Yeremia 18:1-23
18 Yehova aebele Yeremia ati:
2 “Ima, kabiye ku ng’anda ya kwa nakabumba,+ kabili kulya e ko nalalanda na iwe.”
3 E ico naile ku ng’anda ya kwa nakabumba, kabili nasangile alebumba fimo pa mipeto yakwe.
4 Lelo icipe iminwe yakwe yalebumba calyonaike. E ico abumbile icipe cimbi, ukulingana ne fyo alefwaya.*
5 Lyena Yehova anjebele ati:
6 “‘Bushe ifyo uyu nakabumba acitile, te fyo na ine ningamucita mwe ba mu ng’anda ya kwa Israele?’ e fyo Yehova alanda. ‘Moneni! Filya iloba liba mu minwe ya kwa nakabumba, e fyo na imwe mwaba mu minwe yandi, mwe ba mu ng’anda ya kwa Israele.+
7 Lyonse nga nalanda ati ndi no kunukula, ukubongolola no konaula uluko nelyo ubufumu,+
8 e lyo ulo luko lwaleka ukucita ifyabipa ifyo nalusokeelepo, na ine nshakalete* ubucushi ubo nalefwaya ukuleta pali lwena.+
9 Lelo lyonse nga nalanda ukuti ndi no kukuula no kulimba uluko nelyo ubufumu,
10 e lyo lwalacita ifyabipa mu menso yandi kabili lwakaana ukulang’umfwila, nshakalucitile* ifisuma ifyo nalefwaya ukulucitila.’
11 “Nomba eba abaYuda na bekala mu Yerusalemu auti, ‘Yehova alanda ati: “Ndemupekanishisha* ubucushi kabili ndetontonkanya pa fyo nkamukanda. Lekeni ukucita ifyabipa kabili wamyeni inshila shenu, mutendeke ukucita ifisuma.”’”+
12 Lelo balandile abati: “Uleicusha fye!+ Pantu twakulacita ifyo tutontonkanya, kabili cila muntu akulakonkelela umutima wakwe uwa bucipondoka+ kabili uwabipa.”
13 E ico Yehova alanda ati:
“Ipusheni mwe bene mu nko.
Nani uwaumfwapo ifya musango yu?
Nacisungu wa mu Israele nacita ica bunani nga nshi.+
14 Bushe imfula ya bungululu iya mu Lebanone iiponena pa mabwe ayaba apasuluka kuti yasunguluka?
Nelyo bushe amenshi ayatalala ayakonkoloka ukufuma ukutali kuti yakama?
15 Lelo abantu bandi balindaba.+
Batuulila icintu ica fye amalambo,*+Kabili balenga abantu balaipununa mu nshila shabo, inshila sha kale,+Balenga balaenda mu tushila twa tondo utwaimbauka,*
16 Pa kuti balenge icalo cibe ica kupapa+Kabili ica kulishisha umunsoli umuyayaya.+
Onse uwa kulekelesha uwapita mupepi na co akalapapa no kupukunya umutwe.+
17 Nkabasalanganya pa ntanshi ya balwani babo nga filya umwela wa ku kabanga ucita.
Ubushiku bakaba no bucushi+ nkabafutatila, nshakabalange icinso candi.”
18 Kabili balandile abati: “Iseni tupangane ifyo twalacita Yeremia,+ pantu bashimapepo besu bakatwalilila ukutusambilisha amafunde,* na ba mano bakatwalilila ukutupanda amano kabili bakasesema bakatwalilila ukubila kuli ifwe amashiwi ya kwa Lesa. Iseni tumwebe amashiwi ayabi,* kabili twibika amano ku fyo alelanda.”
19 ‘Mwe Yehova, umfweni ifyo ndelanda,Kabili kutikeni ifyo abalwani bandi balelanda.
20 Bushe umuntu nga alecita ifisuma, abantu bafwile ukumucitila ifibi?
Pantu nabembila umweo wandi icilindi.+
Ibukisheni ifyo naleiminina pa ntanshi yenu pa kuti nande ifisuma pali bena,Kabili inenge mufumye ubukali bwenu pali bena.
21 E ico lekeni abana babo bafwe ku cipowe,Kabili lekeni amaka ya lupanga+ yabepaye.
Abakashi babo nabafwilwe abana kabili nababe bamukamfwilwa.+
Abaume babo nabafwe ku cikuko,Abalumendo babo nababepaye ku lupanga mu nkondo.+
22 Lekeni ukupunda kukaleumfwika mu mayanda yaboIlyo mukabaletela ifipondo mu kupumikisha.
Pantu nabanyimbila icilindi pa kuti banjikate,Kabili nabateya ifiteyo pa kuti banjikate.+
23 Lelo mwe Yehova,Mwalishiba bwino amapange yabo yonse aya kufwaya ukunjipaya.+
Mwifimba pa filubo fyabo,Kabili mwifuuta ulubembu lwabo pa ntanshi yenu.
Lekeni bakaipunune pa ntanshi yenu+Ilyo mukabakanda ninshi namukalipa.+
Amafutunoti
^ Mu ciHebere, “ukulingana ne caweme mu menso ya kwa nakabumba.”
^ Nelyo “nkalulangulukilako.”
^ Nelyo “nshakalulangulukileko.”
^ Mu ciHebere, “Ndemupangila.”
^ Nelyo “Bafutumwina icushi ce lambo ku cintu ica fye.”
^ Nelyo “uto bashalinganya.”
^ Mu ciHebere, “iseni tumumine ku lulimi.”
^ Nelyo “ifya kukonka.”