Impendwa 30:1-16
30 Lyena Mose aebele abakalamba ba mikowa+ ya bena Israele ati: “Ifi e fyo Yehova alandile:
2 Umuntu nga alapa umulapo+ kuli Yehova nangu nga alapa umulapo+ wa kuipusula fimo, afwile ukucita ifyo alapile.+ Alingile ukucita fyonse ifyo alapile ukuti akacita.+
3 “Kabili umwanakashi nga alapa umulapo kuli Yehova nelyo nga alapa umulapo wa kuipusula fimo ilyo ali umwaice kabili acili aleikala mu ng’anda ya kwa wishi,
4 kabili wishi aishiba ukuti alilapa umulapo nelyo alilapa umulapo wa kuipusula fimo* lelo tamukeenye, ninshi alingile ukufishapo imilapo yakwe yonse, kabili afwile ukufishapo no mulapo onse uwa kuipusula fimo uo alapile.
5 Lelo wishi nga amukaanya ilyo aishiba ukuti nalapa imilapo nelyo imilapo ya kuipusula fimo, ninshi talingile ukufishapo iyo imilapo. Yehova akamweleela, pantu wishi alimukeenye.+
6 “Lelo nga aupwa ninshi alilapa kale nelyo aupwa ninshi alilaya ukuti akacita fimo ifyo ashatontonkenyepo bwino ilyo alelaya,
7 kabili umulume wakwe aishiba ukuti alilapa, lelo tamukeenye pa bushiku aishiba ukuti alilapa, ninshi afwile ukufishapo imilapo yakwe nelyo imilapo ya kuipusula fimo iyo alapile.
8 Lelo nga ca kuti umulume wakwe amukaanya pa bushiku aishiba ukuti alilapa, ninshi afuuta umulapo wakwe nelyo ifyo alaile ukuti akacita ifyo ashatontonkenyepo bwino ilyo alelaya,+ kabili Yehova akamweleela.
9 “Nomba nga ni mukamfwilwa nelyo umwanakashi uo baleka e walapa umulapo, ninshi alingile ukufishapo fyonse ifyo alapile.
10 “Lelo nga ca kuti umwanakashi alapa umulapo nelyo alapa umulapo wa kuipusula fimo ninshi alyupwa,
11 kabili umulume wakwe aishiba ukuti alilapa kabili tamukeenye, ninshi afwile ukufishapo imilapo yakwe yonse nelyo umulapo wa kuipusula fimo.
12 Lelo nga ca kuti umulume wakwe amukaanya pa bushiku aishiba ukuti alilapa, ninshi afuuta imilapo yonse iyo umukashi wakwe alapile nelyo umulapo wa kuipusula fimo uo alapile.+ Talingile ukufishapo iyo imilapo pantu ninshi umulume wakwe alifuuta iyo imilapo, kabili Yehova akamweleela.
13 Umulume wakwe e ufwile ukumusuminisha nelyo ukumukaanya ukufishapo umulapo onse nelyo umulapo onse uwa kuipusula fimo.*
14 Lelo nga ca kuti inshiku shileya fye ukwabula ukuti umulume wakwe amukaanye, ninshi nasuminisha imilapo yakwe yonse nelyo imilapo yonse iya kuipusula fimo iyo alapile. Nasuminisha iyi imilapo pantu ilyo amumfwile alelapa, tamukeenye.
15 Lelo nga afuuta imilapo pa numa ya bushiku aumfwile umukashi wakwe alelapa, ninshi e ukaba no mulandu pa cilubo ca mukashi.+
16 “Aya e mafunde ayo Yehova apeele Mose ayakumine umulume no mukashi, kabili ayakumine wishi no mwana wakwe umukashana uucili ekala mu ng’anda ya kwa wishi.”
