Yeremia 28:1-17
-
Yeremia na kasesema wa bufi Hanania (1-17)
28 Mu mwaka umo wine ilyo imfumu Sidekia+ iya mu Yuda yatendeke ukuteka, mu mwaka walenga 4, mu mweshi walenga 5, kasesema Hanania umwana wa kwa Asuri uwa ku Gibeone,+ anjebele mu ng’anda ya kwa Yehova ninshi bashimapepo na bantu bonse baleumfwako ati:
2 “Yehova wa mabumba, Lesa wa kwa Israele alanda ati, ‘Nkakontola ikoli lya mfumu ya ku Babiloni.+
3 Ilyo imyaka* ibili ishilapwa, nkabwesesha kuli cino cifulo ifipe fyonse ifya mu ng’anda ya kwa Yehova ifyo imfumu Nebukadnesari iya ku Babiloni yafumishe muli cino cifulo no kufitwala ku Babiloni.’”+
4 “‘Kabili nkabwesesha na Yekonia+ umwana wa kwa Yehoyakimu+ imfumu ya mu Yuda kuli cino cifulo, pamo na baYuda bonse abayaba bankole ku Babiloni,’+ e fyo Yehova alanda, ‘pantu nkakontola ikoli lya mfumu ya ku Babiloni.’”
5 Lyena kasesema Yeremia alandile na kasesema Hanania ninshi bashimapepo na bantu bonse abaiminine mu ng’anda ya kwa Yehova baleumfwako.
6 Kasesema Yeremia alandile ati: “Ameni!* Yehova nacite ifyo fine! Yehova nafikilishe ifyo wasesema ukuti ifipe fya mu ng’anda ya kwa Yehova bakafifumya ku Babiloni no kufileta kuli cino cifulo pamo na bantu bonse abayaba bankole ku Babiloni!
7 Lelo amatwi yobe na matwi ya bantu bonse, nayomfwe ifyo nalalanda.
8 Kale bakasesema abaliko ilyo iwe na ine tushilabako, balesesema abati, mu fyalo ifingi na mu mabufumu ayakalamba mukaba inkondo, ubucushi ne cikuko.*
9 Kasesema nga asesema ukuti kukaba umutende, kabili ifyo asesema fyacitika, ninshi cikeshibikwa ukuti cine cine uwamutumine ni Yehova.”
10 Lyena kasesema Hanania afumishe ikoli pa mukoshi wa kwa kasesema Yeremia no kulikontola.+
11 Lyena Hanania alandile ninshi abantu bonse baleumfwako ati: “Yehova alanda ati, ‘Ifi fine e fyo nkacita ilyo imyaka ibili ishilapwa. Nkakontola ikoli lya mfumu Nebukadnesari iya ku Babiloni ilyo yabika pa mukoshi wa nko shonse.’”+ Kabili kasesema Yeremia alifuminepo aya.
12 Ilyo kasesema Hanania afumishe ikoli pa mukoshi wa kwa kasesema Yeremia no kulikontola, Yehova aebele Yeremia ati:
13 “Kabiye webe Hanania auti, ‘Yehova alanda ati: “Wakontola ikoli lya cimuti,+ nomba walapanga amakoli yambi aya cela.”
14 Pantu Yehova wa mabumba, Lesa wa kwa Israele alanda ati: “Nkabika ikoli lya cela pa mukoshi wa ishi inko shonse, pa kuti shikalebombela imfumu Nebukadnesari iya ku Babiloni; kabili shifwile fye ukulamubombela.+ Nkamupeela ne nama sha mu mpanga.”’”+
15 Lyena kasesema Yeremia aebele kasesema Hanania+ ati: “Umfwa iwe Hanania! Yehova te ukutumine, lelo naulenga aba bantu bacetekela ubufi.+
16 E ico Yehova alanda ati, ‘Mona! Ndekufumya pano calo. Uno mwaka ulefwa, pantu naulenga abantu bapondokela Yehova.’”+
17 E ico kasesema Hanania alifwile muli ulya wine mwaka, mu mweshi walenga 7.
