Yeremia 21:1-14
21 Yehova alandile na Yeremia, ilyo Imfumu Sidekia+ yatumine Pashihuri+ umwana wa kwa Malkiya na Sefania+ umwana wa kwa Maaseya, shimapepo, kuli ena ukuyamulomba ati:
2 “Twipushisheko kuli Yehova pa fili no kutucitikila, pantu Imfumu Nebukadnesari* iya ku Babiloni iletulwisha.+ Nalimo Yehova kuti atucitila icipesha amano, pa kuti Nebukadnesari aleke ukutulwisha.”+
3 Yeremia abebele ati: “Muye-eba Sidekia amuti,
4 ‘Yehova Lesa wa kwa Israele alanda ati: “Moneni, ndelenga ifyanso ifili mu minwe yenu fimwalukile,* ifyanso ifyo mulelwishishako imfumu ya ku Babiloni,+ na bena Kaldi abamushingile kunse ye linga, kabili nkafilonganika pa kati ka uyu musumba.
5 Kabili nkamulwishisha+ ku kuboko kwandi ukwatambalikwa kabili ukwa maka, ninshi nimfulwa kabili ninkalipa nga nshi.+
6 Nkepaya abekala muli uno musumba, abantu ne nama. Bakafwa+ ku cikuko* icabipisha.”’
7 “‘“Pa numa ya ifi,” e fyo Yehova alanda, “Nkapeela Imfumu Sidekia iya mu Yuda na babomfi ba iko na bantu ba muli uno musumba—bonse abakapusuka ku cikuko, ku lupanga, na ku cipowe—mu minwe ya Mfumu Nebukadnesari* iya ku Babiloni, na mu minwe ya balwani babo, na mu minwe ya bonse abafwaya ukulofya umweo wabo,+ akabepaila ku lupanga. Takabomfwile ubulanda, takabalangulukileko kabili takabomfwile uluse.”’+
8 “Kabili webe aba bantu auti, ‘Yehova alanda ati: “Moneni ndebika pa ntanshi yenu inshila ya bumi ne nshila ya mfwa.
9 Abakashala muli uno musumba bakafwa ku lupanga, ku cipowe na ku cikuko. Lelo onse uukafumamo no kuyacimba ku bena Kaldi abalemushinga, akatwalilila ukuba no bumi* kabili akapokolola ubumi bwakwe.”’*+
10 “‘“Pantu nimfutatila uyu musumba pa kuti ndete ubucushi pali wena, te fisuma iyo,”+ e fyo Yehova alanda. “Nkaupeela mu minwe ya mfumu ya ku Babiloni,+ kabili nayo ikaoca.”+
11 “‘Mwe ba mu ng’anda ya mfumu ya mu Yuda: Umfweni ifyo Yehova alelanda.
12 Mwe ba mu ng’anda ya kwa Davidi, Yehova alanda ati:
“Cila lucelo muleba no mulinganya,Kabili mulepokololako uo bebile mu minwe ya ncenjeshi,+Pa kuti ubukali bwandi bwibilima ngo mulilo+Kabili bwibilima ukwabula nangu umo uwa kubushimyaPa mulandu wa fyabipa ifyo mucita.”’+
13 ‘Moneni ndemulwisha, mwe bekala mu mupokapoka,*Mwe cilibwe ca mu mpanga iyabatama,’ e fyo Yehova alanda.
‘Na imwe mwe balanda amuti: “Nani akesa mu kutulwisha?
Kabili nani akasansa icifulo cesu ico twikalamo?”
14 Nkamukanda pa fyo mucita,Pantu mulingile ukukandwa’+ e fyo Yehova alanda.
‘Nkoca umutengo wakwe,Kabili fyonse ifyamushinguluka fikapya.’”+
Amafutunoti
^ Mu ciHebere, “Nebukadresari,” inshila imbi iyo balelembelamo ili ishina.
^ Nelyo “ndelenga ifyanso ifili mu minwe yenu fipilibuke, fimubwelelele.”
^ Nelyo “ubulwele.”
^ Mu ciHebere, “Nebukadresari,” inshila imbi iyo balelembelamo ili ishina.
^ Nelyo “umweo.”
^ Nelyo “akapusuka no bumi bwakwe.”
^ Nelyo “impanga iyabatama.”
