Inyimbo sha Bulanda 2:1-22
א [Aleph]
2 Iye ifyo Yehova afimba umwana mwanakashi Sione ikumbi lya bukali bwakwe!
Nafumya ukuyemba kwa kwa Israele ku muulu, akupoosa pe sonde.+
Tebukishe icipuna ca makasa yakwe,+ mu bushiku bwa bukali bakwe.
ב [Beth]
2 Yehova namina incende shonse umo Yakobo ekala kabili tashumfwilile uluse.
Nabongolola imisumba ya malinga iya mwana mwanakashi Yuda ninshi nakalipa.+
Nawisha kabili nasaalula ubufumu+ ne ntungulushi sha mu Yuda.+
ג [Gimel]
3 Mu bukali bwakwe napwisha amaka yonse* aya kwa Israele.
Alifumishe ukuboko kwakwe ukwa ku kulyo pali ena ilyo umulwani aishile,+Kabili alepya ngo mulilo muli Yakobo ica kuti naoca fyonse.+
ד [Daleth]
4 Natinta* ubuta bwakwe ngo mulwani; natwimisha ukuboko kwakwe ukwa ku kulyo ngo mulwani;+Aleipaya bonse abo amenso yatemenwe.+
Kabili napongolwela ubukali bwakwe ngo mulilo+ mwi tenti lya mwana mwanakashi Sione.+
ה [He]
5 Yehova ali ngo mulwani.+Namina Israele.
Namina impungu shakwe shonse;Naonaula ififulo fyakwe fyonse ifyacingililwa.
Kabili nafusha ukuloosha no kulila mu mwana mwanakashi Yuda.
ו [Waw]
6 Naonaula insakwe yakwe+ nge ya mwi bala.
Nalenga umutebeto wakwe wapwa.*+
Yehova nalenga abantu mu Sione balaba umutebeto ne sabata,Kabili mu bukali bwakwe ubukalamba nasuula imfumu na shimapepo.+
ז [Zayin]
7 Yehova nakaana iciipailo cakwe;Nakaana icifulo cakwe ica mushilo.+
Nalenga abalwani bapoka ifibumba fya mpungu shakwe ishakosa.+
Nabasansula ishiwi lyabo mu ng’anda ya kwa Yehova,+ nga filya basansula pa bushiku bwa mutebeto.
ח [Heth]
8 Yehova napanga ukubongolola ilinga lya mwana mwanakashi Sione.+
Nafungulula intambo ya kupiminako.+
Taleseshe ukuboko kwakwe ukuleta* ubonaushi.
Kabili nalenga ifibumba ne linga fyaloosha.
Nalenga amaka ya fiko yapwa.
ט [Teth]
9 Impongolo shakwe nashiibila mu mushili.+
Naonaula no kukontola imipindo yakwe.
Imfumu yakwe ne ntungulushi shakwe baliya mu nko.+
Takuli ifunde;* nangu fye ni bakasesema bakwe tabalemona ifimonwa ifyo Yehova alenga bamona.+
י [Yod]
10 Abakalamba ba mwana mwanakashi Sione nabekala panshi kabili bali tondolo.+
Baleikuba ulukungu pa mitwe yabo kabili nabafwala insamu.+
Banacisungu ba mu Yerusalemu nabenamika imitwe yabo panshi.
כ [Kaph]
11 Amenso yandi nayanaka pa mulandu no kulila.+
Ifilundwa fyandi ifya mu mubili filekalipa.*
Ilibu lyandi nabalipongolwela panshi, pa mulandu wa kuti umwana mwanakashi wa bantu bandi* nawa,+Pa mulandu wa kuti abana abanono no tunya balefwa icipuupu mu mansa sha musumba.+
ל [Lamed]
12 Batwalilila ukwipusha banyinabo abati: “Ingano no mwangashi fili kwi?”+
Ilyo balefwa icipuupu ngo muntu uo bacenene mu mansa sha musumba,Ilyo baleleka umweo ninshi bali mu minwe ya banyinabo.
מ [Mem]
13 Ni cinshi nalabomfya nga kambone?Nelyo ni kuli cinshi nalakupashanyako, we mwana mwanakashi Yerusalemu?
Ni kuli cinshi nalakulinganyako pa kuti nkusansamushe, we mwana mwanakashi nacisungu Sione?
Pantu ukubongoloka kobe kwakula fye nga bemba.+ Nani uwingakundapa?+
נ [Nun]
14 Ifimonwa ifyo bakasesema balekumwena fyali fya bufi kabili tafyali kantu,+Kabili tabakwebele icilubo cobe pa kuti bekusenda ukuyaba nkole,+Lelo batwalilile ukukumwena ifimonwa fya bufi kabili balekweba amashiwi ya kukulufya.+
ס [Samekh]
15 Bonse abapita mu nshila yaba mupepi na iwe, balatoota pa kukupumya.+
Balalisha iminsoli ninshi balepapa,+ kabili balapukunishisha umwana mwanakashi Yerusalemu imitwe yabo, no kulanda abati:
“Bushe uyu e musumba uo balelandapo abati, ‘Waliyemba nga nshi kabili ulalenga abantu bonse aba pe sonde basekelela’?”+
פ [Pe]
16 Abalwani bobe bonse nabakwasamwina akanwa.
Balekulishisha umunsoli kabili balesumanya ameno no kulanda abati: “Natumumina.+
Ubu e bushiku twalelolela!+ Bwafika kabili twabumona!”+
ע [Ayin]
17 Yehova nacita ifyo apangile;+ nacita ifyo alandile,+Ifyo alandile kale sana.+
Nakonaula ukwabula ukukumfwila uluse.+
Nalenga umulwani obe asekelela pa fikucitikiile; nafusha amaka* ya balwani bobe.
צ [Tsade]
18 Umfwa we linga lya mwana mwanakashi Sione, imitima yabo ilelilila kuli Yehova.
Ifilamba nafilekonkoloka ngo mumana akasuba no bushiku.
Wituusha, wileka ilinso lyobe lituushe.*
ק [Qoph]
19 Ima! Lila ubushiku bonse.
Pongolola ifili mu mutima obe nga menshi pa ntanshi ya kwa Yehova.
Imisha amaboko yobe kuli ena pa kuti abana bobe befwa,Abana bobe abalefwa icipuupu pa makoona yonse aya misebo* pa mulandu wa cipowe.+
ר [Resh]
20 Moneni mwe Yehova, kabili lolesheni uo mwakanda.
Bushe abanakashi batwalilile ukulya abana babo,* abana babo abafyalwa abatuntulu?+Nelyo bushe bashimapepo na bakasesema balebepaila mu cifulo ca mushilo ica kwa Yehova?+
ש [Shin]
21 Umulumendo no mukote nabalambalala panshi mu misebo ninshi nabafwa.+
Banacisungu* bandi na balumendo bandi nabafwa ku lupanga.+
Namubepaya mu bushiku bwa bukali bwenu; namubepaya ukwabula ukubomfwila uluse.+
ת [Taw]
22 Mwaitile ifya kuntiinya ukufuma konse konse, nga filya beta abantu pa bushiku bwa mutebeto.+
Takuli nangu umo uwabutwike nelyo uwapuswike mu bushiku bwa bukali bwa kwa Yehova;+Umulwani wandi alipeye abo nafyele* kabili abo nakushishe.+
Amafutunoti
^ Mu ciHebere, “nakontola ulusengo lonse.”
^ Mu ciHebere, “Nanyanta.”
^ Nelyo “Naonaula umutebeto wakwe.”
^ Mu ciHebere, “ukumina.”
^ Nelyo “ifya kukonka.”
^ Amashiwi ya kuti umwana mwanakashi uwa bantu bandi tayalelanda pa muntu iyo, mashiwi ya mampalanya, nalimo ayalelanda pa kumfwila uluse nelyo pa kulangulukilako.
^ Mu ciHebere, “mu mala mulepota.”
^ Mu ciHebere, “naimya ulusengo.”
^ Mu ciHebere, “umwana mwanakashi wa linso lyobe atuushe.”
^ Mu ciHebere, “pa mitwe yonse iya misebo.”
^ Nelyo “ifisabo fyabo.”
^ Nelyo “Abakashana.”
^ Nelyo “abo nafyele abatuntulu.”
