Impendwa 18:1-32
18 Lyena Yehova aebele Aarone ati: “Iwe na bana bobe abaume na bakatuntuka muli iwe mukaba no mulandu nga ca kuti umo takonkele amafunde ayo mulingile ukukonka pe tenti lya mushilo,+ kabili iwe na bana bobe abaume mukaba no mulandu nga ca kuti umo takonkele amafunde ayo mwe bashimapepo+ mulingile ukukonka.
2 Kabili upalamike bamunonko aba mu mukowa wa kwa Lebi, umukowa wa kwa wiso, pa kuti mulebombela pamo nabo kabili baleafwa iwe+ na bana bobe abaume ukubomba imilimo pa ntanshi ye tenti umwaba icipao ca Cipangano.+
3 Bakalebomba imilimo iyo bafwile ukulabomba pa kukwafwilisha ne yo bafwile ukulabomba pe tenti lya mushilo.+ Lelo tabalingile ukulapalama ku fipe fya pa cifulo ca mushilo na ku ciipailo, pa kuti bena nelyo imwe mwikafwa.+
4 Bakalabombela pamo na iwe kabili bakalabomba imilimo yonse iya pe tenti lya kukumaninamo iyo bafwile ukulabomba, kabili uushili wa mu lupwa lobe tafwile ukupalama kuli imwe.+
5 Mulingile ukulabomba imilimo ya pa cifulo ca mushilo+ ne ya pa ciipailo,+ pa kuti nikafulilwa+ abena Israele na kabili.
6 Ine nimbuula bamunyinenwe abena Lebi mu bena Israele pa kuti babe ubupe bwenu.+ Balipeelwa kuli Yehova pa kuti balebomba imilimo ya pe tenti lya kukumaninamo.+
7 Iwe na bana bobe abaume mukalebomba imilimo ya bushimapepo, iya pa ciipailo ne ya mu muputule uwaba ku numa ya nsalu ya kucingilako,+ mukalebomba iyi milimo.+ Iyi milimo ya bushimapepo, bupe ubo namupeela kabili uushili wa mu lupwa lobe nga apalamako afwile ukwipaiwa.”+
8 Yehova akonkenyepo ukweba Aarone ati: “Ine nakupeela umulimo wa kula-angalila imituulo iyo abena Israele bantuula.+ Napeela iwe na bana bobe abaume fimo pa fya mushilo fyonse ifyo abena Israele basangula. Fyakulaba fyenu umuyayaya.+
9 Ifi e fikalaba fyenu pa mituulo ya mushilo nga nshi iya pa mulilo: imituulo yonse iyo bakulatuula, kumo ne mituulo ya ngano,+ imituulo ya pa lubembu+ ne mituulo ya pa mulandu+ iyo bakalantuula. Iyi, mituulo ya mushilo nga nshi kabili yobe na bana bobe abaume.
10 Ukalefiliila+ umwa mushilo nga nshi. Umwaume onse kuti alyako. Ukalefimona ukuti fya mushilo.+
11 Na fimbi ifikalaba fyobe ni fi: fyonse ifyo abena Israele basangula+ pamo ne mituulo yabo yonse iya kusunsha.+ Napeela iwe na bana bobe abaume na bana bobe abanakashi, fyakulaba fyenu umuyayaya.+ Onse uwa mu ng’anda yobe uwasanguluka kuti alyako.+
12 “Amafuta yonse ayawamisha no mwangashi onse uupya uwawamisha ne ngano shonse ishawamisha, ifisabo fyabo ifyabalilapo ukupya,+ ifyo bakalapeela Yehova, nakupeela.+
13 Ifisabo fyabalilapo ukupya pali fyonse ifya mu mabala yabo, ifyo bakalaleta kuli Yehova, fikalaba fyobe.+ Onse uwa mu ng’anda yobe uwasanguluka kuti alyako.
14 “Conse* ico umuntu mu Israele apeela Lesa cikalaba cobe.+
15 “Ibeli lya ca mweo conse,+ ilyo bakalaletela Yehova, nampo nga lya muntu nelyo lya nama,+ likalaba lyobe. Lelo ibeli lya muntu nelyo ibeli lya nama iyakowela ufwile ukulilubula.+
16 Ulingile ukulubula ibeli nga lili no mweshi umo no kucilapo pa mutengo wa kulubwilapo uulingene na mashekele*+ 5 aya silfere ukulingana ne cipimo ce shekele ilya pa cifulo ca kupepelapo.* Ishekele limo lifwile ukuba amagera* 20.
17 Lelo taufwile ukulubula ing’ombe iilume+ iyabalilapo ukufyalwa nelyo akana ka mpaanga akalume akabalilapo ukufyalwa nangu akana ka mbushi akalume akabalilapo ukufyalwa. Ifi fyena fya mushilo. Ufwile ukusansa umulopa wa fiko pa ciipailo,+ kabili ulingile ukufutumuna amafuta ya fiko pa kuti yakabe umutuulo wa pa mulilo uwa kuletela Yehova akacena akasuma.*+
18 Kabili iminofu ya fiko ifwile ukuba yobe. Filya fine icisao* ca mutuulo wa kusunsha no mwendo wa ku kulyo fikaba fyobe, e fyo ne minofu ikaba yobe.+
19 Imisangulo yonse iya mushilo iyo abena Israele bakulasangwila Yehova,+ napeela iwe na bana bobe abaume na bana bobe abanakashi. Yakulaba yobe umuyayaya.+ Cipangano ca mucele* ica muyayaya ico Yehova apangana na iwe na bana bobe.”
20 Kabili Yehova aebele Aarone ati: “Tawakakwate nangu cimo mu bena Israele, kabili tabakakwakanyeko impanga nangu imo.+ Nine nkaba icakaniko cobe kabili impanga yobe mu bena Israele.+
21 “Nomba mona, nimpeela abana ba kwa Lebi icalenga 10+ ica mu Israele pa kuti cibe cabo pa milimo iyo babomba, imilimo ya pe tenti lya kukumaninamo.
22 Abena Israele bafwile ukuleka ukupalama kwi tenti lya kukumaninamo pantu kuti babembuka kabili kuti bafwa.
23 Abena Lebi e balingile ukulabombela pe tenti lya kukumaninamo, kabili e bakaba no mulandu pa membu sha bantu.+ Tabafwile ukukwata impanga mu bena Israele.+ Ili e funde mulingile ukulakonka mu nkulo shenu shonse.
24 Pantu icalenga 10 ico abena Israele bakalasangwila Yehova, nimpeela abena Lebi pa kuti cikaleba cabo. E co nabebela nati, ‘Tabafwile ukukwata impanga mu bena Israele.’”+
25 Lyena Yehova aebele Mose ati:
26 “Ulingile ukweba abena Lebi auti, ‘Abena Israele bakalamupeela icalenga 10 ico namupeela pa kuti cikaleba icakaniko cenu,+ kabili pa calenga 10 ico abena Israele bakalamupeela, mufwile ukulafumyapo icalenga 10 ica kusangwila Yehova.+
27 Kabili cikaba e musangulo wenu, ngo musangulo wa ngano isha pa kupumina+ nelyo ngo mwangashi uwingi mu ca kukaminamo imyangashi nangu nga mafuta ayengi mu ca kukaminamo amafuta.
28 Ifi e fyo na imwe mukalapeela Yehova umusangulo pa fyalenga 10 fyonse ifyo mukalapokelela ku bena Israele, kabili pali ifi e po mukalafumya ifya kusangwila Yehova ifyo mukalapeela Aarone shimapepo.
29 Mukalasangwila Yehova imisangulo yalekanalekana pali fyonse ifyawamisha ifya mushilo ifyo bakalamupeela.’+
30 “Kabili ulingile ukubeba auti, ‘Nga mwasangula ifyawamisha, fikalaba kwati e cibwesha ca bena Lebi ica pa kupumina ingano, kabili fikalaba nge cibwesha ica mu ca kukaminamo imyangashi nelyo ica mu ca kukaminamo amafuta.
31 Imwe na ba mu mayanda yenu kuti mwafiliila apali ponse, pantu e cilambu cenu pa milimo mubomba pe tenti lya kukumaninamo.+
32 Nga mwakulasangula ifyawamisha tamwakalebembuka, kabili ifya mushilo ifyo abena Israele bakalasangula tamufwile ukulafibomfya bubi bubi, pantu kuti mwafwa.’”+
Amafutunoti
^ E kutila, conse ico umuntu apeela Lesa pa kuti balecibomfya mu mulimo wa mushilo ico bashingalubula.
^ Ishekele limo lyalefina amagramu ukucilako panono pali 11. Moneni Ifyebo Fyalundwako pa B14.
^ Nelyo “ishekele lya mushilo.”
^ Gera imo yalicilileko panono pali hafu ya gramu. Moneni Ifyebo Fyalundwako pa B14.
^ Nelyo “aka kutalalika umutima.”
^ Icisao cifuba ca nama.
^ E kutila, icipangano ca muyayaya kabili icishaluka.
