Inyimbo sha Bulanda 3:1-66
א [Aleph]
3 Ndi muntu uwamonapo abantu balecula pa mulandu wa nkonto ya bukali bwakwe.
2 Nantamfya kabili nalenga naenda mu mfifi, talengele naenda mu lubuuto.+
3 Pa miku iingi alanguma ukuboko kwakwe akasuba konse.+
ב [Beth]
4 Nalenga umubili wandi ne nkanda yandi fyapwa;Natobaula amafupa yandi.
5 Nanshinga; nanshingulusha sumu iyabipisha+ no bucushi.
6 Nampatikisha ukwikala mu fifulo umwafiita, nga abantu abafwile kale.
ג [Gimel]
7 Nancilikila ne cibumba pa kuti nifuma;Nankakila amaceni ya mukuba ayafina.+
8 Kabili ilyo napunda mutuule, alakaana ukukutika* ipepo lyandi.+
9 Nacilika inshila shandi na mabwe ayo baputula;Nalenga imisebo yandi yaba iyashokana.+
ד [Daleth]
10 Nambelamina pa kuti ansanse nga bere, nge nkalamo iifiseme.+
11 Nampatikisha ukufuma mu nshila kabili nansantaula;*Nalenga nalekeleshiwa.+
12 Natinta* ubuta bwakwe, kabili ambikile nge ca kulasapo umufwi.
ה [He]
13 Andasa imifwi* ya mu ka cola kakwe mu mfyo.
14 Abantu bonse balanseka, akasuba konse nine bembapo mu nyimbo shabo.
15 Nampeela ifyalula ifingi nga nshi, kabili nalenga natwalilila ukunwa ifyalula sana.+
ו [Waw]
16 Nalenga insakalabwe shakombaula ameno yandi;Nalenga nala-alangana mu mito.+
17 Tamuleka naba no mutende;* nalilaba ifyo ubusuma bwaba.
18 E ico nanda nati: “Ubucindami bwandi nabupwa, kabili nshenekela nangu cimo kuli Yehova.”
ז [Zayin]
19 Ibukisheni ubucushi bwandi ne fyo nshakwata umwa kwikala.+ Ibukisheni ne fyalula sana na sumu iyabipisha.+
20 Nangu cibe shani mukebukisha* kabili mukakontamina pali ine.+
21 Nkebukisha ifi mu mutima wandi; e mulandu wine nkatekanishisha pa kumulolela.+
ח [Heth]
22 Ni pa mulandu wa kutemwa ukushipwa ukwa kwa Yehova e co tatulobele,+Pantu uluse lwakwe talupwa.+
23 Cila lucelo uluse lwakwe lulaba ulupya;+ muli ba cishinka lyonse.+
24 “Yehova e bupyani bwandi,”+ e fyo nalanda,* “e co nkatekanishisha pa kumulolela.”+
ט [Teth]
25 Yehova musuma ku muntu* uwa mucetekela,+ ku muntu uutwalilila ukumufwaya.+
26 Cisuma ukulolela ukupususha kwa kwa Yehova+ mu mutalalila.*+
27 Cisuma umuntu ukusenda ikoli ilyo acili umwaice.+
י [Yod]
28 Naekale eka kabili abe tondolo, ilyo Lesa abika ikoli pali ena.+
29 Nabike akanwa kakwe mu lukungu;+ nalimo kuti kwaba isubilo lya kuti akapusuka.+
30 Napeele uulemuuma itobo lyakwe; Naseebane nga nshi.
כ [Kaph]
31 Pantu Yehova takatupoose umuyayaya.+
32 Nangu alilenga twaba no bulanda, akatumfwila uluse pantu alikwatisha ukutemwa ukushipwa.+
33 Pantu tafwaya ukucusha abana ba bantu nelyo ukulenga baba no bulanda.+
ל [Lamed]
34 Lesa tafwaya ukuti umuntu ashonawile abafungwa bonse aba pe sonde mwi samba lya makasa yakwe,+
35 Tafwaya ukuti umuntu afyenga umuntu munankwe pa ntanshi ya Wapulamo,+
36 Tafwaya ukuti umuntu afyenga umuntu munankwe ilyo alelubulula,Yehova alipata ifya musango yu.
מ [Mem]
37 Nomba nani uwingalanda fimo ica kuti no kucitika fyacitika, ukwabula ukuti Yehova alenge ficitike?
38 Mu kanwa ka Wapulamo,Ifisuma tafifumina pamo ne fyabipa.
39 Cinshi umuntu engalailishanishisha pa fifuma mu lubembu lwakwe?+
נ [Nun]
40 Natutontonkanye sana pa fyo tucita,+ kabili natubwelele kuli Yehova.+
41 Natwimishe imitima yesu pamo na maboko yesu kuli Lesa ku muulu kabili tulande atuti:+
42 “Natubembuka kabili natumupondokela,+ lelo tamutubelele uluse.+
ס [Samekh]
43 Pa mulandu wa kuti mwalitufulilwa, mwalitucilikila pa kuti twi-isa kuli imwe;+Mwalitupepeka no kutwipaya, ukwabula ukutumfwila uluse.+
44 Mwalitucilikila ne kumbi, pa kuti amapepo yesu yefika kuli imwe.+
45 Mwalenga twaba ifiko kabili ifisooso mu nko.”
פ [Pe]
46 Abalwani besu bonse balatwasamwina utunwa twabo.+
47 Lyonse tulaba no mwenso kabili ifyabipa filatucitikila.+ Nabatonaula kabili nabatubongolola.+
48 Mu menso yandi mulekonkoloka ifilamba nge milonga ya menshi pa mulandu wa kubongoloka kwa mwana mwanakashi wa bantu bandi.+
ע [Ayin]
49 Amenso yandi tayaleleka ukulukusha ifilamba, tayaletuusha,+
50 Mpaka Yehova akaloleshe abantu bakwe ukufuma mu muulu.+
51 Amenso yandi nayalenga naba no bulanda* pa mulandu wa bana banakashi bonse aba mu musumba wandi.+
צ [Tsade]
52 Abalwani bandi balenunga nge cuni apabula umulandu.
53 Nabatalalika umweo wandi mu cilindi; tabalekele ukumpoosela amabwe.
54 Amenshi yapitile pa muulu wa mutwe wandi, kabili nalandile nati: “Nalafwa!”
ק [Qoph]
55 Nalilile kwi shina lyenu mwe Yehova, ninshi ndi mu cilindi icashika.+
56 Umfweni ishiwi lyandi; mwicilika ukutwi kwenu pa kuti mumfwe ifyo ndelila ukuti mungafwe.
57 Mwalipaleme mu bushiku nalilile kuli imwe. Mwanjebele amuti: “Witiina.”
ר [Resh]
58 Namundubulwilako umulandu* mu cilye, mwe Yehova, namulubula ubumi bwandi.+
59 Mwe Yehova namumona ifyabipa ifyo bancita; napaapaata mube no mulinganya pa kumpingula.+
60 Namumona fyonse ifyo bacita pa kunandula, namumona fyonse ifyo bapanga ukuncita.
ש [Sin] nelyo [Shin]
61 Mwe Yehova namumfwa ifyo balempumya, na fyonse ifyo bapanga ukuncita.+
62 Namumona imilomo ya bandwisha kabili namumfwa ifyo batepeleshanya pali ine akasuba konse.
63 Balolesheni; nga nabekala nelyo nga nabeminina balampumya mu nyimbo bemba.
ת [Taw]
64 Mwe Yehova, mukabakanda ukulingana ne fyo bacita.
65 Mukalenga bakabe ne mitima ya bucintomfwa, e citiipu mukabapeela.
66 Mukabapepeka ninshi namukalipa kabili mukabalofya mwi samba lya myulu ya kwa Yehova.
Amafutunoti
^ Nelyo “alacilikila; alesalila.”
^ Nelyo kuti yapilibula no kuti, “nalenga nalaala fye panshi ukwabula ukucita nangu cimo.”
^ Mu ciHebere, “Nanyanta.”
^ Mu ciHebere, “abana abaume.”
^ Nelyo “umweo wandi waba no mutende.”
^ Nelyo “umweo wenu ukebukisha.”
^ Nelyo “e fyo umweo wandi walanda.”
^ Nelyo “ku mweo.”
^ Nelyo “ukutekanya ilyo tulelolela.”
^ Nelyo “nayalenga umweo wandi waba no bulanda.”
^ Nelyo “Namundubulwilako umulandu wa mweo wandi.”
