Impendwa 28:1-31
28 Yehova aebele Mose no kuti:
2 “Eba abena Israele auti, ‘Mukalebika amano ku kundetela umutuulo wandi, umukate wandi. Mukalendetela imituulo yandi iya pa mulilo iya kundetela akacena akasuma* pa nshita iyo mulingile ukuiletelapo.’+
3 “Kabili ubebe auti, ‘Uyu e mutuulo wa pa mulilo uo mukalaletela Yehova: utwana twa mpaanga tubili utulume utwa mwaka umo kabili utwabula akalema pa kuti tukaleba umutuulo wa koca uo mukalatuula cila bushiku.+
4 Akana ka mpaanga kamo akalume mukalakatuula ulucelo, e lyo kambi mukalakatuula ilyo fye akasuba kawa,*+
5 mukalekatuulila pamo na oma imo* iya buunga bwapeleka ubo basaakanya na makapu* yatatu aya mafuta ya muolife ayasuma nga nshi. Uyu ukalaba mutuulo wa ngano.+
6 Mutuulo wa koca uo mufwile ukulatuula lyonse,+ uo mwatendeke ukutuula pa Lupili lwa Sinai pa kuti uleba umutuulo wa pa mulilo uwa kuletela Yehova akacena akasuma,*
7 muleutuulila pamo no mutuulo wa uko uwa mwangashi, amakapu yatatu aya hini pali cila kana ka mpaanga akalume.+ Pa cifulo ca mushilo e po mukalepongolwela Yehova umwangashi uukola.
8 Kabili mukaletuula akana ka mpaanga kambi akalume ilyo fye akasuba kawa.* Mukalekatuulila pamo no mutuulo wa ngano umo wine nga ulya uwa lucelo pamo no mutuulo wa uko umo wine uwa mwangashi pa kuti ukaleba umutuulo wa pa mulilo, uwa kuletela Yehova akacena akasuma.*+
9 “‘Lelo pa bushiku bwe Sabata+ mukaletuula utwana twa mpaanga tubili utulume utwa myaka ibili kabili utwabula akalema, e lyo no mutuulo wa ngano uwa buunga bwapeleka ubwa mu ndupe shibili ubo basaakanya na mafuta. Mukalefituulila pamo no mutuulo wa mwangashi.
10 Uyu ukalaba mutuulo wa koca uwa pe Sabata uo mukalatuulila pamo no mutuulo wa koca uo mukalatuula lyonse pamo no mutuulo wa uko uwa mwangashi.+
11 “‘Pa ntendekelo ya cila mweshi* mukaletuulila Yehova umutuulo wa koca. Mukaletuula utwana twa ng’ombe utulume tubili, impaanga iilume imo no twana twa mpaanga utulume 7 utwa mwaka umo kabili utwabula akalema,+
12 ne ndupe shitatu isha mutuulo wa ngano+ uwa buunga bwapeleka ubo basaakanya na mafuta uwa kutuulila pamo na cila ng’ombe, ne ndupe shibili isha mutuulo wa ngano uwa buunga bwapeleka ubo basaakanya na mafuta uwa kutuulila pamo na ilya impaanga iilume,+
13 no lupe lumo ulwa mutuulo wa ngano uwa buunga bwapeleka ubo basaakanya na mafuta uwa kutuulila pamo na kana ka mpaanga akalume kamo na kamo, pa kuti ukabe umutuulo wa koca, umutuulo wa pa mulilo uwa kuletela Yehova akacena akasuma.*+
14 Kabili imituulo yabo iya myangashi ifwile ukuba hafu ya hini iya mwangashi iya kutuulila pamo ne ng’ombe iilume+ na makapu 4 aya mwangashi aya hini aya kutuulila pamo ne mpaanga iilume,+ na makapu yatatu aya mwangashi aya hini aya kutuulila pamo na kana ka mpaanga akalume.+ Uyu e mutuulo wa koca uwa kutuula cila mweshi, umwaka onse.
15 Kabili mukaletuulila Yehova akana ka mbushi kamo pa kuti kakaleba umutuulo wa pa lubembu, ukulunda pa mutuulo wa koca uo mukalatuula lyonse pamo no mutuulo wa uko uwa mwangashi.
16 “‘Mu mweshi wa kubalilapo, pa bushiku bwalenga 14, bukalaba bushiku bwa Cakucilila ca kwa Yehova.+
17 Kabili pa bushiku bwalenga 15 ubwa uyo mweshi mukalekwata umutebeto. Mukalelya imikate iishatutumuka pa nshiku 7.+
18 Ubushiku bwa kubalilapo bukalaba bushiku bwa kulongana kwa mushilo. Mwikalabomba umulimo nangu umo uwakosa pali ubu bushiku.
19 Kabili mukaletuulila Yehova umutuulo wa koca. Mukaletuula ing’ombe shibili ishilume, impaanga iilume no twana twa mpaanga utulume 7 utwa mwaka umo. Inama mukalatuula shikaleba ishabula akalema.+
20 Mukalefituulila pamo no mutuulo wa ngano uwa buunga bwapeleka ubo basaakanya na mafuta.+ Ing’ombe iilume mukaleituulila pamo ne ndupe shitatu isha buunga bwapeleka, kabili impaanga iilume mukaleituulila pamo ne ndupe shibili isha buunga bwapeleka.
21 Mukaletuula ulupe lumo ulwa buunga bwapeleka pa kana kamo na kamo aka mpaanga akalume pali tulya 7,
22 ne mbushi imo pa kuti ikaleba umutuulo wa pa lubembu uwa kumufutilako.
23 Ukulunda pa mutuulo wa koca uwa lucelo uo mukalatuula lyonse, mukaletuula ne fi fine.
24 Mukaletuula ifi nga filya fine mukalatuula umutuulo wa cila bushiku uwa fya kulya* pa nshiku 7. Ukalaba mutuulo wa pa mulilo uwa kuletela Yehova akacena akasuma.* Mukaleutuulila pamo no mutuulo wa koca uo mukalatuula lyonse pamo no mutuulo wa uko uwa mwangashi.
25 Pa bushiku bwalenga 7 mukalelongana ukulongana kwa mushilo.+ Mwikalabomba umulimo nangu umo uwakosa pali ubu bushiku.+
26 “‘Pa bushiku mukalatuula ifisabo fyabalilapo ukupya,+ ilyo mukalatuulila Yehova umutuulo wa ngano ishipya,+ mukalelongana ukulongana kwa mushilo mu nshita ya mutebeto wa milungu.+ Mwikalabomba umulimo nangu umo uwakosa.+
27 Mukaletuula ing’ombe ishilume shibili ishinono, impaanga iilume no twana twa mpaanga utulume 7 utwa mwaka umo,+ pa kuti fileba umutuulo wa koca uwa kuletela Yehova akacena akasuma,*
28 kabili pa ng’ombe iilume imo na imo mukaletuulilapo ne ndupe shitatu isha mutuulo wa ngano uwa buunga bwapeleka ubo basaakanya na mafuta, e lyo pali ilya impaanga iilume mukaletuulilapo indupe shibili,
29 pali cila kana ka mpaanga akalume pali tulya 7 mukaletuulilapo ulupe lumo,
30 e lyo na kana ka mbushi kamo aka kumufutilako.+
31 Mukaletuula ifi ukulunda pa mutuulo uo mukalatuula lyonse pamo no mutuulo wa ngano. Inama isho mukalatuula shifwile ukuba ishabula akalema,+ kabili mukaletuulila pamo ne mituulo ya iko iya myangashi.
Amafutunoti
^ Nelyo “aka kutalalika umutima.”
^ E kutila, ukutendeka ilyo akasuba kawa ukufika ilyo kwatendeka ukufiita.
^ Muli oma imo mwaleingila ifingengila mu cipe ica malita ukucilako panono pali yabili. Moneni Ifyebo Fyalundwako pa B14.
^ Amakapu 12 e yaleingila muli hini imo. Moneni Ifyebo Fyalundwako pa B14.
^ Nelyo “aka kutalalika umutima.”
^ Nelyo “aka kutalalika umutima.”
^ E kutila, ukutendeka ilyo akasuba kawa ukufika ilyo kwatendeka ukufiita.
^ Mu ciHebere, “imyeshi yenu.”
^ Nelyo “aka kutalalika umutima.”
^ Mu ciHebere, “umukate.”
^ Nelyo “aka kutalalika umutima.”
^ Nelyo “aka kutalalika umutima.”
