Yeremia 19:1-15
19 Yehova anjebele ati: “Kabiye kashite umutondo kuli nakabumba,+ usende intungulushi shimo isha bantu ne ntungulushi shimo isha bashimapepo,
2 muye ku Mupokapoka wa Mwana wa kwa Hinomu,+ uwabela mupepi ne Mpongolo ya Fi-inga. Kabili kulya e ko uyebilisha ifyo nalakweba.
3 Uyebilisha auti, ‘Umfweni ifyo Yehova alanda, mwe mfumu sha mu Yuda na mwe bekala mu Yerusalemu. Yehova wa mabumba, Lesa wa kwa Israele, alanda ati:
“‘“Ndeleta ubucushi pali ici icifulo, kabili ukutwi konse ukukomfwa ifyo nalacita kukapapa.
4 Pantu balimpondokele+ kabili balengele nafilwa ukwishiba cino cifulo.+ Muli cino cifulo e mo batuulila balesa bambi amalambo, balesa abo bena ne fikolwe fyabo ne mfumu sha mu Yuda bashaishibe, kabili nabesusha umulopa wa ba kaele muli cino cifulo.+
5 Balikuula ififulo fya kupepelapo Baali pa kuti baleoca abana babo mu mulilo ngo mutuulo wa koca uwa kutuulila Baali.+ Icintu ico nshabebele kabili ico nshalandilepo, icishaishile na mu mutima wandi.”’*+
6 “‘“E ico moneni! inshiku shileisa,” e fyo Yehova alanda, “ilyo cino cifulo bakaleka ukuciita ati Tofete nelyo Umupokapoka wa Mwana wa kwa Hinomu, lelo bakalaciita ati Umupokapoka wa Kwipailamo.+
7 Nkafulunganya amapange ya kwa Yuda na Yerusalemu muli cino cifulo, kabili nkalenga bakafwe ku lupanga pa ntanshi ya balwani babo abafwaya ukulofya umweo wabo. Kabili nkapeela ifyuni fya mu lwelele ne nama sha mu mpanga+ ifitumbi fyabo pa kuti fikabe ifya kulya fya fiko.
8 Kabili nkalenga uyu musumba ukabe ica kupapa kabili ica kulishisha umunsoli. Onse uwa kulekelesha uwapita mupepi na co, akapapa kabili akalisha umunsoli pa mulandu wa fyabipa ifikaucitikila.+
9 Nkalenga bakalye imibili ya bana babo abaume ne mibili ya bana babo abanakashi, kabili umuntu onse akalya umubili wa munankwe, pantu tabakakwate ifya kulya pa mulandu wa kuti abalwani babo na bafwaya ukulofya umweo wabo bakabashinga.”’+
10 “Lyena utobe umutondo ninshi abaume abo walaya nabo balemonako,
11 kabili ubebe auti, ‘Yehova wa mabumba alanda ati: ‘Ifi fine e fyo nkatoba aba bantu na uno musumba, nga filya umuntu atoba icipe ca kwa nakabumba ica kutila te kuti baciwamye; kabili bakashiika ifitumbi mu Tofete mpaka incende yonse ikapwe.”’+
12 “‘E fyo nkacita cino cifulo,’ e fyo Yehova alanda, ‘kabili e fyo nkacita na bekalamo, pa kuti nkalenge uno musumba ukabe nga Tofete.
13 Kabili amayanda ya mu Yerusalemu na ya mfumu sha mu Yuda yakakowela nga Tofete,+ pantu pa mitenge ya yako e po baletuulila amalambo ku fya mu muulu fyonse+ kabili e po baleitulwila imituulo ya myangashi kuli balesa bambi.’”+
14 Ilyo Yeremia afumine ku Tofete uko Yehova amutumine ukuyasesema, aileiminina mu lubansa lwa ng’anda ya kwa Yehova kabili aebele abantu bonse ati:
15 “Yehova wa mabumba, Lesa wa kwa Israele, alanda ati, ‘Moneni ndeleta ubucushi pali uyu musumba na pa misumba ya uko iinono, ubucushi bonse ubo nalandile ukuti nkaleta pali uyu musumba, pantu ni bacintomfwa, tabakonka ifyo mbeba.’”*+
Amafutunoti
^ Nelyo “Icintu icishatalileingila mu matontonkanyo yandi.”
^ Mu ciHebere, “balikoseshe imikoshi yabo pa kuti bekonka ifyo mbeba.”
