Yeremia 17:1-27
17 “Ulubembu lwa kwa Yuda balulembela ku kalembelo ka cela.
Balilulemba ku kalembelo ka daimondi pa mitima yabo,Na pa nsengo sha ku fiipailo fyabo,
2 Na bana babo balebukisha ifiipailo fyabo ne fimuti fyabo ifya kupepelapo*+Ifyaba mupepi ne fimuti ifyalelema, pa tupili ututali,+
3 Pa mpili ishaba ukutali ne misumba.
Nkalenga abalwani benu bakasende fyonse ifyo mwakwata.+Nkalenga bakasende ifyaba pa fifulo fyenu ifya kupepelapo pa mulandu ne membu isho mwacita mu fitungu fyenu fyonse.+
4 Mukapanya mwe bene ubupyani ubo namupeele.+
Kabili nkalenga mukabombele abalwani mu calo ico mushaishiba,+Pantu mwalyambusha ubukali bwandi ngo mulilo.*+
Kabili bukatwalilila fye ukubilima.”
5 Yehova alanda ati:
“Abe uwatiipwa umuntu* uucetekela umuntunse,+Uucetekela amaka ya bantunse,*+Kabili uo umutima wakwe wafuma kuli Yehova.
6 Akaba nge cimuti icaba ceka mu ciswebebe.
Takamone ifisuma ilyo fikesa,Lelo akekala mu ncende ishauma mu matololo,Mu calo ca mucele umo umuntu nangu umo ashingekala.
7 Abe uwapaalwa umuntu* uucetekela Yehova,Uushintilila pali Yehova.+
8 Akaba nge cimuti ico balimba mupepi na menshi,Icalimba imishila mu mulonga.
Takomfwe icikabilila ilyo cikesa,Lelo amabula yakwe yakaba fye ayalemba lyonse.+
Kabili mu nshita ya cilala takasakamikwe,Nelyo ukuleka ukutwala ifisabo.
9 “Umutima wa bucenjeshi* ukucila fyonse kabili walipelelwa,*+ kuti wacita icili conse.
Nani engawishiba?
10 Ine, ne Yehova ndafwayafwaya mu mutima,+Ndaceeceeta amatontonkanyo ayashika,*Pa kuti impeele umuntu ukulingana ne mibele yakwe,Ukulingana ne fisabo fya milimo yakwe.+
11 Filya fine inkwale ilonganika amani ayo ishabikiile,E fyaba no unonka ifyuma mu bucenjeshi.*+
Fikamusha pa kati ka nshiku shakwe isha kuba no mweo,Na mu kulekelesha akaba umuwelewele.”
12 Icipuna ca bufumu ica bukata ico bacindamika ukufuma pa kutendeka,E cifulo cesu ica mushilo.+
13 Mwe Yehova, mwebo Israele acetekela,Bonse abamusha bakaseebana.
Bonse abamupondokela* bakabalemba mu lukungu,+Pantu balisha Yehova, intulo ya menshi ya mweo.+
14 Ng’undapeni mwe Yehova, na ine nkapola.
Mpususheni, na ine nkapusuka,+Pantu nimwe numbanya.
15 Moneni! Kuli abalenjeba abati:
“Yali kwi amashiwi ya kwa Yehova?+
Nayese!”
16 Lelo ine nshalekele ukumukonka nga kacema,Kabili nshalefwaya ukuti ubushiku bwa bucushi bwise.
Mwalishiba bwino fyonse ifyo imilomo yandi yalandile;Fyonse ifyo nalandile fili pa ntanshi yenu!
17 Mwiba ica kuntiinya.
Nimwe icubo candi mu bushiku bwa bucushi.
18 Lekeni abancusha baseebane,+Lelo mwileka nseebane.
Lekeni babe no mwenso,Lelo mwileka mbe no mwenso.
Leteni ubushiku bwa bucushi pali bena,+Kabili bonauleni umupwilapo.*
19 Yehova anjebele ati: “Kabiye, uyeiminina pa mpongolo ya bana ba bantu apo imfumu sha mu Yuda shingilila no kufumina, na pa mpongolo shonse isha mu Yerusalemu.+
20 Ufwile ukubeba auti, ‘Umfweni amashiwi ya kwa Yehova mwe mfumu sha mu Yuda, mwe bantu bonse aba mu Yuda, na imwe bonse mwe bekala mu Yerusalemu, mwe bengilila pali ishi mpongolo.
21 Yehova alanda ati: “Cenjeleni* pa kuti mwilasenda ifipe pa bushiku bwe Sabata nelyo ukufipisha pa mpongolo sha Yerusalemu.+
22 Mwilafumya ifipe mu mayanda yenu pa bushiku bwe Sabata; kabili mwilabomba umulimo nangu umo+ pali ubu bushiku. Mulesunga ubushiku bwe Sabata pantu bwa mushilo, nga filya naebele ifikolwe fyenu.+
23 Lelo tabaumfwile nelyo ukubikako amano, bali bacintomfwa, balikeene* ukumfwa kabili tabakonkele ifyo babasalapwile.”’+
24 “‘“Lelo nga mwakulang’umfwila,” e fyo Yehova alanda, “kabili nga tamwakulapisha ifipe pa mpongolo ya uyu musumba pa bushiku bwe Sabata, kabili nga tamwakulabomba umulimo nangu umo pali ubu bushiku+ pa kuti bube ubwa mushilo,
25 lyena imfumu na ba ku bufumu abekala pa cipuna ca bufumu ica kwa Davidi+ nabo bakengilila pa mpongolo sha uyu musumba, ninshi bali mu maceleta na pali bakabalwe, bena na ba ku bufumu, abaume ba mu Yuda na bekala mu Yerusalemu;+ kabili inshita yonse muli uyu musumba mukalaikala abantu.
26 Kabili abantu bakafuma mu misumba ya mu Yuda, mu Yerusalemu monse, mu citungu ca kwa Benjamini,+ mu mpanga iyabatama,+ mu citungu ca mpili na mu Negebu.* Bakaleta imituulo ya koca,+ amalambo,+ imituulo ya ngano,+ ububani bwabuuta, na malambo ya kutootela mu ng’anda ya kwa Yehova.+
27 “‘“Lelo nga tamwakulang’umfwila, nga tamwakulasunga ubushiku bwe Sabata ubwa mushilo kabili nga mukalasenda ifipe no kufipisha pa mpongolo sha Yerusalemu pa bushiku bwe Sabata, nkasonteka impongolo shakwe, kabili umulilo ukoca impungu ishakosa isha mu Yerusalemu+ kabili takwakabe nangu umo uukaushimya.”’”+
Amafutunoti
^ Nelyo kuti yapilibula no kuti, “mwalyambusha umulilo mu bukali bwandi.”
^ Nelyo “umuntu wa maka.”
^ Mu ciHebere, “Uulenga umunofu waba ukuboko kwakwe.”
^ Nelyo “umuntu wa maka.”
^ Nelyo “ulabepa.”
^ Nelyo kuti yapilibula no kuti, “te kuti upole.”
^ Nelyo “ifyo umuntu omfwa.” Mu ciHebere, “imfyo.”
^ Nelyo “ifyo anonkele ukwabula umulinganya.”
^ Mu ciHebere, “abampondokela,” e kutila, abapondokela Yehova.
^ Nelyo “bonauleni ukucila pa miku ibili.”
^ Nelyo “Imyeo yenu icenjele.”
^ Mu ciHebere, “balikoseshe imikoshi yabo.”
^ Nelyo “ku kapinda ka ku kulyo.”
