Impendwa 19:1-22
-
Ing’ombe iyakashika na menshi ya kusangulwilako (1-22)
19 Kabili Yehova aebele Mose na Aarone ati:
2 “Ili e funde ilyo Yehova apeele ilya kuti, ‘Webe abena Israele ukuti bafwile ukukupeela ing’ombe iyakashika iyabula akalema+ kabili iyo bashatala ababikapo ikoli.
3 Mukapeele Eleasari shimapepo, kabili akaifumishe kunse ya nkambi, kabili bakaipaile pa cinso cakwe.
4 Lyena Eleasari shimapepo akatumpike umunwe wakwe mu mulopa wa iko kabili akasanse umulopa imiku 7 ukukabela umwinshi we tenti lya kukumaninamo.+
5 Lyena bakoce iyo ing’ombe ninshi alemonako. Bakoce umukupo wa iko pamo no munofu wa iko no mulopa wa iko e lyo na mafi ya iko.+
6 Kabili shimapepo akabuule icimuti ca mukedari, ifimenwa fya husope+ ne nsalu yakashika kabili akafipoose mu mulilo umulepya iyo ing’ombe.
7 Lyena shimapepo akawashe ifya kufwala fyakwe kabili akasambe umubili onse, e lyo pa numa akabwelele mu nkambi; lelo uyu shimapepo akaba uwakowela mpaka icungulo.
8 “‘Uwacoca ing’ombe akawashe ifya kufwala fyakwe kabili akasambe umubili onse, kabili akaba uwakowela mpaka icungulo.
9 “‘Umwaume uwasanguluka akakuse imito ya ng’ombe+ no kuibika apa busaka kunse ya nkambi, kabili bakasungile ulukuta lwa bena Israele iyi imito pa kuti bakaibike mu menshi ya kusangulwilako.+ Ikaba mutuulo wa pa lubembu.
10 Uwakusa imito ya ng’ombe akawashe ifya kufwala fyakwe kabili akaba uwakowela mpaka icungulo.
“‘Ili e funde abena Israele na balebeshi abo bekala nabo balingile ukulakonka umuyayaya.+
11 Onse uwakumya icitumbi ca muntu,* akaba uwakowela pa nshiku 7.+
12 Uyo muntu afwile ukuisangulula na menshi ya kuisangulwilako pa bushiku bwalenga shitatu, lyena pa bushiku bwalenga 7 akaba uwasanguluka. Lelo nga taisangulwile pa bushiku bwalenga shitatu, ninshi takabe uwasanguluka pa bushiku bwalenga 7.
13 Onse uwakumya icitumbi ca muntu,* kabili taisangulwile, ninshi nakowesha itenti lya mushilo ilya kwa Yehova,+ kabili uyo muntu afwile ukwipaiwa pa kuti afume mu Israele.+ Apo tabamusanshile amenshi ya kusangulwilako,+ ninshi acili uwakowela. Akatwalilila ukuba uwakowela.
14 “‘Ili e funde lya kukonka nga ca kuti umuntu afwila mwi tenti: Onse uwaingila mwi tenti, na onse uwaciba mwi tenti ilyo acilafwa, akaba uwakowela pa nshiku 7.
15 Icipe conse apashili inkupiko ninshi cakowela.+
16 Onse uuli kunse ya nkambi uwakumya umuntu uo baipaya ku lupanga nelyo uwakumya icitumbi nangu ifupa lya muntu nelyo uwakumya pa nshiishi, akaba uwakowela pa nshiku 7.+
17 Bafwile ukubuulila uwakowela imito imo iya mutuulo wa pa lubembu uo baocele kabili baketile amenshi ya pa kamfukumfuku mu cipe umuli imito.
18 Lyena umwaume uwasanguluka+ akabuule icimenwa ca husope+ no kucitumpika mu menshi kabili akasanse pe tenti na pa fipe fyonse na pa bantu* bonse abaalimo na pa wakumishe ifupa nelyo uwakumishe uo baipeye nangu icitumbi nelyo pa nshiishi.
19 Umuntu uwasanguluka akasansa uwakowela ayo menshi pa bushiku bwalenga shitatu na pa bwalenga 7, kabili akamusangulula pa lubembu lwakwe pa bushiku bwalenga 7;+ kabili afwile ukuwasha ifya kufwala fyakwe no kusamba umubili onse, lyena akaba uwasanguluka icungulo.
20 “‘Lelo umuntu uwakowela kabili uushakaisangulule, afwile ukwipaiwa pa kuti akafume mu lukuta,+ pantu ninshi nakowesha itenti lya mushilo ilya kwa Yehova. Apo tabamusanshile amenshi ya kusangulwilako, ninshi nakowela.
21 “‘Ili e funde bafwile ukulakonka umuyayaya: Uulesansa amenshi ya kusangulwilako+ afwile ukuwasha ifya kufwala fyakwe, kabili uwaikata mu menshi ya kusangulwilako akaba uwakowela mpaka icungulo.
22 Conse ico uwakowela akumyako cikaba icakowela, kabili umuntu uwakumya icakowela akaba uwakowela mpaka icungulo.’”+
Amafutunoti
^ Nelyo “icitumbi ca mweo uwafwa.” Moneni Amashiwi ya mu Baibo ne fyo Yapilibula.
^ Nelyo “icitumbi ca mweo uwafwa.” Moneni Amashiwi ya mu Baibo ne fyo Yapilibula.
^ Nelyo “imyeo.”
