Yeremia 15:1-21
15 Lyena Yehova anjebele ati: “Nangu Mose na Samwele bengeminina pa ntanshi yandi,+ te kuti mbelele aba bantu uluse.* Bafumye pa cinso candi, baleke baye.
2 Kabili nga bakweba abati, ‘Twalaya kwisa?’ ufwile ukubeba auti, ‘Yehova alanda ati:
“Bonse abafwile ukufwa ku cikuko, nabaye ku cikuko icipaya!
Abafwile ukufwa ku lupanga, nabaye ku lupanga!+
Abafwile ukufwa ku cipowe, nabaye ku cipowe!
Kabili abafwile ukuba bankole, nababasende pa kuti bakayeba bankole!”’+
3 “‘Kabili nkabatumina ifintu 4,’*+ e fyo Yehova alanda, ‘nkabatumina ulupanga lwa kubepaya, imbwa sha kukululula ifitumbi fyabo, ifyuni fya mu lwelele ne nama sha pe isonde isha kubalya no kubonaula.+
4 Kabili nkalenga amabufumu yonse aya pe sonde+ yakalepapa nga yabamona pa mulandu wa fyo Manase umwana wa kwa Hisekia imfumu ya mu Yuda acitile mu Yerusalemu.+
5 Nani akakulangulukilako we Yerusalemu,Nani akakumfwila uluse,Kabili nani akeminina no kukwipusha ifyo uli?’
6 ‘Namunsha,’ e fyo Yehova alanda.+
‘Mwalitwalilila ukumfutatila.+
E ico nkatambalika ukuboko kwandi pali imwe no kumonaula.+
Nintendwa ukumumfwila uluse.*
7 Kabili nkabelela ku ca kwelelako mu mpongolo sha calo.
Nkalenga bakafwilwe abana.+
Nkonaula abantu bandi,Pantu balikaana ukwaluka.+
8 Nkalenga bamukamfwilwa babo bakafule ukucila umucanga wa kuli bemba.
Nkabaletela uwa kubonaula ninshi akasuba kali pa kati. Uwa konaula banyina, na balumendo.
Nkalenga bakasakamikwe kabili bakabe no mwenso mu kupumikisha.
9 Umwanakashi uwafyala abana 7 nanaka nga nshi;Aleshikila fye.*
Akasuba kakwe nakawa nangu ca kuti ni nshita ya kasuba.Naumfwa insoni kabili naseebana.’*
‘Kabili abanono abashalapoNkalenga bakabepaile ku lupanga ku balwani babo,’ e fyo Yehova alanda.”+
10 We bulanda kuli ine, pantu mayo mwalimfyele,+Abantu ba mu calo conse balomana na ine kabili balandwisha.
Nshabakongweshapo nelyo ukukongola kuli bena;Lelo bonse balantiipa.
11 Yehova alandile ati: “Nangu cibe shani nkakubombela pa kuti nkakucitile icisuma;Nangu cibe shani nkakwafwilisha pa mulandu wa balwani,Mu nshita ya mafya na mu nshita ya bucushi.
12 Bushe umuntu kuti aputaula icela,Icela icafuma ku kapinda ka ku kuso no mukuba?
13 Nkalenga abalwani bakasende ifyuma fyenu.+Tabakalipile, lelo ico bakafisendela ni pa mulandu ne membu shenu shonse isho mwacita mu calo cenu conse.
14 Nkapeela abalwani benuPa kuti bakafisende ku calo ico mushaishiba.+
Ubukali bwandi bukambusha umulilo,Kabili ukamubilimina.”+
15 Mwe Yehova mwalishiba,Njibukisheni kabili mbikeniko amano.
Nandwileniko abancusha.+
Mwileka mfwe* pa mulandu wa kuti mulakokola ukukalipa.
Ishibeni ukuti ico nseebanina+ ni pa mulandu wenu.
16 Nalisangile amashiwi yenu kabili naliyaliile;+Amashiwi yenu yalilengele umutima wandi wasansamuka kabili walasekelela,Pantu nainikwa ishina lyenu, mwe Yehova Lesa wa mabumba.
17 Nshikala pamo na baciwowo kabili nshisekelela+ pamo nabo.
Njikala fye neka, pa mulandu wa kuti ukuboko kwenu kwaba pali ine,Pantu mwalisusha ubukali* muli ine.+
18 Cinshi ukukalipwa kwandi kushipwila kabili cinshi icilonda candi cishipolela?
Califilwa ukupola.
Bushe mukaba nge ntulo ya menshi iya bucenjeshiIyo abantu bashingacetekela?
19 E ico Yehova alanda ati:
“Nga wabwela, nkakupaala na kabili,Kabili ukeminina pa ntanshi yandi.
Nga wapatukanya ifyacindama ne fishacindama,Ukaba nga kanwa kandi.*
Bakesa kuli iwe,Lelo iwe tawakaye kuli bena.”
20 “Nalalenga ube ilinga ilyakosa ilya mukuba kuli aba abantu.+
Bakalwa na iwe,Lelo tabakakucimfye,+Pantu ndi na iwe, pa kuti nkupusushe kabili nkupokolole,” e fyo Yehova alanda.
21 “Kabili nkakupokolola mu minwe ya babifiNkakulubula mu minwe ya bankalwe.”
Amafutunoti
^ Nelyo “umweo wandi te kuti ulole kuli aba bantu.”
^ Nelyo kuti yapilibula no kuti, “imisango 4 iya bupingushi.” Mu ciHebere, “indupwa 4.”
^ Nelyo “Nintendwa ukumulangulukilako.”
^ Nelyo kuti yapilibula no kuti, “Akasuba kakwe nakaseebana kabili nakomfwa insoni.”
^ Nelyo “Umweo wakwe uleshikila fye.”
^ Mu ciHebere, “Mwinsenda.”
^ Nelyo “amashiwi ya bupingushi.”
^ Nelyo “Ukaba uwa kunandilako.”
