na Abiramu+ abana baume ba kwa Eliabu, lelo batile: “Tatwaiseko!
13 Bushe ulemona ukuti mulandu uunono ifi watufumya mu calo umwaba umukaka no buci pa kuti twise tufwile mu matololo?+ Bushe nomba ulefwaya ube ne mfumu pali ifwe pa kuti uletutitikisha?
14 Na kuba tawatwingisha na mu calo umwaba umukaka no buci,+ kabili tawatupeela impanga na mabala ya myangashi pa kuti fibe fyesu. Bushe ulefwaya aba baume balekukonka fye kwati ni mpofu?* Ifwe tatwaiseko!”
15 E ico Mose alikalipe nga nshi kabili aebele Yehova ati: “Mwipokelela umutuulo wabo uwa ngano. Ine nshapokapo impunda iilume nangu imo kuli bena, kabili tapali nangu umo uo nalufyanya.”+
16 Lyena Mose aebele Kora ati: “Iwe na bonse abali ku lubali lobe, mukabe pa cinso ca kwa Yehova mailo, iwe na bena, na Aarone.
17 Cila muntu afwile ukusenda ica kubikamo umulilo, akabikemo no bubani, kabili cila muntu akacitwale pa cinso ca kwa Yehova. Ifya kubikamo umulilo fikabe 250. Iwe na Aarone na imwe cila muntu afwile ukukwata ica kubikamo umulilo.”
18 E ico cila muntu asendele ica kubikamo umulilo abikamo no mulilo no bubani, kabili baileiminina pa mwinshi we tenti lya kukumaninamo na Lesa. Mose na Aarone nabo baileiminina pamo nabo.
19 Ilyo Kora alongenye abali ku lubali lwakwe+ pa mwinshi we tenti lya kukumaninamo na Lesa pa kuti babemine, ulukuta lonse lwalimwene ubukata bwa kwa Yehova.+
20 Yehova nomba aebele Mose na Aarone ati:
21 “Ipatuleni kuli aba bantu pa kuti mbalofye ili line.”+
22 Ilyo baumfwile ifi bawile ubukupeme kabili batile: “Mwe Lesa, Lesa umwine wa mupashi uwaba mu bantu bonse,*+ bushe ulubembu lwa muntu umo elo lulenge mufulilwe ulukuta lonse?”+
23 Lyena Yehova aebele Mose ati:
24 “Eba ulukuta auti, ‘Talukeni kwi tenti lya kwa Kora, ilya kwa Datani ne lya kwa Abiramu!’”+
25 Pa numa, Mose na bakalamba+ ba mu bena Israele balimine baya kuli Datani na Abiramu.
26 Aebele ulukuta ati: “Ndemupaapaata nati talukeni ku matenti ya aba bantu imbifi kabili mwikumya ku cintu cabo nangu cimo, pa kuti mwifwila pa membu shabo shonse.”
27 Ilyo line fye balitalwike kwi tenti lya kwa Kora, ilya kwa Datani ne lya kwa Abiramu. Kabili Datani na Abiramu balifumine, baiminina pa minshi ya matenti yabo, pamo na bakashi babo, abana babo abaume no tunya twabo.
28 Lyena Mose abebele ati: “Ifyalacitika fyalalenga mwishibe ukuti Yehova e wantuma ukucita ifi fintu fyonse, nshicita ifya mu mutima wandi:*
29 Nga ca kuti aba bantu balafwa nge fyo abantu bonse bafwa, kabili nga balakandwa nge fyo abantu bonse bakandwa, ninshi te Yehova wantuma.+
30 Lelo Yehova nga alacita icintu icaibela, kabili umushili nga walaisuka* no kubaminina kumo na fyonse ifyo bakwata, kabili nga balaya mu Nshiishi* aba mweo, mwalashininkisha ukuti aba bantu nabasaalula Yehova.”
31 Nomba ilyo fye apwishishe ukulanda aya mashiwi, umushili apo baiminine walilepwike.+
32 Kabili isonde lyaliswike* no kubamina, kumo na ba mu mayanda yabo na bantu bonse aba kwa Kora+ na fyonse ifyo bakwete.
33 E fyo bena na bonse abo bali nabo baile mu Nshiishi* aba mweo, kabili umushili walibashiikile, ica kuti balilobele mu lukuta.+
34 Ilyo abena Israele bonse ababashingulwike baumfwile ifyo balepunda, balifulumwike kabili baleti: “Tuletiina pantu isonde kuti lyatumina!”
35 Lyena umulilo wafumine kuli Yehova+ kabili waocele abantu 250 abaleoca ububani.+
36 Nomba Yehova aebele Mose ati:
37 “Eba Eleasari mwana Aarone shimapepo ukuti afumye ifya kubikamo umulilo+ pa mulilo pantu fya mushilo. Kabili umwebe ukuti asalanganishishe umulilo ukutali.
38 Mu fya kubikamo umulilo ifya aba baume abafwilile pa membu shabo,* mufwile ukupangamo utumalata utwa kubika ku ciipailo.+ Apo balifipalamike kuli Yehova, fyaishileba ifya mushilo. Filingile ukuba icishibilo ca kusoka abena Israele.’”+
39 E ico Eleasari shimapepo abuulile ifya kubikamo umulilo ifya mukuba, ifyo abapiile babomfeshe, kabili bapangilemo utumalata utwa kubika ku ciipailo,
40 nga filya fine Yehova amwebele ukupitila muli Mose. Ifi fyali no kulaibukishako abena Israele ukuti uushili wa mu lupwa lwa kwa Aarone tafwile ukupalama pa cinso ca kwa Yehova pa kuti oce ububani,+ kabili umuntu nangu umo tafwile ukuba nga Kora na baali ku lubali lwakwe.+
41 Ubushiku bwakonkelepo, ulukuta lonse ulwa bena Israele lwatendeke ukuilishanya pali Mose na Aarone+ aluti: “Imwe babili mwali-ipaya abantu ba kwa Yehova.”
42 Ilyo aba mu lukuta lonse balongene pa kuti bemine Mose na Aarone, lyena bapilibukile kwi tenti lya kukumaninamo na Lesa, kabili bamwene ikumbi pa muulu we tenti, kabili batendeke ukumona ubukata bwa kwa Yehova.+
43 E lyo Mose na Aarone bapaleme kwi tenti lya kukumaninamo na Lesa,+
44 kabili Yehova aebele Mose ati:
45 “Imwe fumeni muli ulu ulukuta pa kuti ndulofye ili line.”+ Ilyo abebele ifi bawile ubukupeme.+
46 Lyena Mose aebele Aarone ati: “Buula ica kubikamo umulilo, ubikemo no mulilo wa pa ciipailo+ kabili ubikemo no bubani e lyo wangufyanye ukuya ku lukuta uye ulufutileko,+ pantu Yehova nakalipa nga nshi. Icinkunka nacitendeka!”
47 Ilyo line fye Aarone alicibuulile, nge fyo Mose amwebele, kabili abutukiile mu lukuta, kabili moneni! icinkunka caliponene pa bantu. E ico abikile ububani mu ca kubikamo umulilo kabili atendeke ukufutilako abantu.
48 Atwalilile ukwiminina pa kati ka bafwa na ba mweo, kabili icinkunka casukile capwa.
49 Abafwile ku cinkunka bali 14,700, ukufumyako abafwile pa mulandu wa kwa Kora.
50 Ilyo Aarone alebwelela kuli Mose pa mwinshi we tenti lya kukumaninamo na Lesa, ninshi icinkunka nacipwa.
Amafutunoti
^ Mu ciHebere, “Bushe ulefwaya ukutonkola aba baume amenso?”
^ Mu ciHebere, “umupashi uwaba mu fya mweo fyonse.”
^ Nelyo “nshicita fye ifyo mfwaya.”
^ Mu ciHebere, “wala-asamuna akanwa.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “lyalyasamwine akanwa kaliko.”
^ Nelyo “Sheol,” e kutila, inshiishi uko bashiika abantu bonse. Moneni Amashiwi ya mu Baibo ne fyo Yapilibula.
^ Nelyo “ababembukiile imyeo yabo.”
