Yeremia 23:1-40
23 “We bulanda kuli bakacema abaleonaula impaanga isho ncema kabili abaleshipasa!” e fyo Yehova alanda.+
2 E ico Yehova Lesa wa kwa Israele aeba abacema abantu bakwe ati: “Mwalipasa impaanga shandi; mwaleshipasa, kabili tamushisakamana.”+
“E ico ndemukanda pa fyabipa ifyo mucita,” e fyo Yehova alanda.
3 “Pa numa nkalonganika impaanga shandi ishashalapo mu fyalo fyonse umo nashipashiile,+ nkashibwesesha na mu mpanga ya shiko iya mulemfwe;+ kabili shikasanda no kufula.+
4 Kabili nkabikako bakacema abakalashicema bwino sana.+ Tashakomfwe umwenso na kabili nelyo ukututuma, kabili tapakalube nangu imo,” e fyo Yehova alanda.
5 “Moneni! Inshiku shileisa,” e fyo Yehova alanda, “ilyo uukatuntuka*+ muli Davidi nkamubika pa cipuna ca bufumu. Kabili imfumu iikateka,+ ikalailuka nga nshi, ikaba no mulinganya kabili ikalacita ifyalungama mu calo.+
6 Mu nshiku sha iko, Yuda akapusuka+ kabili Israele akekala umutende.+ Iyi imfumu bakalayita abati: Yehova E Bulungami Bwesu.”+
7 “Lelo nshiku shileisa,” e fyo Yehova alanda, “ilyo bashakalande abati, ‘Na pali Yehova uwafumishe abena Israele mu calo ca Egupti!’+
8 Lelo bakalanda abati, ‘Na pali Yehova uwafumishe abatuntuka mu ng’anda ya kwa Israele mu calo ca ku kapinda ka ku kuso na mu fyalo fyonse ifyo abasalanganishishemo no kubabwesha,’ kabili bakekala mu calo cabo.”+
9 Ndelanda pali bakasesema nati:
Umutima wandi uli no bulanda nga nshi.
Amafupa yandi yonse yaletutuma.
Ndi ngo muntu uukolelweKabili ndi ngo muntu uo umwangashi ukolele,Pa mulandu wa kwa Yehova na mashiwi yakwe aya mushilo.
10 Pantu mu calo mwaisula abacende.+Icalo cileloosha+ pa mulandu wa citiipuKabili impanga sha mulemfwe isha mu matololo nashuma.+
Balacita ifyabipa kabili tababomfya bwino amaka yabo.
11 “Bakasesema bonse na bashimapepo balikowela.*+
Nangu fye ni mu ng’anda yandi ninsanga ifyabipa ifyo bacita,”+ e fyo Yehova alanda.
12 “E ico mu nshila yabo mukatelela kabili mukafiita;+Bakabasunka kabili bakawa.
Pantu nkaleta ubucushi pali benaMu mwaka wa kubakanda,” e fyo Yehova alanda.
13 “Kabili muli bakasesema ba mu Samaria+ nimonamo ifya muselu.
Basesemena mwi shina lya kwa Baali,Kabili balalufya abantu bandi abena Israele.
14 Kabili muli bakasesema ba mu Yerusalemu nimonamo ifintu ifyabipa nga nshi.
Balacita ubucende+ kabili balabepa;+Balakoselesha abantu ukutwalilila ukucita ifyabipa,*Kabili tabafwaya ukuleka ukucita ifyabipa.
Kuli ine bonse baba nga Sodomu,+Kabili abekala mu musumba baba nga Gomora.”+
15 E ico Yehova wa mabumba alanda pali bakasesema ati:
“Moneni, ndelenga balye ifyalula nga nshiKabili ndebapeela amenshi umwaba sumu ukuti banwe.+
Pantu bakasesema ba mu Yerusalemu nabalenga ubusangu bwasalanganina mu calo conse.”
16 Yehova wa mabumba alanda ati:
“Mwilaumfwa ifilelanda bakasesema abalesesema kuli imwe.+
Balemulufya fye.*
Ifimonwa ifyo balandapo fya mu mitima yabo,+Tafifuma kuli Yehova.+
17 Pa miku iingi beba abansaalula abati,‘Yehova alanda ati: “Mukaba no mutende.”’+
Kabili beba onse uukonkelela umutima wakwe uushumfwa ati,‘Takuli icabipa nangu cimo icikakucitikila.’+
18 Pantu nani uwaiminina pa fibusa fya kwa YehovaPa kuti amone kabili omfwe ifyo alelanda?
Nani uwabika amano ku fyo alanda pa kuti afyumfwe?
19 Moneni! Ubukali bwa kwa Yehova bukema ngo mwela uukalamba;Bukema nga kankungwe, kabili bukesa pa mitwe ya bacita ifyabipa.+
20 Ubukali bwa kwa Yehova tabwakabwelelemoMpaka akacite no kufikilisha ifyo apanga mu mutima wakwe.
Mu nshiku sha ku mpela mukeshiba bwino bwino umo ifi filolele.
21 Nshatumine bakasesema, lelo balibutwike.
Nshalandile nabo, lelo baliseseme.+
22 Lelo nga baliminine pa fibusa fyandi,Nga balilengele abantu bandi baumfwa amashiwi yandiKabili nga balilengele bafuma mu nshila yabipa kabili baleka ukucita ifyabipa.”+
23 “Bushe mba fye Lesa nga ndi mupepi” e fyo Yehova alanda, “kabili bushe ndaleka ukuba Lesa nga ndi ukutali?”
24 “Bushe umuntu kuti afisama mu cifulo icafisama umo nshingamumona?”+ e fyo Yehova alanda.
“Bushe nshimona fyonse ifyaba mu myulu na pe sonde?”+ e fyo Yehova alanda.
25 “Ning’umfwa ifya bufi ifyo bakasesema basesemena mwi shina lyandi abati, ‘Nindoota iciloto! Nindoota iciloto!’+
26 Ni lilali bakasesema bakaleka ukutontonkanya pa kusesema ifya bufi? Ni bakasesema abasesema ifya bufi ifya mu mitima yabo.+
27 Bafwaya abantu bandi balaba ishina lyandi pa mulandu ne filoto ifyo baishimikila, nga filya fine bashibo balabile ishina lyandi pa mulandu wa kwa Baali.+
28 Lekeni kasesema uli ne ciloto ashimike iciloto cakwe, lelo uuli na mashiwi yandi, nalande amashiwi yandi mu cishinka.”
“Bushe impimbili shalicindamapo ukucila ingano?” e fyo Yehova alanda.
29 “Bushe amashiwi yandi tayaba fye ngo mulilo?”+ e fyo Yehova alanda, “kabili bushe tayaba nga sando iyo babomfya pa kutobaula icilibwe?”+
30 E ico Yehova alanda ati: “Ndelwisha bakasesema abaleibilana amashiwi yandi.”+
31 Yehova alanda ati, “Moneni, ndelwisha bakasesema ababomfya indimi shabo pa kulanda abati, ‘Ifi e fyo alanda!’”+
32 “Moneni ndelwisha bakasesema abalanda ifiloto fya bufi,” e fyo Yehova alanda, “abashimika ifiloto fya bufi kabili abalufya abantu bandi pa mulandu wa bufi ubo balanda, na pa mulandu wa kuti balayumfwa.”+
“Lelo te ine nabatumine nelyo ukubeba ifya kulanda. E ico tabakalenge ifintu fikawamine abantu bandi nangu fye panono,”+ e fyo Yehova alanda.
33 “Kabili abantu nelyo kasesema nelyo shimapepo nga bakwipusha abati, ‘Bushe icipe icafina* ica kwa Yehova ni cinshi?’ ufwile ukubasuka auti, ‘“Imwe bene mwe bantu nimwe icipe icafina! Kabili nkamupoosa,”+ e fyo Yehova alanda.’
34 Lelo kasesema nelyo shimapepo nangu abantu abakalanda abati, ‘Ici e cipe icafina* ica kwa Yehova!’ Nkakanda uyo muntu na ba mu ng’anda yakwe.
35 Ifi e fyo imwe bonse mweba umunenu na munyinenwe, ‘Bushe Yehova aswike shani? Kabili cinshi Yehova alandile?’
36 Lelo tamufwile ukulanda na kabili pa cipe icafina* ica kwa Yehova, pantu icipe icafina* mashiwi ayo cila muntu alanda, kabili mwalyalula amashiwi ya kwa Lesa wa mweo, Yehova wa mabumba, Lesa wesu.
37 “Ukepushe kasesema auti, ‘Yehova akwaswike shani? Kabili cinshi ico Yehova alandile?
38 Kabili nga mwatwalilila ukulanda amuti “Icipe icafina* ica kwa Yehova,” Yehova alanda ati: “Pa mulandu wa kuti mulelanda amuti, ‘Aya mashiwi cipe icafina* ica kwa Yehova,’ pa numa namweba ukuti, ‘Tamufwile ukulanda amuti: “Icipe icafina* ica kwa Yehova!”’
39 moneni! nkamwimya no kumupoosa ukutali sana ne cinso candi, imwe no musumba namupeele kabili uo napeele ifikolwe fyenu.
40 Kabili nkaleta pali imwe umusaalula wa muyayaya no museebanya wa muyayaya, kabili tamwakafilabe.”’”+
Amafutunoti
^ Nelyo “impyani.”
^ Nelyo “basangu.”
^ Mu ciHebere, “balakosha amaboko ya bacita ifyabipa.”
^ Nelyo “Balelenga mulecetekela ifishakacitike.”
^ Nelyo “amashiwi ayaba nge cipe icafina.” Ishiwi lya ciHebere ilyo bapilibula ukuti icipe icafina lilanda pa fintu fibili: “amashiwi ya bupingushi aya kwa Lesa ayafina” nelyo “icintu cimbi icafina.”
^ Nelyo “amashiwi ayaba nge cipe icafina.”
^ Nelyo “amashiwi ayaba nge cipe icafina.”
^ Nelyo “amashiwi ayaba nge cipe icafina.”
^ Nelyo “amashiwi ayaba nge cipe icafina.”
^ Nelyo “amashiwi ayaba nge cipe icafina.”
^ Nelyo “amashiwi ayaba nge cipe icafina.”
