Ukulingana ne fyo Marko Ailembele 16:1-8
-
Yesu abuushiwa (1-8)
16 E ico ilyo Isabata+ lyapwile, Maria umwina Magadala, Maria+ nyina wa kwa Yakobo, e lyo na Salome bashitile ifyanunkila pa kuti bayesuba umubili wa kwa Yesu.+
2 Kabili ku macaca pa bushiku bwa kubalilapo mu mulungu baile ku nshiishi. Bafikile ku nshiishi*+ ninshi na kasuba nakatula.
3 Kabili baile balelanshanya abati: “Nani alayatukunkulushishako ilibwe ukulifumya pa mwinshi wa nshiishi?”
4 Lelo ilyo bainwine amenso, bamwene ukuti ilibwe balilifumishepo kale, nangu ca kuti lyali likalamba nga nshi.+
5 Ilyo baingile mu nshiishi bamwene umulumendo naikala lubali ku kulyo nafwala ne ca kufwala icabuuta, e ico balipapile nga nshi.
6 Na o abebele ati: “Mwipapa.+ Ninjishiba mulefwaya Yesu umwina Nasarete uo baipaile pa cimuti. Nabuushiwa,+ tali muno. Moneni apo bamulalike.+
7 Nomba kabiyeni, muye-eba abasambi bakwe na Petro amuti, ‘Alemutangilila ku Galili.+ E ko mukayamumwena, nga filya fine amwebele.’”+
8 E ico ilyo bafumine mu nshiishi, balifulumwike ninshi baletutuma fye ku mwenso. Kabili tabaebeleko nangu umo ili lyashi, pantu bali no mwenso.*+
Amafutunoti
^ Nelyo “nshiishi ya cibukisho.”
^ Ukulingana na ma manyuskripti ya kubalilapo, amashiwi yaba mu cikomo 8 e yalekeleshako mu lyashi lya Imbila Nsuma ilyo Marko alembele. Moneni Ifyebo Fyalundwako pa A3.