Impendwa 5:1-31
5 Yehova akonkenyepo ukweba Mose ati:
2 “Eba abena Israele ukuti balefumya mu nkambi onse uwa fibashi+ na onse uuletonya fimo ku fya mfwalo+ na onse uwakowela pa mulandu wa kwikata umuntu* uwafwa.+
3 Nampo nga mwaume nelyo mwanakashi mufwile ukumufumisha kunse. Mulingile ukulabafumisha kunse ya nkambi pa kuti belakowesha+ inkambi sha bantu abo njikala nabo.”+
4 E ico abena Israele balicitile ifi fine kabili balibafumiishe kunse ya nkambi. Filya fine Yehova aebele Mose, e fyo abena Israele bacitile.
5 Kabili Yehova aebele Mose ati:
6 “Eba abena Israele auti, ‘Umwaume nangu umwanakashi nga acita ulubembu lumo pa membu shonse isho abantunse bacita ica kuti babembukila Yehova, ninshi uyo muntu* ali no mulandu.+
7 Afwile ukusokolola+ ulubembu ulo acitile, kabili akalete icifuta mulandu icakumanina, kabili pali cila fintu 5 ifya cifuta mulandu akalundepo cimo.+ Alingile ukupeela uo alufyenye.
8 Lelo nga ca kuti uo alufyenye alifwa kabili takuli lupwa wakwe uo engapeela icifuta mulandu, ninshi akapeelelemo Yehova kabili cikaba ca kwa shimapepo, pamo ne mpaanga iilume iyo shimapepo akamufutilako umulandu.+
9 “‘Umutuulo onse uwa mushilo+ uo abena Israele bakalaleta kuli shimapepo ukalaba wakwe.+
10 Fyonse ifya mushilo ifyo umuntu atuula fikalaba fya kwa shimapepo. Conse ico umuntu apeela shimapepo, cikalaba ca kwa shimapepo.’”
11 Yehova aebele Mose no kuti:
12 “Eba abena Israele auti, ‘Ifi e fyo mulingile ukucita nga ca kuti umukashi ayalukila umulume wakwe kabili tali uwa cishinka kuli ena
13 kabili umwaume umbi alaala nankwe,+ lelo umulume wakwe teshibe kabili atwalilila fye ukufisa, kabili aikowesha nomba takuli kambone wa kumushinina, kabili takuli uumusanganishe:
14 Umulume wakwe nga aba no bufuba kabili alatunganya umukashi wakwe ukuti nacita ubucende, e lyo ninshi ca cine naikowesha, nelyo umulume aba no bufuba kabili alatunganya umukashi ukuti nacita ubucende, e lyo ninshi taikoweseshe,
15 umulume afwile ukutwala umukashi wakwe kuli shimapepo, pamo no mutuulo wa mukashi wakwe, oma imo* iya buunga bwa barle. Talingile ukwitilapo amafuta nangu ukubikapo ububani bwabuuta, pantu uyu mutuulo wa bufuba, uwa kwibukishishako ulubembu.
16 “‘Shimapepo akamwiminike pa ntanshi ya kwa Yehova.+
17 Shimapepo akabike amenshi ya mushilo mu cipe ce bumba, akabuule ne loba panshi ye tenti lya mushilo kabili akalibike mu menshi.
18 Kabili shimapepo akemike umwanakashi uyo pa cinso ca kwa Yehova no kukakula umushishi wakwe e lyo akabike mu ndupi sha uyo mwanakashi umutuulo wa kwibukishishako, e kutila umutuulo wa bufuba uwa barle,+ kabili shimapepo akekate icipe umuli amenshi yalula ayaleta icitiipu.+
19 “‘Lyena shimapepo akalenge umwanakashi akalape, akamwebe ati: “Nga ca kuti tawalaalapo no mwaume umbi ninshi ucili walyupwa*+ kabili nga ca kuti tawa-alukila umulume obe kabili nga tawaikowesha, aya amenshi ayalula ayaleta icitiipu yekucita nangu cimo.
20 Lelo nga walyalukila umulume obe ilyo ucili mu minwe yakwe kabili nga wali-ikowesha kabili walilaalapo no mwaume uushili mulume obe—”+
21 Lyena Shimapepo akalenge umwanakashi akalape umulapo wa citiipu, kabili shimapepo akebe umwanakashi ati: “Shi Yehova alenge abantu bobe balekulumbula pa kulapa umulapo wa citiipu pantu Yehova alalenga itanta* lyobe licepe,* ne fumo lyobe lifimbe.
22 Aya menshi ayaleta icitiipu yaleingila mu mala yobe pa kuti ifumo lyobe lifimbe ne tanta* lyobe licepe.”* Lyena umwanakashi afwile ukulanda ati: “Ameni! Ameni!”*
23 “‘E lyo shimapepo akalembe ifi fitiipu mwi buuku kabili akafikuumwine mu menshi ayalula.
24 Lyena akebe uyo umwanakashi ukunwa amenshi yalula ayaleta icitiipu, kabili amenshi ayalula ayaleta icitiipu yakengila muli ena kabili yakalenga mu mala mukakalipe.
25 Kabili shimapepo akabuule umutuulo wa bufuba+ uwa barle uuli mu minwe ya mwanakashi kabili akausunshe uku no ku, pa cinso ca kwa Yehova, lyena akaupalamike ku ciipailo.
26 Shimapepo akabuulepo umutuulo mu lupi pa kuti ukeminineko umutuulo onse kabili akaufutumwine pa ciipailo,+ e lyo akebe umwanakashi ukunwa amenshi.
27 Umwanakashi nga anwa amenshi, nga ali-ikowesha kabili nga alilaalapo no mwaume umbi, amenshi ayalula ayaleta icitiipu yakengila muli ena, kabili ifumo lyakwe likafimba, ne tanta* lyakwe likacepa,* kabili abantu bakwe bakalamumona ukuti alitiipwa.
28 Nomba nga ca kuti umwanakashi taikowesha kabili alisanguluka, takakandwe kabili akalaimita, akalafyala na bana.
29 “‘Ili e funde lya pa bufuba,+ umwanakashi nga ayalukila umulume wakwe kabili nga aikowesha ilyo acili mu minwe ya mulume wakwe,
30 nelyo nga ca kuti umwaume aba no bufuba, kabili alatunganya ukuti umukashi wakwe alalaala no mwaume umbi; akatwale umukashi pa cinso ca kwa Yehova, kabili shimapepo akamucite ifyo ili ifunde lyalanda.
31 Umwaume takakwate umulandu, lelo umukashi wakwe nga ali no mulandu akakandwa.’”
Amafutunoti
^ Nelyo “umweo.” Moneni Amashiwi ya mu Baibo ne fyo Yapilibula.
^ Nelyo “umweo uli no mulandu.”
^ Muli oma imo mwaleingila ifingengila mu cipe ica malita ukucilako panono pali yabili. Moneni Ifyebo Fyalundwako pa B14
^ Mu ciHebere, “ilyo wali mu maboko ya mulume obe.”
^ Ili itanta, fya mfwalo.
^ Nelyo “lyonaike.” Ifi nalimo fyalolele mu kuti amaka ya bufyashi yapwe.
^ Ili itanta, fya mfwalo.
^ Nelyo “lyonaike.” Ifi nalimo fyalolele mu kuti amaka ya bufyashi yapwe.
^ Nelyo “Cibe ifyo fine! Cibe ifyo fine!”
^ Ili itanta, fya mfwalo.
^ Nelyo “lyonaike.” Ifi nalimo fyalolele mu kuti amaka ya bufyashi yapwe.