Impendwa 21:1-35
21 Ilyo umwina Kanaani, uwali imfumu ya ku Aradi,+ uwaikele mu Negebu aumfwile ukuti abena Israele baleisa mu nshila ya ku Atarimu, alile mu kubasansa kabili alisendelepo bamo pa kuti bayeba bankole.
2 E ico abena Israele balapile kuli Yehova abati: “Nga ca kuti mwapeela aba bantu mu minwe yesu, nangu cibe shani tukonaula imisumba yabo.”
3 E ico Yehova alyumfwile ifyo abena Israele bamulombele kabili apeele abena Kanaani mu minwe yabo kabili balibepeye, baonaula ne misumba yabo. E co bainikiile ilya ncende ukuti Horma.*+
4 Ilyo bafumine pa Lupili lwa Hore+ bapitile mu nshila iyaya kuli Bemba Wakashika pa kuti bashoke icalo ca Edomu.+ Abantu* balinakile nga nshi pa mulandu wa kuti ulwendo lwalilepele.
5 Kabili abantu baleilishanya pali Lesa na pali Mose+ abati: “Cinshi ico mwatufumishe mu Egupti? Bushe mwalefwaya twise tufwile mu matololo? Tatukwete ifya kulya na menshi,+ kabili tatulefwaya* nangu panono* ici ica kulya icinangwa.”+
6 E ico Yehova atumine insoka sha busungu* pali aba bantu, kabili shalibasumawile ica kuti abena Israele abengi balifwile.+
7 E ico abantu baile kuli Mose kabili bamwebele abati: “Natubembuka pali ifi tuilishenye pali Yehova na pali iwe.+ Tupaapaatileko kuli Yehova pa kuti afumye insoka pali ifwe.” E fyo Mose abapaapaatileko.+
8 Lyena Yehova aebele Mose ati: “Panga icimpashanya ca nsoka ya busungu* kabili uibike pa cimuti icaololoka. Kabili onse uo insoka yasuma afwile ukulolesha insoka iili pa cimuti pa kuti efwa.”
9 Ilyo line Mose apangile insoka ya mukuba+ aibika na pa cimuti icaololoka,+ kabili insoka nga yasuma umuntu, e lyo alolesha insoka ya mukuba pa cimuti, alepusuka.+
10 Pa numa, abena Israele bafumine pali ilya ncende kabili bailepanga inkambi mu Oboti.+
11 Lyena bafumine mu Oboti kabili bailepanga inkambi mu Iye-abarimu,+ mu matololo ayalungatana na Moabu, lwa ku kabanga.
12 Ilyo bafumine apa bailepanga inkambi mupepi no Mupokapoka wa Serede.+
13 Ilyo bafumine palya bailepanga inkambi mu mpanga ya Arnone,+ iyaba mu matololo ayatula pa mupaka wa bena Amore. Iyi mpanga ya Arnone e mupaka wa Moabu, iyapakanya Moabu na bena Amore.
14 E mulandu wine ibuuku lya Nkondo sha kwa Yehova lilandila pali “Fahebu mu Sufa no mupokapoka wa Arnone,
15 ne mipokapoka iyafika na ku Ari kabili iyafika ku mupaka wa Moabu.”
16 Ilyo bafumine pali iyi ncende, baile ku Beere. Uku e kwaba icishima apo Yehova aebeele Mose ati: “Longanya abantu pa kuti mbapeele amenshi.”
17 Pali iyi nshita abena Israele baimbile ulwimbo lwa kuti:
“Fukauka, we cishima! Na imwe ankuleni!*
18 Icishima ico bacilolo baimbile, ico intungulushi shafukwile,Ku nkonto ya mukalamba wa bashilika na ku nkonto shabo.”
Lyena bafumine mu matololo no kuya ku Matana,
19 ilyo bafumine ku Matana baile ku Nahaliele kabili ilyo bafumine ku Nahaliele baile ku Bamote.+
20 Ilyo bafumine ku Bamote baile ku mupokapoka uwaba mu mpanga ya Moabu,+ pa muulu wa Pisga,+ iyasansama pali Yeshimone.*+
21 Nomba abena Israele batumine inkombe kuli Sihone imfumu ya bena Amore, kabili shailemweba ashiti:+
22 “Lekeni tupiteko mu calo cenu. Tatwakapaasukile mu mabala yenu nangu ni mu mabala ya myangashi. Tatwakanwe na menshi ya mu fishima fyenu. Tukapita mu Nshila ya Mfumu mpaka tukafume mu calo cenu.”+
23 Nomba Sihone tasuminishe abena Israele ukupita mu calo cakwe. Lelo Sihone alonganike abashilika bakwe bonse kabili baile mu kulwisha abena Israele mu matololo, bafikile na ku Yahasi kabili batendeke ukulwa na bena Israele.+
24 Lelo abena Israele bamucimfiishe ku lupanga+ kabili balipokele icalo cakwe+ ukutula ku Arnone+ ukuyafika ku Yaboke,+ mupepi na ku bena Amoni, pantu Yasere+ e mupaka wa bena Amoni.+
25 E ico abena Israele balipokele imisumba ya bena Amore yonse,+ kabili e mo batendeke ukwikala. Baikele na mu Heshebone na mu mishi yonse iyashingulwike Heshebone.
26 Pantu Heshebone wali musumba wa kwa Sihone, imfumu ya bena Amore iyalwile ne mfumu ya Moabu no kuipoka icalo ca iko conse ukufika fye na ku Arnone.
27 E calengele kube insoselo ya kutumfya iya kuti:
“Iseni ku Heshebone.
Lekeni umusumba wa kwa Sihone ukuulwe kabili ubelelele.
28 Pantu umulilo wafumine mu Heshebone, ulubingu lwafumine mu musumba wa kwa Sihone.
Waoca Ari uwa mu Moabu, intungulushi sha pa fifulo ifyasansuka ifya mu Arnone.
29 We bulanda kuli iwe Moabu! Mukaloba, mwe bena Kemoshe!+
Kemoshe alenga abana bakwe abaume baba imbutushi kabili abana bakwe abanakashi baba bankole ba kwa Sihone, imfumu ya bena Amore.
30 Natubalase;Heshebone ikonaulwa ukufika fye na ku Dibone;+Natuyonaule ukufika fye na ku Nofa;Umulilo ukafika fye na ku Medeba.”+
31 E ico abena Israele batampile ukwikala mu calo ca bena Amore.
32 Lyena Mose atumine abaume bamo aba kuyalengula Yasere.+ Balisanshile imishi iyashingulwike uyu musumba kabili balitamfishe abena Amore abaleikalamo.
33 Pa numa, balyalwike baya mu Nshila ya ku Bashani. Kabili Oge+ imfumu ya Bashani yalile na bashilika ba iko bonse mu kulwa nabo pa Edrei.+
34 Yehova aebele Mose ati: “Wimutiina,+ pantu ndepeela ena na bashilika bakwe bonse ne calo cakwe mu minwe yobe,+ kabili walamucimfya nge fyo wacimfishe Sihone, imfumu ya bena Amore, uwaleikala mu Heshebone.”+
35 E ico balimwipeye kumo na bana bakwe abaume na bashilika bakwe bonse, ica kuti takwali nangu umo uwapuswike,+ kabili balimupokele icalo cakwe.+
Amafutunoti
^ Ilyalola mu kuti “Incende Iyaonaulwa.”
^ Nelyo “imyeo ya bantu.”
^ Nelyo “imyeo yesu tailefwaya.”
^ Nelyo “natupatisha.”
^ Nelyo “ubusungu ubwatapata.”
^ Nelyo “ubusungu ubwatapata.”
^ Nelyo “imbeni.”
^ Nelyo kuti lyapilibula no kuti, “iciswebebe; amatololo.”
