Yeremia 3:1-25
3 Abantu bepusha abati: “Nga ca kuti umulume atamfya umukashi wakwe, e lyo lilya amusha, ayaupwa ku mwaume umbi, bushe ulya mwaume kuti abwelela kuli ulya mwanakashi na kabili?”
Bushe cilya calo tabacikowesha?+
“Walicita bucilende na baume abengi,+Nomba bushe ufwile ukubwelela kuli ine?” e fyo Yehova alanda.
2 “Inuna amenso uloleshe utupili apashamena nangu fimo.
Ni pesa apo bashaulunganinapo na iwe?
Ubekalila mu mbali ya musebo,Ngo muntu uupitana fye mu matololo.*
Utwalilila fye ukukowesha icaloPa mulandu wa kuti ulacita bucilende ne fyabipa fimbi.+
3 E co imfula yalekela ukuloka,+Kabili e co kushabela imfula ya kulekelesha.
Icinso cobe caba nge ca* mukashi uucita bucilende.Ulakaana ukumfwa insoni.+
4 Lelo ulelilila kuli ine auti,‘Tata nimwe cibusa wandi uo natemwa ukutula ilyo nali umwaice!+
5 Bushe umuntu afwile ukutwalilila ukukalipa,Nelyo bushe afwile ukutwalilila ukwenda ne cintu ku mukoshi?’
Ifi e fyo ulanda,Lelo utwalilila fye ukucita ifyabipa fyonse ifyo wingakumanisha ukucita.”+
6 Mu nshiku sha mfumu Yoshia,+ Yehova anjebele ati: “Bushe walimona ifyo Israele uushaba na cishinka acita? Alacita bucilende+ pa mpili shonse ishitali na mwi samba lya cimuti conse icalelema.
7 Nangu ca kuti alecita ifi fyonse, lyonse nalemweba ukuti abwelele kuli ine,+ lelo tabwelele kuli ine; kabili Yuda alemona ifyo nkashi inankwe uwa bucenjeshi alecita.+
8 Ilyo namwene ifi, nalitamfishe Israele uushali ne cishinka kuli ine, nalimupeele icipepala ca kupwishishapo icupo,+ pa mulandu wa kuti alecita ubucende.+ Lelo nkashi inankwe Yuda uwa bucenjeshi tatiinine, na o aile mu kucita bucilende.+
9 Alemona filya alecita bucilende ukuti mulandu uunono, kabili atwalilile ukukowesha icalo no kucita ubucende na mabwe ne fimuti.+
10 Nangu cali ifi, Yuda nkashi inankwe uwa bucenjeshi tabwelele kuli ine no mutima wakwe onse, lelo alebepekesha fye ukuti nabwelela kuli ine,’ e fyo Yehova alanda.”
11 Lyena Yehova anjebele ati: “Israele uushaba ne cishinka nailanga* ukuti alilungama ukucila Yuda uwa bucenjeshi.+
12 Kabiye, kabilishe aya mashiwi ku kapinda ka ku kuso+ auti:
“‘“Bwela we Israele, we wampondokela,” e fyo Yehova alanda.’+ ‘“Nshakakuloleshe bukali bukali,*+ pantu ndi wa cishinka,” e fyo Yehova alanda.’ ‘“Nshakatwalilile ukukufulilwa.
13 Lelo sumina fye icilubo cobe, pantu walipondokela Yehova Lesa obe. Walitwalilila ukusalanganya icikuuku cobe* ku bantu bambi bambi* mwi samba lya fimuti fyonse ifyalelema, nomba tawaleumfwa ifyo nalekweba,” e fyo Yehova alanda.’”
14 “Bweleni imwe mwe bana abampondokela,” e fyo Yehova alanda. “Pantu nine fye shikulu* wenu; kabili nkamusenda, umo nkamufumya mu musumba e lyo babili mu lupwa, nkamuleta ku Sione.+
15 Kabili nkamupeela bakacema abakalacita ifyo umutima wandi ufwaya.+ Bakalenga mukabe na mano kabili mukaleiluka.
16 Muli shilya nshiku mukafula kabili mukatwala ifisabo mu calo,” e fyo Yehova alanda.+ “Tabakalande na kabili abati, ‘Icipao ca cipangano ica kwa Yehova!’ Tacakese mu mutima, tabakacibukishe nelyo ukucifuluka, kabili tabakacipange na kabili.
17 Pali ilya nshita baketa Yerusalemu ati, icipuna ca bufumu ica kwa Yehova;+ kabili inko shonse shikalongana pamo mu Yerusalemu+ pa kuti shikacindike ishina lya kwa Yehova, kabili bakaleka ukukonka imitima yabo iishumfwa kabili iyabipa.”
18 “Muli shilya nshiku aba mu ng’anda ya kwa Yuda na ba mu ng’anda ya kwa Israele+ bakendela pamo, bakafumina pamo mu calo ca ku kapinda ka ku kuso no kuyaingila mu calo ico napeele ifikolwe fyenu pa kuti cibe ubupyani bwa fiko.+
19 Kabili natontonkenye nati, ‘Namubikile pa bana abaume kabili namupeele icalo icisuma, ubupyani ubwawamisha mu nko!’*+ Natontonkenye no kuti mwakulanjita ati, ‘Tata!’ kabili tamwakaleke ukunkonka.
20 ‘Nga filya fine umwanakashi wa bucenjeshi asha umulume wakwe,* e fyo na imwe mwe ba mu ng’anda ya kwa Israele mwansha pa mulandu wa bucenjeshi bwenu,’+ e fyo Yehova alanda.”
21 Pa tupili apashaba nangu cimo paleumfwika ishiwi,Paleumfwika ukulila, no kupaapaata kwa bena Israele,Pantu balilenga inshila shabo shashokana;Balilaba Yehova Lesa wabo.+
22 “Bweleni mwe bana abampondokela.
Nkondapa bucipondoka bwenu.”+
“Moneni tuli pano! Natwisa kuli imwe,Pantu imwe mwe Yehova nimwe Lesa wesu.+
23 Twaleicusha fye filya twalepanga icongo pa tupili na pa mpili.+
Ca cine Yehova Lesa wesu e upususha Israele.+
24 Lelo icintu ca museebanya* calilya ifyo ifikolwe fyesu fyaleculila ukufuma fye ilyo twali abaice,+Impaanga shabo ne ng’ombe shabo,Abana babo abaume na bana babo abanakashi.
25 Natulaale panshi pa mulandu wa nsoni,Kabili umuseebanya nautufimbe,Pantu ukufuma ilyo twali abaice ukufika na buno bushiku,+Ifwe na bafyashi besu twalibembukila Yehova Lesa wesu,+Kabili tatumfwa ifyo Yehova Lesa wesu atweba.”
Amafutunoti
^ Nelyo “Ngo mwina Arabia.”
^ Mu ciHebere, “Impumi yobe imoneka nge ya.”
^ Nelyo “umweo wakwe nauilanga ukuti.”
^ Mu ciHebere, “Nshakalenge icinso candi cikawile pali iwe.”
^ Mu ciHebere, “inshila shobe.”
^ Nelyo “tulesa twa ku calo cimbi.”
^ Nelyo kuti yapilibula no kuti, “nine fye umulume wenu.”
^ Mu ciHebere, “mu bashilika ba nko.”
^ Mu ciHebere, “umunankwe.”
^ Nelyo “kalesa ka museebanya.”
