Ukulingana ne fyo Luka Ailembele 7:1-50
7 Ilyo apwishishe ukweba abantu ifyo alingile ukubeba, aingile mu Kapernahumu.
2 Nomba kwali umukalamba wa bashilika uwakwete umusha uo atemenwe nga nshi. Uyu musha alilwele sana ica kuti ali mupepi no kufwa.+
3 Ilyo umukalamba wa bashilika aumfwile ifyo abantu balelanda pali Yesu, atumine abakalamba ba baYuda ukuyamwita pa kuti ese ondape umusha wakwe.
4 Ilyo baishile kuli Yesu batendeke ukumupaapaata sana abati: “Uyu muntu nalinga ukuti mumwafwilishe,
5 pantu alitemwa uluko lwesu kabili e watukuliile ne sunagoge.”
6 E ico Yesu aliile nabo. Lelo ilyo alepalama ku ng’anda, ninshi umukalamba wa bashilika natuma kale ifibusa fyakwe abakuyaeba Yesu ukuti: “Mukwai nshilingile ukumupokelela mu ng’anda mu mwandi.+
7 E mulandu wine nacimwena ukutila nshilingile ukwisa kuli imwe. Lelo landeni fye amashiwi, no mubomfi wandi alapola.
8 Pantu na ine wine nalikwata abantungulula, nalikwata na bashilika abang’umfwila, kuti naeba umo nati, ‘Kabiye!’ na o aya, na umbi nati, ‘Isa!’ na o aisa, kabili kuti naeba umusha wandi nati, ‘Cita ici!’ na o acita.”
9 Ilyo Yesu aumfwile ifi, alipapile kabili apilibukile kwi bumba e lyo abeba ati: “Ndemweba nati, nshatala nsangapo umuntu uwaba ne citetekelo icikalamba nge ci nangu fye ni mu Israele.”+
10 Kabili ilyo abo atumine babwelele ku ng’anda, basangile umusha napola.+
11 Pa numa fye ya ifi, aile ku musumba uo beta ati Naini, kabili abasambi bakwe ne bumba ilikalamba baile nankwe.
12 Ilyo apaleme pa mpongolo ya musumba, moneni! kwali umuntu uwafwile uo baletwala kunse ya musumba. Uyu e mwana fye uo nyina akwete.+ Nyina wa uyu mwana ali ni mukamfwilwa. Kabili ibumba ilikalamba ilyafumine mu musumba lyali no yu mukamfwilwa.
13 Ilyo Shikulu amumwene, alimumfwilile uluse,+ kabili amwebele ati: “Leka ukulila.”+
14 Kabili alipaleme aikata na ku musengele apaleele umulumendo uwafwile, na basendele umusengele* baliminine, lyena alandile ati: “We mulumendo, ndekweba nati, ima!”+
15 No mulumendo uwafwile alimine atendeka no kulanda, e lyo Yesu amupeela kuli nyina.+
16 Nomba bonse balyumfwile umwenso, kabili balacindika Lesa abati: “Kasesema mukalamba naima muli ifwe,”+ balalanda no kuti, “Lesa naibukisha abantu bakwe.”+
17 Kabili ili ilyashi pali Yesu lyaile ululumbi mu Yudea monse na mu mishi yonse iyali mupepi.
18 Nomba abasambi ba kwa Yohane balimushimikile fyonse ifi.+
19 E ico Yohane aitile abasambi bakwe babili no kubatuma kuli Shikulu pa kuti bayemwipusha ati: “Bushe niwe Uli no Kwisa+ nelyo kuli umbi uo tufwile ukulolela?”
20 Ilyo bafikile kuli ena, balandile abati: “Yohane Kabatisha atutuma ukwisamwipusha ati, ‘Bushe nimwe Muli no Kwisa nelyo tufwile ukulolela umbi?’”
21 Muli ilya nshita alyundepe abantu abengi abali ne ntenda,+ na balwele amalwele ayakalamba, kabili alifumishe imipashi yabipa, alilengele ne mpofu ishingi shatampa ukumona.
22 Yesu abaswike ati: “Kabiyeni, muyeshimikila Yohane ifyo mulemona ne fyo muleumfwa: Impofu shilemona,+ abalemana bale-enda, aba fibashi balepola, bankomamatwi baleumfwa,+ abafwa balebuushiwa na bapiina baleshimikilwa imbila nsuma.+
23 Wa nsansa umuntu uushisanga ica kuipununako muli ine.”+
24 Ilyo abo Yohane atumine babwelelemo, Yesu atendeke ukweba amabumba pali Yohane ati: “Cinshi mwaile mu kumona mu matololo? Bushe litete ilyalepungaila ku mwela?+
25 Nomba cinshi mwaile mu kumona? Bushe muntu uwafwele ifya kufwala ifyanakilila?*+ Awe nakalya, pantu abafwala ifya kufwala ifyanakilila kabili abekala bwino, bekala mu masano ya shamfumu.
26 E co nani kanshi mwaile mu kumona? Bushe ni kasesema? Ndemweba icine cine nati, ena alicila na pali kasesema.+
27 Uyu e o balembelepo ukuti, ‘Moneni! Nkatuma inkombe yandi iikakutangilila,* iikakupekanishisha inshila ya kuti ukapitemo.’+
28 Ndemweba nati, pa bana bonse abo abanakashi bafyala tapatala apaba uwacila pali Yohane; lelo uwacepesha mu Bufumu bwa mu muulu alimucila.”+
29 (Ilyo abantu bonse na bakasonkesha ba misonko baumfwile ifi, balandile ukuti Lesa alilungama, pantu babatishiwe ulubatisho lwa kwa Yohane.+
30 Lelo abaFarise na baishiba sana Amafunde balisuulile amano ayo Lesa abapandile,*+ pantu balikeene ukuti Yohane ababatishe.)
31 “Ni kuli bani ningalinganya abantu ba muli iyi nkulo, kabili bapala bani?+
32 Baba nga bana abanono abekele pa maliketi balebilikishanya abati: ‘Natumulishisha imitoolilo, lelo tamucindile; natupumapo imisowa, lelo tamulilile.’
33 Ifi fine e fyo caba, Yohane Kabatisha alisa, talya umukate kabili tanwa umwangashi,+ lelo mutila: ‘Aba ne cibanda.’
34 Umwana wa muntu alisa, alalya no kunwa, lelo mutila: ‘Moneni! Uyu muntu muliili, alitemwisha umwangashi kabili ni cibusa wa bakasonkesha ba misonko na babembu!’+
35 Lelo ifisuma ififuma mu fyalungama ifyo umuntu acita e filanga ukuti wa mano.”+
36 Nomba umuFarise umo aikalile fye ukumweba ukuti ayelya nankwe ifya kulya. E ico aileingila mu ng’anda ya muFarise baikala nankwe na pe tebulo balalya.
37 Kabili moneni! umwanakashi uo abantu mu musumba baishibe ukuti mubembu alyumfwile ukuti Yesu ali mu ng’anda ya muFarise alelya, kabili alishile ne botolo* lya mafuta ayanunkila.+
38 Kabili ilyo aiminine ku numa ya kwa Yesu mupepi na makasa yakwe, atendeke ukulila alabomfya na makasa ya kwa Yesu ku filamba fyakwe kabili aleyakumuna no mushishi wa ku mutwe wakwe. Na kabili atomwene amakasa ya kwa Yesu e lyo aitulwilako amafuta ayanunkila.
39 Ilyo umuFarise uwaitile Yesu amwene ifi, atendeke ukutontonkanya ati: “Uyu muntu aba ni kasesema, nga naishiba ifyo umwanakashi uulemwikata aba, nga naishiba ukuti mubembu.”+
40 Lelo Yesu amwebele ati: “Simone pali ifyo ndefwaya ukukweba.” Na o atile: “Mwe Kasambilisha, landeni!”
41 “Kwali abantu babili abakongwele indalama ku ukongwesha indalama; umo akongwele amadenari* 500, e lyo umbi amadenari 50.
42 Nomba ilyo bonse babili bafililwe ukumubwesesha, alibabelele uluse. E ico nani pali aba babili uwingamutemwa sana?”
43 Simone ayaswike ati: “Kuti natila ni ulya abelele sana uluse.” Na o amwebele ati: “Ca cine.”
44 Lyena apilibukile ku mwanakashi, e lyo aeba Simone ati: “Bushe wamumona uyu mwanakashi? Ninjisa mu ng’anda yobe; lelo taumpeele amenshi ya kusamba amakasa yandi. Nomba uyu mwanakashi nabomfya amakasa yandi ku filamba fyakwe no kuyakumuna ku mushishi wakwe.
45 Tauntomwene, lelo ukutula apo njishiile uyu mwanakashi talekelepo ukutomona amakasa yandi.
46 Taunjitulwililile amafuta pa mutwe, lelo uyu mwanakashi nanjitulwila amafuta ayanunkila ku makasa.
47 Pa mulandu wa ici, ndekweba nati, imembu shakwe nangu shafula shani,* nashelelwa,+ pantu ukutemwa kwakwe kukalamba. Lelo uo baelela panono, no kutemwa kwakwe kuba ukunono.”
48 Lyena aebele umwanakashi ati: “Imembu shobe shaelelwa.”+
49 Abalelya nankwe pe tebulo batendeke ukulanshanya abati: “Bushe muntu wa musango shani uyu, uwa kuti ale-elela ne membu?”+
50 Lelo aebele umwanakashi ati: “Icitetekelo cobe cakupususha;+ kabiye umutende.”
Amafutunoti
^ Nelyo “umusengele apo balesendela ifitumbi.”
^ Nelyo “ifya kufwala ifisuma.”
^ Mu ciGriki, “iikaba pa ntanshi yobe.”
^ Nelyo “ifyo Lesa abebele.”
^ Mu ciGriki, “ibotolo lya alabastere.”
^ Moneni Ifyebo Fyalundwako pa B14.
^ Nelyo “nangu shakula shani.”
