Yeremia 29:1-32
29 Aya e mashiwi yali muli kalata iyo kasesema Yeremia atumine ninshi ali mu Yerusalemu ku bakalamba abali pali bankole, kuli bashimapepo, kuli bakasesema na ku bantu bonse abo Nebukadnesari afumishe mu Yerusalemu no kubatwala ku Babiloni uko baileba bankole,
2 ilyo imfumu Yekonia,+ namfumu,+ ababomfi ba kwi sano, intungulushi sha mu Yuda na mu Yerusalemu, abaishibe ifya kupangapanga na balefula ifyela* bafumine mu Yerusalemu.+
3 Atumine Elasa umwana wa kwa Shafani+ na Gemaria umwana wa kwa Hilkia ukuti batwale iyi kalata ku Babiloni. Aba e bo Sidekia imfumu+ ya mu Yuda atumine ku mfumu Nebukadnesari iya ku Babiloni. Aya e mashiwi yali muli kalata:
4 “Yehova wa mabumba, Lesa wa kwa Israele, aeba bankole bonse abo alengele bafuma mu Yerusalemu no kuya ku Babiloni uko baileba bankole ati,
5 ‘Kuuleni amayanda no kwikalamo, limeni amabala no kulya ifisabo fya yako.
6 Upeni no kufyala abana abaume na bana abanakashi; fwaileni abana benu abaume, abanakashi bakuupa kabili ufyeni abana benu abanakashi pa kuti nabo bakwate abana abaume na bana abanakashi. Fuleni uko kwine, mwikacepa iyo.
7 Kabili mulecita ifingalenga mu musumba umo mwayaba bankole mwaba umutende, kabili muleupepelako kuli Yehova, pantu nga mwaba umutende na imwe mukaba no mutende.+
8 Pantu Yehova wa mabumba, Lesa wa kwa Israele alanda ati: “Mwileka bakasesema benu na babuka abo mwaba nabo bamubepe,+ kabili mwilakutika ku balelondolola ifiloto baloota.
9 Pantu ‘ifyo balesesemena mwi shina lyandi fya bufi. Te ine nabatumine,’+ e fyo Yehova alanda.”’”
10 “Pantu Yehova alanda ati, ‘Ilyo imyaka 70 ikakumana ninshi muli ku Babiloni, nkamubikako amano+ kabili nkafikilisha ifyo namulaile ukuti nkamubwesesha kuli cino cifulo.’+
11 “‘Pantu ninjishiba bwino ifyo ndetontonkanya ukumucitila,’ e fyo Yehova alanda, ‘ndetontonkanya ukumupeela umutende, te bucushi iyo,+ ukumupeela inshita ya ku ntanshi iisuma ne subilo.+
12 Kabili mukalilila kuli ine, mukesa no kupepa kuli ine, na ine nkomfwa kuli imwe.’+
13 “‘Mukamfwaya kabili mukansanga,+ pantu mukamfwaya no mutima wenu onse.+
14 Kabili nkaleka mukansange,’+ e fyo Yehova alanda. ‘Nkalonganika bankole benu bonse kabili nkamulonganika ukufuma mu nko shonse na mu fifulo fyonse umo namusalanganishishe,’+ e fyo Yehova alanda. ‘Kabili nkamubwesesha ku cifulo uko namufumishe ilyo nalengele mwayaba bankole ku calo cimbi.’+
15 Lelo mulandile amuti, ‘Yehova alitupeela bakasesema mu Babiloni.’
16 “Pantu Yehova aeba imfumu iyaikala pa cipuna ca bufumu ica kwa Davidi+ na bantu bonse abekala muli uno musumba, bamunyinenwe abashaile na imwe ku calo cimbi uko mwayaba bankole. Abeba ati,
17 ‘Yehova wa mabumba alanda ati: “Moneni, ndebatumina ulupanga, icipowe, ne cikuko,*+ kabili ndelenga babe nga makunyu ayabola* kabili ayabi ayo umuntu nangu umo ashingalya.”’+
18 “‘Nkabapepeka no lupanga,+ icipowe ne cikuko, kabili nkalenga bakabe ica kutiinya ku mabufumu yonse aya pano isonde,+ bakaba icitiipu ica kupapa kabili ica kulishisha umunsoli.+ Bakaseebana mu nko shonse isho nkabasalanganishishamo,+
19 pa mulandu wa kuti tabaumfwilile amashiwi yandi ayo ababomfi bandi bakasesema babebele,’ e fyo Yehova alanda, ‘abo naletuma pa miku iingi’*+
“‘Lelo twamwang’umfwilile,’+ e fyo Yehova alanda.
20 “E ico umfweni ifyo Yehova alanda imwe bankole bonse, mwebo afumishe mu Yerusalemu no kumutwala ku Babiloni.
21 Ifi e fyo Yehova wa mabumba, Lesa wa kwa Israele, alanda pali Ahabu umwana wa kwa Kolaya na pali Sidekia umwana wa kwa Maaseya, abalemusesemena ifya bufi mwi shina lyandi.+ ‘Moneni, ndebapeela mu minwe ya mfumu Nebukadnesari* iya ku Babiloni, kabili ikabepaya ninshi mulemonako.
22 Kabili ifikabacitikila, bankole bonse abaYuda mu Babiloni bakalafilandapo nga baletiipa, bakalalanda abati: “Yehova nalenge ube nga Sidekia na Ahabu, abo imfumu ya ku Babiloni yaocele!”
23 pantu nabaiseebanya mu Israele,+ balacita ubucende na bakashi ba banabo kabili balandila ifya bufi mwi shina lyandi, ifyo nshabebele.+
“‘“Nine naishiba kabili nine kambone,”+ e fyo Yehova alanda.’”
24 “Kabili webe Shemaya+ uwa ku Nehelamu auti,
25 ‘Yehova wa mabumba, Lesa wa kwa Israele alanda ati: “Pa mulandu wa kuti walitumiine amakalata mwi shina lyobe ku bantu bonse aba mu Yerusalemu, na kuli Sefania+ umwana wa kwa Maaseya shimapepo, na kuli bashimapepo bonse auti,
26 ‘Yehova nalenga waba shimapepo mu cifulo ca kwa Yehoyada shimapepo, pa kuti uleangalila ing’anda ya kwa Yehova, kabili ulemona umuntu onse uwapena uulecita nga kasesema, ukamubike mu makusu;*+
27 nomba cinshi ico mushikalipilile Yeremia uwa ku Anatote+ uulecita nga kasesema pa ntanshi yenu?+
28 Pantu alitutumiine na mashiwi mu Babiloni ati: “Pakapita inshita iitali! Kuuleni amayanda no kwikalamo, limeni amabala no kulya ifisabo fya yako,+—”’”’”
29 Ilyo Sefania+ shimapepo abelengele iyi kalata ninshi kasesema Yeremia aleumfwako,
30 Yehova aebele Yeremia ati:
31 “Tumina bankole bonse amashiwi ya kuti, ‘Yehova alanda pali Shemaya uwa ku Nehelamu ati: “Pa mulandu wa kuti Shemaya alimusesemene nangu ca kuti nshamutumine kabili alefwaya mucetekele ifya bufi,+
32 Yehova alanda ati, ‘Moneni, ndi no kukanda Shemaya uwa ku Nehelamu na batuntuka muli ena. Pa bantu bakwe tapakapusuke nangu umo; kabili takamone ifisuma ifyo nkacitila abantu bandi,’ e fyo Yehova alanda, ‘pantu nalenga abantu bapondokela Yehova.’”’”
Amafutunoti
^ Nelyo kuti yapilibula no kuti, “abalekuula amalinga ayakosa.”
^ Nelyo kuti yapilibula no kuti, “ayalepuka.”
^ Nelyo “ubulwele.”
^ Mu ciHebere, “nalecelela no kubatuma.”
^ Mu ciHebere, “Nebukadresari.” Inshila imbi iyo balelembelamo ili ishina.
^ Mu ciHebere, pali ici cikomo paba amashiwi yabili, ishiwi limo lilanda pa makusu ya kubikamo amakasa e lyo limbi lilanda pa makusu ya kubikamo amaboko no mukoshi.
