Impendwa 8:1-26
8 Yehova aebele Mose ati:
2 “Eba Aarone auti, ‘Nga wayasha inyali, inyali 7 shikalesanika pa ncende iili pa ntanshi ya ca kutekapo inyali.’”+
3 E ico Aarone acitile ifi: Ayashishe inyali pa kuti shisanike pa ncende iyali pa ntanshi ya ca kutekapo inyali,+ nga filya fine Yehova aebele Mose.
4 Ifi e fyo bapangile ica kutekapo inyali: Bacipangiile na golde ukubomfya sando; ukutendekela fye ku mukonso wa ciko ukufika fye na ku maluba ya ciko babomfeshe sando+ pa kucipanga. Ica kutekapo inyali bacipangile ukulingana ne cimonwa+ ico Yehova alangile Mose.
5 Kabili Yehova aebele Mose ati:
6 “Fumya abena Lebi mu bena Israele, kabili ubasangulule.+
7 Ifi e fyo ukacite pa kubasangulula: Ukabasanse amenshi ya kusangulwilako ulubembu, kabili bafwile ukubeya umushishi pa mibili yabo yonse, bakawashe ifya kufwala fyabo no kuisangulula.+
8 Lyena bakabuule ing’ombe iyana iilume+ pamo no mutuulo wa ngano+ uwa buunga ubwapeleka ubo basaakanyamo amafuta, kabili ukabuule ing’ombe na imbi iyana iilume ikabe umutuulo wa pa lubembu.+
9 Ukapalamike na bena Lebi pa ntanshi ye tenti lya kukumaninamo kabili ukalonganye ulukuta lonse ulwa bena Israele.+
10 Nga waleta abena Lebi+ pa cinso ca kwa Yehova, abena Israele bakabike iminwe pali bena.
11 Kabili Aarone alingile ukutuula* abena Lebi ngo mutuulo wa kusunsha+ uwa bena Israele pa cinso ca kwa Yehova, kabili bakalabomba umulimo wa kwa Yehova.+
12 “Lyena abena Lebi bakabike iminwe yabo pa mitwe ya ng’ombe ishilume.+ Pa numa, ukatuule ing’ombe imo ikabe umutuulo wa pa lubembu e lyo imbi ikabe umutuulo wa koca uwa kwa Yehova uwa kufutilako+ abena Lebi.
13 Kabili ukebe abena Lebi bakeminine pa ntanshi ya kwa Aarone na bana bakwe abaume kabili ukabatuule* ngo mutuulo wa kusunsha uwa kwa Yehova.
14 Ulingile ukupaatula abena Lebi pa bena Israele, kabili abena Lebi bakaba bandi.+
15 Pa numa abena Lebi bakese mu kubombela pe tenti lya kukumaninamo. Ifi e fyo ulingile ukubasangulula kabili e fyo ufwile ukubatuula* ngo mutuulo wa kusunsha.
16 Pantu bantu abo napeelwa pa bena Israele. Nkababuula pa kuti bakapyane pa mabeli* yonse aya bena Israele.+
17 Pantu ibeli lyonse ilya bena Israele lyandi, ibeli lya bantu ne beli lya nama.+ Naipaatwilile aya amabeli yonse pa kuti yabe yandi ilyo naipeye amabeli yonse mu calo ca Egupti.+
18 Nkabuula abena Lebi bonse bakapyane pa mabeli yonse aya bena Israele.
19 Aarone na bana bakwe abaume nkabapeela abena Lebi pa bena Israele, pa kuti bakalebombela abena Israele pe tenti lya kukumaninamo+ na pa kuti bakalebafutilako pa membu, pa kuti pa bena Israele pekesa icikuko pa mulandu wa kuti abena Israele+ bapalama ku cifulo ca mushilo.”
20 Ifi e fyo Mose na Aarone no lukuta lonse ulwa bena Israele bacitile pa bena Lebi. Abena Israele balicitile fyonse ifyo Yehova aebele Mose pa bena Lebi.
21 E ico abena Lebi bali-isangulwile no kuwasha ifya kufwala fyabo.+ Lyena Aarone alibatuulile* ngo mutuulo wa kusunsha pa cinso ca kwa Yehova.+ Pa numa Aarone alibafutileko pa membu pa kuti abasangulule.+
22 Pa numa ya ifi abena Lebi baile mu kubomba imilimo yabo pe tenti lya kukumaninamo na Lesa, kabili Aarone na bana bakwe abaume e balebangalila. Filya fine Yehova aebele Mose pa bena Lebi, e fyo bacitile pali bena.
23 Yehova nomba aebele Mose ati:
24 “Ifi e fyo mukalecita pa bena Lebi: Umwaume onse uwa myaka 25 no kuya pa muulu akaletendeka ukubombela pamo na babombela pe tenti lya kukumaninamo.
25 Lelo nga acila imyaka 50 alingile ukuleka ukubombela pamo na babombela pe tenti lya kukumaninamo.
26 Kuti ala-afwilishako fye bamunyina abakalabombela pe tenti lya kukumaninamo, lelo ena tafwile ukulabomba imilimo pe tenti lya kukumaninamo. Ifi e fyo ulingile ukucita pa bena Lebi na pa milimo yabo.”+
Amafutunoti
^ Mu ciHebere, “ukusunsha,” e kutila, ukulenga baya ku ntanshi kabili babwelela ku numa.
^ Mu ciHebere, “ukabasunshe,” e kutila, ukulenga baya ku ntanshi kabili babwelela ku numa.
^ Mu ciHebere, “ukubasunsha,” e kutila, ukulenga baya ku ntanshi kabili babwelela ku numa.
^ Nelyo “amabeli yonse ayabalilapo ukwisula icisa.”
^ Mu ciHebere, “alibasunshishe,” e kutila, ukulenga baya ku ntanshi kabili babwelela ku numa.
