Ukulingana ne fyo Luka Ailembele 1:1-80

TINIKENI

Alembela Teofile (1-4)
Gabriele asobela ukufyalwa kwa kwa Yohane Kabatisha (5-25)
Gabriele asobela ukufyalwa kwa kwa Yesu (26-38)
Maria atandalila Elisabete (39-45)
Maria alumbanya Yehova (46-56)
Yohane afyalwa bamwinika ne shina (57-66)
Sekaria asobela (67-80)

1 Pa mulandu wa kuti namwene ukuti abengi balilemba ilyashi umwaba amashiwi ya cine ayo na ifwe twacetekela,+ ² nga filya fine abaliko ukufuma pa kutendeka+ kabili abalebila icebo ca kwa Lesa batwebele,+ ³ na ine apo nalifwailisha ifi fyebo bwino bwino ukufuma pa kutendeka, natile nkulembele ukulingana ne fyo fyakonkana, we Teofile,+ we wacindama nga nshi, ⁴ pa kuti wishibe bwino bwino ukuti ifyo bakushimikila fya cine.+ ⁵ Mu nshiku sha kwa Herode,*+ imfumu ya Yudea, kwali shimapepo umo ishina lyakwe ni Sekaria, uwa mwi bumba lya bashimapepo ilyo baleita ukuti Abiya.+ Kabili umukashi wakwe afumine mu bana banakashi ba kwa Aarone, ne shina lyakwe ali ni Elisabete. ⁶ Bonse babili bali abalungama mu menso ya kwa Lesa, kabili balekonka amafunde ya kwa Yehova* yonse na fyonse ifyo abebele ukuti e fyo balingile ukulacita. ⁷ Lelo tabakwetepo umwana, pantu Elisabete talekwata abana, kabili bonse babili balikotele. ⁸ Nomba ilyo cafikiile ibumba Sekaria alimo ukubomba,+ ninshi alebomba bushimapepo pa cinso ca kwa Lesa, ⁹ yalifikile inshita yakwe iya kwingila mwi tempele lya kwa Yehova*+ pa kuti afutumune ububani+ nga fintu bashimapepo balecita lyonse. ¹⁰ Kabili abantu abengi bali panse balepepa pantu yali ni nshita ya kufutumuna ububani. ¹¹ Sekaria amwene malaika wa kwa Yehova* naiminina ku mbali ya ciipailo ca bubani. ¹² Nomba Sekaria alisakamikwe pa fyo amwene, kabili alitiinine nga nshi. ¹³ Nomba malaika amwebele ati: “Witiina Sekaria, pantu Lesa naumfwa ukupaapaata kobe. Umukashi obe Elisabete akakufyalila umwana umwaume, kabili ukamwinike ati Yohane.+ ¹⁴ Ukasekelela kabili ukaba ne nsansa sana, na abantu abengi bakasekelela ilyo akafyalwa,+ ¹⁵ pantu akaba umukalamba mu menso ya kwa Yehova.*+ Lelo tafwile ukunwa umwangashi ne fya kunwa ifikola,+ kabili akaba no mupashi wa mushilo na lintu ashilafyalwa,*+ ¹⁶ kabili akalenga abana ba kwa Israele abengi bakabwelele kuli Yehova* Lesa wabo.+ ¹⁷ Akatangilila Lesa kabili akaba no mupashi na maka nga Eliya.+ Akalula imitima ya bashibo ica kuti ikaba nge ya bana.+ Na bashaba ne cumfwila bakaba na mano yene yene aya balungama, pa kuti akapekanishishe Yehova* abantu.”+ ¹⁸ E lyo Sekaria aebele malaika ati: “Kuti naishiba shani ukuti cine cine ifi fikacitika? Pantu ine ninkota, umukashi wandi na o nakota.” ¹⁹ Malaika na o amwaswike ati: “Nine Gabriele,+ uwiminina pa cinso ca kwa Lesa,+ kabili bantumine ukuti njise nande nobe no kuti nkwebe iyi mbila nsuma. ²⁰ Lelo mona! walaba cibulu kabili tawakulalanda mpaka no bushiku ifi fintu fikacitika, pantu tausumine amashiwi yandi ayakafikilishiwa ilyo inshita ikafika.” ²¹ Nomba abantu balelolela Sekaria, kabili balipapile pantu alikokwele sana mwi tempele. ²² Ilyo afumine alifililwe ukulanda nabo. Lyena balilwike ukuti alimwene icimonwa mwi tempele. Alelandila fye nabo ku minwe, pantu alilekele ukulanda. ²³ Ilyo inshiku shakwe isha kubomba umulimo wa mushilo shapwile, alibwelelemo ku mwakwe. ²⁴ Pa numa ya nshiku shimo umukashi wakwe Elisabete alimite, kabili talefuma pa ng’anda pa myeshi 5, pantu aleti: ²⁵ “Ifi e fyo Yehova* ancitila muli shino nshiku. Nanangulukilako pa kuti anseebululeko insoni ku bantu.”+ ²⁶ Mu mweshi walenga 6 ukutula apo aimitiile, Lesa atumine malaika Gabriele+ ku musumba wa mu Galili uo beta ukuti Nasarete. ²⁷ Amutumine kuli nacisungu+ uwakobekelwe ku mwaume uwe shina lya kuti Yosefe, uwatuntwike mu lupwa lwa kwa Davidi. Ishina lya kwa nacisungu ali ni Maria.+ ²⁸ Kabili ilyo aingile umwali Maria, amwebele ati: “Mwapoleni we wapaalwa nga nshi, Yehova* ali na iwe.” ²⁹ Lelo aya mashiwi yalimusakamike nga nshi, kabili aletontonkanya umo malaika aloseshe pa kumuposha ifi. ³⁰ E ico malaika amwebele ati: “Witiina Maria, pantu Lesa nakupaala. ³¹ Umfwa! ukemita no kufyala umwana umwaume,+ kabili ukamwinike ati Yesu.+ ³² Uyu akaba umukalamba+ kabili bakalamwita ati Umwana wa Wapulamo.+ Yehova* Lesa akamupeela icipuna ca bufumu ica kwa Davidi wishi,+ ³³ kabili akaba Imfumu umuyayaya pa ng’anda ya kwa Yakobo, no Bufumu bwakwe tabwakapwe.”+ ³⁴ Lelo Maria aebele malaika ati: “Bushe ifi mwalanda fikacitika shani, pantu nshatalalaalapo no mwaume?”+ ³⁵ Malaika na o amwaswike ati: “Umupashi wa mushilo ukesa pali iwe,+ na maka ya Wapulamo yakakufimba. E mulandu wine umwana uo ukafyala bakalamwitila ati uwa mushilo,+ Umwana wa kwa Lesa.+ ³⁶ Kabili umfwa! lupwa obe Elisabete, uo batila takwata abana, na o naimita umwana umwaume mu bukote bwakwe, kabili uno e mweshi walenga 6 ukutula apo aimitila; ³⁷ pantu fyonse ifyo Lesa alanda te kuti afilwe ukufifikilisha.”+ ³⁸ Lyena Maria alandile ati: “Moneni! ine ndi musha mwanakashi uwa kwa Yehova!* Nacibe ukulingana ne fyo mwalanda.” Kabili malaika aliile. ³⁹ E ico muli shilya nshiku Maria alyangufyenye ukwima no kuya ku citungu ca mpili, mu musumba wa mu Yuda, ⁴⁰ kabili aingile mu ng’anda ya kwa Sekaria aposha na Elisabete. ⁴¹ Nomba ilyo Elisabete aumfwile Maria amuposha, umwana uwali mwi fumo lyakwe alisunkeene, kabili umupashi wa mushilo waishile pali Elisabete, ⁴² kabili abilikishe ishiwi ilikalamba ati: “Walipaalwa pa banakashi bonse, kabili umwana uo ukafyala na o alipaalwa! ⁴³ Nine nani ne wa kuti nyina wa kwa Shikulu antandalile? ⁴⁴ Pantu mona! ilyo wacimposha fye, umwana mwi fumo acisunkaana pa mulandu wa nsansa. ⁴⁵ Alipaalwa umwanakashi uwasumina ifyo bamweba, pantu fyonse ifyo Yehova* amweba fikacitika.” ⁴⁶ Na o Maria alandile ati: “Umweo wandi ulelumbanya* Yehova,*+ ⁴⁷ no mutima wandi te kuti ukaane ukusansamukila nga nshi Lesa Umupusushi wandi,+ ⁴⁸ pantu nalolesha pa musha wakwe umwanakashi+ nangu ca kutila muntu yaweyawe. Pantu moneni! abantu ba mu nkulo shonse bakalalanda ati nalishuka,+ ⁴⁹ pantu Lesa wa maka nancitila ifintu ifikalamba, kabili ishina lyakwe lya mushilo,+ ⁵⁰ kabili aba mu nkulo shonse abamutiina alabomfwila uluse.+ ⁵¹ Alicita ifya maka ku kuboko kwakwe, alisalanganya abalanga ukuti bamatutumuko mu fyo bapanga mu mitima yabo.+ ⁵² Alikisha aba maka pa fipuna fya bufumu+ kabili alicindamika abalanda;+ ⁵³ alilenga abaali ne nsala baikuta ifisuma+ na baali ne fyuma alilenga baya iminwe nkutwa. ⁵⁴ Alyafwa umubomfi wakwe Israele, pantu alebukisha ifyo amulaile ukuti akatwalilila ukumumfwila uluse,+ ⁵⁵ nga filya fine aebele Abrahamu no mwana wakwe,*+ ifi fine e fyo aebele ifikolwe fyesu.” ⁵⁶ Maria alikele na Elisabete nalimo pa myeshi itatu, lyena alibwelelemo ku mwakwe. ⁵⁷ Nomba inshita yalifikile iya kuti Elisabete apaape, kabili afyele umwana umwaume. ⁵⁸ Kabili abena mupalamano na balupwa balyumfwile ifyo Yehova* alangile ukuti alimumfwilile uluse, kabili balisekelele pamo nankwe.+ ⁵⁹ Pa bushiku bwalenga 8, balishile mu kusembulula umwana,+ kabili balefwaya ukumwinika ishina lya kwa wishi ilya kuti Sekaria. ⁶⁰ Nomba nyina abebele ati: “Awe, tulemwinika ati Yohane.” ⁶¹ Lelo bamwebele abati: “Pa lupwa lobe tapabapo uwe shina lya kuti Yohane.” ⁶² Lyena baipwishe wishi ukubomfya iminwe ukuti abebe ishina alefwaya ukwinika umwana. ⁶³ E ico alombele ica kulembapo, e lyo alembapo ukuti: “Ishina lyakwe ni Yohane.”+ Na bantu bonse balipapile. ⁶⁴ Apo pene akanwa kakwe kaliswike no lulimi lwakwe lwalikakwike kabili atendeke ukulanda,+ alalumbanya na Lesa. ⁶⁵ Kabili abena mupalamano bonse balyumfwile umwenso, na bantu abaleikala mu citungu ca mpili ica Yudea balelanda pali ifi fyonse ifyacitike. ⁶⁶ Abantu bonse abaumfwile mu mitima yabo baleti: “Bushe uyu mwana akaba shani?” Pantu ukuboko kwa kwa Yehova* kwalimutungilile. ⁶⁷ Lyena umupashi wa mushilo waishile pali Sekaria wishi, na o aseseme ati: ⁶⁸ “Lekeni Yehova* Lesa wa kwa Israele acindikwe,+ pantu nalangulukilako abantu bakwe kabili nabalubula.+ ⁶⁹ Kabili natwimisha ulusengo lwe pusukilo*+ mu ng’anda ya mubomfi wakwe Davidi,+ ⁷⁰ nga filya fine alanda ukupitila muli bakasesema bakwe aba mushilo ukutula fye na kale;+ ⁷¹ alilaile ukuti akatupususha ku balwani besu na mu minwe ya bantu bonse abatupata;+ ⁷² akatumfwila uluse nga fintu alaile ifikolwe fyesu kabili akebukisha icipangano cakwe ica mushilo,+ ⁷³ umulapo uo alapile ku cikolwe cesu Abrahamu,+ ⁷⁴ pa kuti ilyo atulubula mu minwe ya balwani besu, atupeele ishuko lya kumubombela ukwabula umwenso ⁷⁵ na pa kuti inshiku shonse aletumona ukuti tuli ba cishinka kabili twalilungama. ⁷⁶ Lelo iwe we mwana, bakakwita ukuti kasesema wa Wapulamo, pantu ukatangilila Yehova* no kumupekanishisha inshila,+ ⁷⁷ pa kulenga abantu bakwe bakeshibe imbila nsuma ye pusukilo ukupitila mu kubabelela uluse pa membu shabo,+ ⁷⁸ pa mulandu wa luse lwa kwa Lesa wesu. Pa mulandu wa ulu luse, tukamona ulubuuto ulwafuma ku muulu nga lulya lubako ilyo akasuba katula, ⁷⁹ pa kuti lukasanikile abaikala mu mfifi na mu cinshingwa ca mfwa,+ na pa kuti lukatungulule amakasa yesu mu nshila ya mutende.” ⁸⁰ Uyu mwana alekulilako kabili umupashi wa kwa Lesa walelenga alekoselako. Aikele mu matololo mpaka ubushiku aisokolwele kuli Israele.