Mika 1:1-16
1 Ifi e fyebo ifyo Yehova aebele Mika*+ uwa ku Moreshete, mu nshiku sha kwa Yotamu,+ Ahasi,+ na Hisekia,+ abali imfumu sha Yuda,+ kabili ifyo amwene mu cimonwa pali Samaria na pali Yerusalemu:
2 “Umfweni mwe bantu bonse!
Kutika we sonde na fyonse ifyaba muli iwe,Kabili lekeni Shikulu Mulopwe Yehova abe kambone uwa kumushinina+—Yehova ali mwi tempele lyakwe ilya mushilo.
3 Pantu moneni! Yehova alefuma mu cifulo cakwe;Akatentemuka no kunyantaula ififulo fya kupepelapo ifya pano isonde.
4 Impili shikasunguluka mwi samba lya makasa yakwe,+Kabili imipokapoka* ikapaatukanaCikaba kwati ni filya ciba nga babika ipula* ku mulilo,Kabili nga filya amenshi yatentemuka nga bayetulwila apatentemwike.
5 Icikalenga fyonse ifi, filubo ifyo Yakobo acita,Ne membu isho aba mu ng’anda ya kwa Israele bacita.+
Ni bani balenga ukuti Yakobo alecita ifi filubo?
Bushe te bena Samaria?+
Kabili ni bani bapanga ififulo fya kupepelapo mu Yuda?+
Bushe te ba mu Yerusalemu?
6 Nkalenga Samaria ikabe ifitantaala fya mu mpanga,Ifya kulimamo imyangashi;Nkapoosa* amabwe yakwe mu mupokapoka,Kabili nkasha imifula yakwe pa mbilibili.
7 Ifimpashanya fyakwe fyonse fikatobaulwa tupimfya tupimfya,+Kabili amalipilo yakwe yonse aya muli bucilende yakapya mu mulilo.+
Nkonaula no tulubi twakwe tonse.
Pantu fyonse ifi fintu bamulipile muli bucilende,Kabili fikaba malipilo ya bacilende na kabili.”
8 Ifi fikalenga nkalelila no kuloosha;+Nkenda ukwabula ukufwala indyato ne fya kufwala.+
Nkalalila nga bamumbwe,Kabili nkalaloosha nga bamwakatala.
9 Pantu impumo shakwe takuli uwingashundapa;+Nashifika na ku Yuda.+
Icikuko nacisalanganina mu mpongolo sha bantu bandi, ukufika ku Yerusalemu.+
10 “Tamufwile ukubilisha ifi mu Gati;Tamufwile ukuloosha.
Mukalealangana mu lukungu mu Beti-afra.*
11 Mwe bekala* mu Shafiri, iseni ubwamba kabili museebane.
Abekala* mu Sanaani tabafumine.
Aba mu Beti-esele bakalaloosha kabili bakaleka ukumutungilila.
12 Abekala* mu Marote balolela ifisuma,Lelo ifyabipa e fyo Yehova abatumina pa mpongolo ya Yerusalemu.
13 Mwe bekala* mu Lakishi,+ kulikeni iceleta kuli bakabalwe.
Nimwe mwabalilepo ukubembuka pa mwana mwanakashi Sione,Pantu nimwe mwabalilepo ukumpondokela pa ba mu Israele bonse.+
14 E ico mukapeela Moreshete-Gati ifya bupe fya kumufishapo.
Abekala mu Aksibu+ balecenjesha imfumu sha mu Israele.
15 Mwe bekala* mu Maresha,+ nkamutumina uwa kumucimfya.*+
Ubukata bwa bena Israele bukesafika fye na ku Adulamu.+
16 Sebeni amapala, kabili beyeni umushishi pa mulandu wa bana benu abo mwatemwa sana.
Kusheni amapala yenu yabe nga aya makubi,*Pantu abana benu nababasenda bunkole.”+
Amafutunoti
^ E fyo balemba ishina lya kuti Mikaele mu kwipifya (ilyalola mu kuti “Nani waba nga Lesa?”) nelyo Mikaya, (ilyalola mu kuti “Nani Waba nga Yehova?”).
^ Nelyo “impanga iyabatama.”
^ Nelyo “wakisi.”
^ Mu ciHebere, “Nkapongolwela.”
^ Nelyo “mu ng’anda ya kwa Afra.”
^ Mu ciHebere, “abekashi abanakashi.”
^ Mu ciHebere, “Abekashi abanakashi.”
^ Mu ciHebere, “abekashi abanakashi.”
^ Mu ciHebere, “Mwe bekashi abanakashi.”
^ Mu ciHebere, “Mwe bekashi abanakashi.”
^ Nelyo “uwa kumupoka fyonse ifyo mwakwata.”
^ Ishiwi lya ciHebere ilyo bapilibula ukuti amakubi kuti lyapilibula no kuti bakapumpe.
