Impendwa 31:1-54
31 Nomba Yehova aebele Mose ati:
2 “Kanda+ abena Midiani pa kuti ulandwileko abena Israele.+ Pa numa ukafwa nge fyafwa abantu bobe.”+
3 E ico Mose aebele abantu ati: “Pangasheni abantu aba kuyalwa inkondo na bena Midiani pa kuti balandwileko abena Israele nga fintu Yehova alandile.
4 Mu mukowa umo na umo uwa bena Israele mufwile ukubulamo abantu 1,000 aba kuyalwa inkondo.”
5 E ico mu bena Israele abali amakana na makana+ basalilemo abantu 1,000 mu mukowa umo na umo. Bonse abo basalile aba kuyalwa inkondo bali 12,000.
6 Lyena Mose atumine abantu 1,000 mu mukowa umo na umo ukuya mu kulwa inkondo. Abatumine pamo na Finehasi+ umwana wa kwa Eleasari shimapepo, kabili asendele ifipe fya mushilo na mapenga ya kulisha+ pa kulwa inkondo.
7 Bailelwa na bena Midiani nga filya fine fye Yehova aebele Mose, kabili balipeye abaume bonse.
8 Balipeye ne mfumu 5 isha bena Midiani, e kutila Ebi, Rekemu, Suri, Huri na Reba. Balipeye na Balaamu+ umwana wa kwa Beore ku lupanga.
9 Lelo abena Israele basendele abanakashi ba ku Midiani na bana babo pa kuti bayeba bankole. Kabili basendele ne fitekwa fyabo fyonse, imikuni yabo yonse na fyonse ifyo bakwete.
10 Baocele ne misumba yabo yonse iyo baleikalamo ne nkambi shabo shonse isha malinga.
11 Kabili balisendele ifintu fyonse, abantu ne fitekwa.
12 Lyena abo basendele babatwele kuli Mose na kuli Eleasari shimapepo na ku lukuta lwa bena Israele ku nkambi mu ciswebebe ca Moabu,+ mupepi na Yordani mu Yeriko. Balitwele ne fintu ifyo bafumishe ku Midiani.
13 Lyena Mose na Eleasari shimapepo ne ntungulushi shonse isha lukuta, baile mu kukumana nabo kunse ya nkambi.
14 Lelo Mose alifuliilwe abaume abaletungulula abashilika, bacilolo ba bantu amakana na bacilolo ba bantu imyanda abalebwela ku nkondo.
15 Mose abebele ati: “Cinshi mushipaile abanakashi bonse?
16 Moneni! Aba bene e bo Balaamu aebele ukuti babeleleke abena Israele pa kuti babembukile+ Yehova pa mulandu wa kwa Peore.+ Ifi fyalengele ukuti icikuko ciise pa lukuta lwa kwa Yehova.+
17 E ico nomba mufwile ukwipaya abana bonse abaume, no mwanakashi onse uwalaalapo no mwaume.
18 Lelo mwi-ipaya abakashana bonse abashalaalapo na baume.+
19 Kabili mufwile ukwikala kunse ya nkambi pa nshiku 7. Onse uwipeye umuntu* nelyo onse uukumishe umuntu bepeye+ alingile ukuisangulula+ pa bushiku bwalenga shitatu na pa bwalenga 7. Ifi e fyo mufwile ukucita pamo na bo musendele ukuyaba bankole.
20 Kabili mulingile ukusangulula ifya kufwala fyonse, ifipe fyonse ifya mpapa, fyonse ifyo bapangila na masako ya mbushi ne fipe fyonse ifya fimuti.”
21 Lyena Eleasari shimapepo aebele abaume abaile ku nkondo ati: “Ili e funde ilyo Yehova apeele Mose,
22 ‘Golde, silfere, umukuba, icela, kapotwe no mutofwe,
23 fyonse ifingalopololwa mu mulilo, e fyo mukapishe mu mulilo, kabili fikasangululwa. Lelo mulingile no kufisangulwila na menshi ya kusangulwilako.+ Fyonse ifyo mushingalopolwela mu mulilo, mufwile ukufipisha mu menshi.
24 Kabili mufwile ukuwasha ifya kufwala fyenu pa bushiku bwalenga 7, e lyo mukaba abasanguluka. Pa numa kuti mwaingila mu nkambi.’”+
25 Lyena Yehova aebele Mose ati:
26 “Penda fyonse ifyo baletele, kumo na bankole ne fitekwa. Pa kupenda ube na Eleasari shimapepo na bakalamba ba mikowa ya mu lukuta.
27 Wakanye ifyo baletele pabili, fimo upeele abaile ku nkondo e lyo fimbi upeele ulukuta lonse.+
28 Ku bashilika abaile ku nkondo ufwile ukupokako umutuulo* wa kupeela Yehova. Pa bantu 500 ufwile ukubuulapo umuntu* umo, pa ng’ombe 500 ufwile ukubuulapo imo, pa mpunda 500 ufwile ukubuulapo imo e lyo na pa mpaanga 500 ufwile ukubuulapo imo.
29 Ufwile ukubuula pa fyo ubakenye kabili upeele Eleasari shimapepo pa kuti fibe umutuulo wa kwa Yehova.+
30 Pa fyo wakenye abena Israele, pa bantu 50 ufwile ukubuulapo umo, pa ng’ombe 50 ufwile ukubuulapo imo, pa mpunda 50 ufwile ukubuulapo imo, pa mpaanga 50 ufwile ukubuulapo imo, na pa misango yonse iya fitekwa ufwile ukubuulapo cimo cimo, kabili upeele abena Lebi+ ababombela pe tenti lya mushilo ilya kwa Yehova.”+
31 E ico Mose na Eleasari shimapepo bacitile filya fine fye Yehova aebele Mose.
32 Pa fyo abantu abaile ku nkondo baletele pali impaanga 675,000,
33 ing’ombe 72,000
34 ne mpunda 61,000.
35 Abanakashi* abashatalile abalaalapo na baume+ bali 32,000.
36 Impaanga isho bapeele abaile ku nkondo shali 337,500.
37 Impaanga isho batuulile Yehova pali ishi impaanga shali 675.
38 Ne ng’ombe isho babapeele shali 36,000, kabili isho batuulile Yehova pali ishi ng’ombe shali 72.
39 Ne mpunda shali 30,500, kabili isho batuulile Yehova pali ishi mpunda shali 61.
40 Na bantu* bali 16,000, kabili abo bapeele Yehova pali aba bali 32.
41 Lyena Mose apeele Eleasari shimapepo+ uyu mutuulo wa kwa Yehova, nga filya fine fye Yehova aebele Mose.
42 Pali filya Mose apeele abena Israele, ifyo abakenye na baume abaile ku nkondo pali,
43 impaanga 337,500,
44 ing’ombe shali 36,000,
45 impunda shali 30,500
46 kabili abantu* bali 16,000.
47 Lyena pa fyo bapeele abena Israele, pa bantu 50 Mose abuulilepo umo, pa nama 50 abuulilepo imo imo, kabili apeele abena Lebi+ abalebombela pe tenti lya mushilo ilya kwa Yehova,+ nga filya fine fye Yehova aebele Mose.
48 Lyena abaume abo basalile ukulatungulula amabumba ya bashilika,+ bacilolo ba bantu amakana na bacilolo ba bantu imyanda baile kuli Mose,
49 kabili bamwebele abati: “Fwe babomfi benu natupenda abashilika abo tutungulula kabili tapabuliile umuntu nangu umo pali ifwe.+
50 E ico lekeni tuletele Yehova umutuulo pali conse ico cila muntu asangile, ifipe fya golde, amakoosa ya ku molu, amakoosa ya ku maboko, inindaminwe sha kufwatikilako, amasikiyo, no twa kuiyemfeshako tumbi, pa kuti tuifutile kuli Yehova.”
51 E ico Mose na Eleasari shimapepo balipokele golde no twa kuiyemfeshako tonse kuli bena.
52 Golde yonse iyo bacilolo ba bantu amakana na bacilolo ba bantu imyanda batuulile Yehova yali amashekele* 16,750.
53 Abaume bonse abaile ku nkondo balibuulilepo pa fintu ifyo bafumishe ku Midiani.
54 Mose na Eleasari shimapepo bapokele golde kuli bacilolo ba bantu amakana na kuli bacilolo ba bantu imyanda kabili baitwele mwi tenti lya kukumaninamo na Lesa pa cinso ca kwa Yehova pa kuti abena Israele baleibukisha ifyo abafwile.
Amafutunoti
^ Nelyo “umweo.”
^ Nelyo “umusonko.”
^ Nelyo “umweo.” Moneni Amashiwi ya mu Baibo ne fyo Yapilibula.
^ Nelyo “imyeo.”
^ Nelyo “imyeo ya bantu yali.”
^ Nelyo “imyeo ya bantu yali.”
^ Ishekele limo lyalefina amagramu ukucilako panono pali 11. Moneni Ifyebo Fyalundwako pa B14.
