Yeremia 20:1-18
20 Nomba Pashihuri umwana wa kwa Imere, shimapepo, uwali kangalila mukalamba mu ng’anda ya kwa Yehova, aleumfwa uko Yeremia alesesema ifi fintu.
2 Lyena Pashihuri aumine kasesema Yeremia no kumubika mu makusu+ ayali pa Mpongolo ya pa Muulu iya kwa Benjamini, iyali mupepi ne ng’anda ya kwa Yehova.
3 Lelo ubushiku bwakonkelepo ilyo Pashihuri afumishe Yeremia mu makusu, Yeremia amwebele ati:
“Yehova na-alula ishina lyobe, tabakulakwita ati Pashihuri, lelo bakulakwita ati ica Kutiinya Icili Konse Konse.+
4 Pantu Yehova alanda ati, ‘Nalalenga uleitiina we mwine, nalalenga na banobe bonse balekutiina, kabili ulupanga lwa balwani babo lukabepaya ninshi ulemonako;+ kabili nkapeela abaYuda bonse mu minwe ya mfumu ya ku Babiloni, na yo ikabasenda ku Babiloni uko bakayaba bankole, kabili ikabepaila ku lupanga.+
5 Kabili nkapeela abalwani babo+ ifyuma fyonse ifya muli uyu musumba, ifintu fyabo fyonse, ifintu fyabo fyonse ifyawamisha, ne fyuma fyonse ifya mfumu sha mu Yuda kabili bakafipoka, bakafisende na ku Babiloni.+
6 Na iwe Pashihuri na bonse abekala mu ng’anda yobe, bakamusenda ku Babiloni uko mukayaba bankole kabili uko mukayafwila, kulya e ko bakamushiika pamo na banobe, pantu wa basesemene ifya bufi.’”+
7 Mwambepa mwe Yehova, mwambepa.
Mwabomfya amaka yenu pali ine kabili mwancimfya.+
Abantu balenseka akasuba konse;Kabili bonse balempumya.+
8 Pantu lyonse ilyo nalanda, mbilisha nati,Ulukakaala no bonaushi!
Pantu amashiwi ya kwa Yehova yalilenga balansaalula no kunseka akasuba konse.+
9 E ico nalandile nati: “Nshakamulumbule,Kabili nshakalandile mwi shina lyakwe+ na kabili.”
Lelo mu mutima wandi amashiwi yakwe yali ngo mulilo uulebilima, uo besalile mu mafupa yandi,Kabili nalifililwe ukuyasunga;Nalifililwe ukwikala tondolo.+
10 Pantu nalyumfwile ifyabipa ifyo abengi balelanda pali ine;Ifya kutiinya fyalinshingulwike.+
Balelanda abati: “Landeni ifyabipa pali ena, natulande ifyabipa pali ena!”
Onse uwalelanda ukuti imbe no mutende alelolela fye ukuti ingwe,+ alelanda ati:
“Nalimo akalufyanya,Kabili tukamucimfya no kulandula.”
11 Lelo Yehova aali na ine ngo mwaume wa maka uo batiina.+
E mulandu wine abancusha bakaipunwina kabili bakafilwa ukuncimfya.+
Bakaseebana nga nshi, pantu ifyo balepanga ukucita tafyakacitike.
Ukuseebana kwabo ukwa muyayaya takwakalabwe.+
12 Lelo imwe mwe Yehova wa mabumba, muceeceeta uwalungama;Mulamona amatontonkanyo ayashika* ne fyaba mu mutima.+
Lekeni imone ifyo mwalabakanda,+Pantu nimwe natuulila umulandu wandi.+
13 Imbileni Yehova! Lumbanyeni Yehova!
Pantu napokolola uushakwata bakumwafwa* mu minwe ya bacita ifyabipa.
14 Bube ubwatiipwa ubushiku nafyelwe!
Ubushiku mayo amfyele bwiba ubwapaalwa!+
15 Abe uwatiipwa uwashimikile tata ilyashi ilisuma ilya kuti:
“Nakufyalwa umwana mwaume!”
Uwalengele asekelele nga nshi.
16 Uyo muntu nabe nge misumba iyo Yehova aonawile ukwabula ukuyumfwila uluse.
Naleumfwa imisowa mu nshita ya lucelo no kulila kwe penga akasuba nga kafika pa kati.
17 Cinshi ashanjipaile fye mwi fumo,Ica kuti mayo aba inshiishi yandiKabili atwalilila fye ukuba ne fumo ukwabula ukupaapa?+
18 Cinshi ico nafumiine mwi fumo,Bushe ni pa kuti ndecula no kuba no bulanda?Bushe ni pa kuti mpwishe inshiku shandi mu museebanya?+
Amafutunoti
^ Nelyo “ifyo umuntu omfwa.” Mu ciHebere, “imfyo.”
^ Nelyo “umweo wa ushakwata bakumwafwa.”
