Impendwa 25:1-18
25 Ilyo abena Israele baleikala mu Shitimu,+ abaume batendeke ukucita ubulalelale na banakashi abena Moabu.+
2 Abanakashi baitile abaume abena Israele ku malambo ya tulesa twabo,+ kabili batampile ukulya, balakontamina na tulesa twabo.+
3 E ico abena Israele nabo batampile ukupepa Baali wa ku Peore,+ kabili Yehova alikalipe nga nshi pa fyo bacitile.
4 E ico Yehova aebele Mose ati: “Senda abaletungulula aba bantu kabili nga babepaya, ukobeke ifitumbi fyabo pa lwalaala* pa cinso ca kwa Yehova, pa kuti ubukali bwa kwa Yehova ububilima ngo mulilo bufume pali Israele.”
5 Lyena Mose aebele bakapingula ba mu Israele ati:+ “Cila muntu epaye abantu bakwe abapepeleko Baali wa ku Peore.”+
6 Nomba pali ilya ine nshita, umwaume umo umwina Israele aletele umwanakashi umwina Midiani+ mu nkambi ninshi Mose no lukuta lonse ulwa bena Israele balemonako. Ilyo amuletele abantu bali pa mwinshi we tenti lya kukumaninamo na Lesa baleloosha.
7 Ilyo Finehasi+ mwana Eleasari umwana wa kwa Aarone shimapepo abamwene, ilyo line fye alifumine mu lukuta asenda ne fumo.
8 Lyena akonkele ulya umwaume umwina Israele mwi tenti kabili abapulinkenye ifumo bonse babili, umwaume umwina Israele no mwanakashi mu fya mfwalo fyakwe. E fyo ne cikuko capwile pa bena Israele.+
9 Abafwile ku cikuko bali 24,000.+
10 Lyena Yehova aebele Mose ati:
11 “Finehasi+ mwana Eleasari umwana wa kwa Aarone shimapepo nalenga nafumya icipyu candi pa bena Israele pantu tatekeleshe abashili ne cishinka kuli ine.+ E mulandu wine nshilofeshe abena Israele nangu ca kuti mfwaya ukupepwa fye neka.+
12 E ico umwebe auti, ‘Ndepangana nankwe icipangano ca mutende.
13 Pa mulandu ne ci icipangano, ena na bakatuntuka muli ena bakatwalilila ukuba bashimapepo pa nshita iitali,+ pantu tacitekelesha abashaciba na cishinka kuli Lesa wakwe+ kabili acifutilako abena Israele.’”
14 Caishileishibikwa ukuti ishina lya mwaume umwina Israele uo baipaile pamo no mwanakashi umwina Midiani, ni Simri umwana mwaume wa kwa Salu, intungulushi ya mukowa wa kwa Simeone.
15 Ishina lya mwanakashi umwina Midiani uo baipeye ni Kosbi umwana wa kwa Suri;+ uwali umukalamba wa mikowa ya bena Midiani.+
16 Pa numa Yehova aebele Mose ati:
17 “Sanseni abena Midiani kabili mubepaye,+
18 pantu balamucusha mu bucenjeshi pa mulandu na Peore+ na Kosbi umwana mwanakashi wa ntungulushi ya ku Midiani, nkashi yabo uo baipeye+ pa bushiku kwali icikuko pa mulandu wa kwa Peore.”+
Amafutunoti
^ Mu ciHebere, “pa kasuba katanda imono.”
