Ulwimbo lwa Nyimbo 5:1-16
5 “Naingila mwi bala lyandi,+We nkashi yandi, we nabwinga wandi.
Nasenda ifinyamuti fyandi ifya muri* ne fyanunkila bwino.+
Nalya ubuci bwandi kumo ne fipeepe;Nanwa umwangashi wandi no mukaka wandi.”+
“Lyeni, mwe batemwana!
Nweni no kukolwa icitemwiko!”+
2 “Ilyo ndi mu tulo, umutima wandi wena ulelola.+
Naumfwa umutemwikwa wandi, alekonkonsha!
‘Njiswilako, we nkashi yandi, we mutemwikwa wandi,We nkunda yandi, we wabula akalema!
Umutwe wandi naubomba ku mume,Ifikuti fyandi nafibomba ku mume wa bushiku.’+
3 Nimfuula ilaya lyandi.
Bushe mfwile ukulifwala na kabili?
Ninsamba amakasa yandi.
Bushe mfwile ukuyalamfya na kabili?
4 Umutemwikwa wandi afumya ukuboko pa cipunda ca mu ciibi,Kabili natendeka ukumufuluka.
5 Nalimine mu kwiswila umutemwikwa wandi,Ku maboko yandi kwaletona muri,*Kabili iminwe yandi yaletonya muri,*Yaletonena ku fya kukomenako iciibi.
6 Naliswilile umutemwikwa wandi,Lelo umutemwikwa wandi ninshi nabwelelamo kale, naya.
Nalyumfwile ububi* ilyo aile.*
Nalimufwaile, lelo nshamusangile.+
Nalimwitile, awe te wa kwasuka nakalya.
7 Abalelonda mu musumba balinsangile.
Balingumine, balincenene.
Abalelonda amalinga balimpokele ica kufimbana* candi.
8 Mwe bana banakashi ba mu Yerusalemu, ndemweba nati lapeni:
Nga mwasanga umutemwikwa wandi,Mumwebe amuti nindwala icitemwiko.”
9 “Bushe umutemwikwa obe acila shani abaume bambi,We wayemba ukucila abanakashi bonse?
Bushe umutemwikwa obe acila shani abaume bambi,Pa kuti utwebe ukulapa umulapo wa musango yu?”
10 “Umutemwikwa wandi musuma nga nshi kabili alikashikila;Alicila abaume 10,000.
11 Umutwe wakwe ni golde, golde iisuma nga nshi.
Umushishi wakwe waba nge misambo ya tuncindu,*Umushishi wakwe wafiita nga mwankole.
12 Amenso yakwe yaba kwati ni nkunda ishili mu mbali ya milonga,Ishilesamba mu mukaka,Ishikele mu mbali ya cishiba icaisulamo amenshi.*
13 Amasaya yakwe yaba kwati luputa lwa filimwa ifinunkila bwino,+Yaba kwati ni mputa umwamena ifya kusuba ifyanunkila bwino.
Imilomo yakwe maluba, ayatonya muri.*+
14 Iminwe yakwe iya bulungana ya golde, iyo babikako krusoliti.*
Ulufumo lwakwe lwabeeka nga meno ya nsofu ayo babikako safiri.*
15 Amolu yakwe ni nceshi sha marbele* ishashimpwa pa mashinte ya golde iisuma nga nshi.
Alamoneka bwino kwati ni Lebanone, aliwama ukucila imikedari.+
16 Akanwa kakwe kalilowa,Kabili fyonse fye pali ena fyaliwama.+
Mwe bana banakashi ba mu Yerusalemu, uyu e mutemwikwa wandi.”
Amafutunoti
^ Muri, mafuta ayanunkila bwino ayo balefumya ku finyamuti fya fimuti fimo.
^ Muri, mafuta ayanunkila bwino ayo balefumya ku finyamuti fya fimuti fimo.
^ Muri, mafuta ayanunkila bwino ayo balefumya ku finyamuti fya fimuti fimo.
^ Nelyo kuti lyalola na mu kuti, “Umweo wandi walifumine ilyo alandile.”
^ Nelyo “Umweo wandi walifumine.”
^ Nelyo “icifimbo.”
^ Nelyo kuti yalola na mu kuti, “fisabo fya tuncindu.”
^ Nelyo kuti yalola na mu kuti, “mifoolo ya menshi.”
^ Muri, mafuta ayanunkila bwino ayo balefumya ku finyamuti fya fimuti fimo.
