Yeremia 16:1-21
16 Yehova anjebele na kabili ati:
2 “Wikoopa kabili wikafyala abana abaume na bana abanakashi muli cino calo.
3 Pantu ifi e fyo Yehova alanda pa bana abaume na pa bana abanakashi abafyalilwa muli cino calo, na pali banyina ababafyala, na pali bashibo abalenga ukuti bafyalwe muli cino calo. Alanda ati,
4 ‘Bakafwa ku malwele ayakali,+ lelo takwakabe nangu umo uukabaloosha nelyo ukubashiika. Bakaba ngo mufundo pa mushili,+ bakafwa ku lupanga na ku cipowe,+ kabili ifitumbi fyabo fikaba ifya kulya fya fyuni fya mu lwelele ne fya nama sha pe sonde.’
5 “Pantu Yehova alanda ati,‘Taufwile ukwingila mu ng’anda umuli umutebeto wa baleloosha,Kabili taufwile ukuya mu kuloosha nelyo ukubalangulukilako.’+
‘Pantu nimfumya umutende pali aba bantu,’ e fyo Yehova alanda,‘Nimfumyapo no kutemwa ukushipwa no luse.+
6 Bashimucindikwa na bapiina bakafwa muli ici calo.
Tabakabashiike,Takwakabe nangu umo uukabaloosha,Nelyo uukaitetaula no kubeya ulupala pa mulandu wabo.*
7 Kabili takwakabe nangu umo uukapeela abakalaloosha ifya kulya,Pa kuti abasansamushe;Takwakabe nangu umo uukabapeela kapu ya cisansamushiPa kuti banwemo pa mulandu wa kuti nabafwilwa bashibo nelyo banyinabo.
8 Kabili taufwile ukwingila mu ng’anda umuli umutebetoPa kuti wikekala nabo no kulya no kunwa.’
9 “Pantu Yehova wa mabumba, Lesa wa kwa Israele alanda ati, ‘Mu nshiku shobe muli cino cifulo nkafumyamo ishiwi lya kusansamuka no kusekelela, nkafumyamo ishiwi lya kwa shibwinga ne lya kwa nabwinga+ ninshi ulemonako.’
10 “Nga waeba aba bantu aya mashiwi, bakakwipusha abati, ‘Cinshi Yehova alandila ukuti akaleta ubu bucushi ubukalamba pali ifwe? Cilubo nshi kabili lubembu nshi twabembukila Yehova Lesa wesu?’+
11 Ukabasuke auti, ‘“Ni pa mulandu wa kuti bashinwe balinshile,”+ e fyo Yehova alanda, “kabili balekonka balesa bambi no kubabombela no kubafukamina.+ Lelo balinshile kabili tabalekonka amafunde+ yandi.
12 Kabili ifyo mucita fyalicila sana pa fyo ifikolwe fyenu+ fyalecita. Imwe bonse mukonkelela imitima yenu iyabipa kabili iya bucipondoka, mu cifulo ca kulang’umfwila.+
13 E ico nkamufumya muli cino calo no kumupoosa ku calo ico mushaishiba kabili ico ifikolwe fyenu fishaishibe.+ Kulya e ko mukalabombela balesa bambi akasuba no bushiku,+ pantu nshakabe ne cikuuku kuli imwe.”’
14 “‘Nomba inshiku shileisa,’ e fyo Yehova alanda, ‘ilyo tabakalande na kabili abati: “Na pali Yehova uwafumishe abena Israele mu calo ca Egupti!”+
15 lelo bakalalanda abati: “Na pali Yehova uwafumishe abena Israele ku calo ca ku kapinda ka ku kuso na ku fyalo fyonse uko abasalanganishishe!” kabili nkababwesesha ku calo cabo, ico napeele ifikolwe fyabo.’+
16 “‘Moneni, nketa abalondo abengi,’ e fyo Yehova alanda,‘Nabo bakabafwaya no kubekata.
Lyena nkatuma abalunshi abengi,Nabo bakabalunga mu mpili shonse na mu tupili tonseNa mu ncengo shonse.
17 Pantu amenso yandi yalamona fyonse ifyo bacita.*
Tafyafisama kuli ine,Ne filubo fyabo tafyafisama ku menso yandi.
18 Nkabalilapo ukubakanda pa filubo fyabo na pa membu shabo,+Pantu ifitumbi fya tulubi twabo utwa bunani fyalikowesha icalo candiKabili mu calo candi baisushamo ifintu fyabo ifya bunani.’”+
19 Mwe Yehova, mwe maka yandi kabili mwe cubo candi,Mwe cifulo candi ica kufulumukilako mu nshita ya bucushi,+Kuli imwe e ko aba mu nko bakesa ukufuma ku mpela sha pano isonde,Kabili bakalanda abati: “Ifikolwe fyesu fyatwalilile ukukonka ulutambi lwa kupepa tulesa twa bufi,Tulesa twa fye kabili utushafwa kantu.”+
20 Bushe umuntu kuti aipangila balesa?Ifyo apanga te balesa ba cine.+
21 “E ico nkalenga bakeshibe,Pali ilya nshita, nkalenga bakeshibe amaka yandi ne fyo nakosa,Kabili bakeshiba ukuti ishina lyandi nine Yehova.”
Amafutunoti
^ Ishi ni ntambi sha bena fyalo isho abena Israele abapondokeele Lesa balekonka pa kuloosha.
^ Mu ciHebere, “amenso yandi yaba mu nshila shabo shonse.”
