Yeremia 1:1-19
1 Aya e mashiwi ya kwa Yeremia* umwana wa kwa Hilkia, umo pali bashimapepo ba mu Anatote+ mu calo ca kwa Benjamini.
2 Yehova alandile nankwe mu nshiku Yoshia+ umwana wa kwa Amone,+ imfumu ya mu Yuda aleteka, mu mwaka walenga 13 ukutula apo atendekeele ukuteka.
3 Alitwalilile ukulanda nankwe na mu nshiku Yehoyakimu+ umwana wa kwa Yoshia imfumu ya mu Yuda aleteka, mpaka na ku mpela ya mwaka uwalenga 11 ukutula apo Sidekia+ umwana wa kwa Yoshia imfumu ya mu Yuda atendekeele ukuteka, ukufika ilyo Yerusalemu bamusendele ku calo cimbi ku kuyaba nkole mu mweshi walenga 5.+
4 Yehova anjebele ati:
5 “Ilyo nshilakupanga mwi fumo nalikwishibe,*+Kabili ilyo ushilafyalwa,* nalikusalile+ pa kuti ulebomba umulimo uwaibela.*
Nalengele ube kasesema ku nko.”
6 Lelo nalandile nati: “Iye mwe Shikulu Mulopwe Yehova!
Nshaishiba ukulanda+ pantu ndi mulumendo fye.”*+
7 Lyena Yehova anjebele ati:
“Wilanda ati, ‘Ndi mulumendo fye.’
Pantu ufwile ukuya kuli bonse abo ndekutumako,Kabili ufwile ukuyabeba fyonse ifyo nalakweba.+
8 Taufwile ukubatiina pa mulandu ne fyo bamoneka,+Pantu ‘ndi na iwe, nkakupususha,’+ e fyo Yehova alanda.”
9 Lyena Yehova alifungulwile ukuboko kwakwe no kunjikata pa kanwa.+ Kabili Yehova anjebele ati: “Nabika amashiwi yandi mu kanwa kobe.+
10 Mona, buno bushiku nakupeela amaka pa nko na pa mabufumu, nakupeela amaka ya kunukula na ya kubongolola, aya konaula na ya kutobaula, aya kukuula na ya kulimba.”+
11 Kabili Yehova anjipwishe ati: “Cinshi ulemona, Yeremia?” E ico namwebele nati: “Ndemona umusambo wa cimuti ca mualmonde.”*
12 Yehova anjebele ati: “Walungika, pantu ndelola pa kuti mfikilishe ifyo nalandile.”
13 Lyena Yehova alinjipwishe pa muku walenga bubili ati: “Cinshi ulemona?” E ico namwebele ati: “Ndemona impoto* ili pa mulilo* kabili akanwa ka iko nakafuma ku kapinda ka ku kuso, kasendamine ku kapinda ka ku kulyo.”
14 Lyena Yehova anjebele ati:
“Ubucushi bukafuma ku kapinda ka ku kusoBukesa pali bonse abekala mu calo.+
15 Pantu ‘ndeita indupwa shonse isha mu mabufumu ya ku kapinda ka ku kuso,’ e fyo Yehova alanda,+‘Kabili bakesa; cila muntu akabika icipuna cakwe ica bufumuPa mpongolo sha musumba wa Yerusalemu,+Bakashinguluka ifibumba fya musumba no ku-usansaKabili bakasansa imisumba yonse iya Yuda.+
16 Kabili nkabapingula pa fyabipa fyonse ifyo bacita,Pantu balimpondokela,+Bafutumwina tulesa icushi ca malambo+Balakontamina ne fyo iminwe yabo yapanga.’+
17 Lelo iwe uipekanye pa kuti ucite ifyo nakweba,*Kabili wime uye ubebe fyonse ifyo nakweba.
Wibatiina,+Pa kuti nikalenga ukabe no mwenso pa ntanshi yabo.
18 Pantu buno bushiku ninenga ube umusumba we linga ilyakosa,Ninenga ube uluceshi lwa cela ne fibumba fya mukuba pa kuti ulwishe icalo conse,+Pa kuti ulwishe imfumu sha mu Yuda ne ntungulushi,Na pa kuti ulwishe bashimapepo na bantu ba mu calo.+
19 Kabili nangu cibe shani bakalwa na iwe,Lelo tabakakucimfye,Pantu ‘ndi na iwe,+ nkakupususha,’” e fyo Yehova alanda.
Amafutunoti
^ Nalimo lyalola mu kuti “Yehova alacindamika.”
^ Nelyo “nalikusalile.”
^ Mu ciHebere, “ilyo ushilafuma mwi fumo.”
^ Nelyo “nalikupatwileko.”
^ Nelyo “pantu ndi mwaice.”
^ Mu ciHebere, “umusambo wa ulelola.”
^ Nelyo “impoto ya kwipikilamo iya kanwa akakulu.”
^ Mu ciHebere, “impoto ili pa mulilo uo baleputilisha.”
^ Mu ciHebere, “ikake mu ntungu.”
