Yeremia 33:1-26
33 Yehova alilandile na Yeremia pa muku walenga bubili, ninshi bacili balimwisalila mu Lubansa lwa Balelonda,+ amwebele ati:
2 “Yehova uwabumbile isonde, Yehova uwalipangile no kulikosha; Yehova e shina lyakwe, alanda ati,
3 ‘Lilila kuli ine, na ine nalakwasuka kabili nalakweba ifintu ifikalamba ifyo ushingeluka kabili ifyo ushaishiba.’”+
4 “Pantu ifi e fyo Yehova Lesa wa kwa Israele alanda pa mayanda ya muli uno musumba na pa mayanda ya mfumu sha mu Yuda, ayo babongolola pa mulandu ne loba batuulika pa kuti basanse umusumba na pa mulandu wa lupanga,+
5 na pa baleisa mu kulwa na bena Kaldi. Nkesusha muli fino fifulo ifitumbi fya bantu abo nkepaya ninshi ninkalipa nga nshi, abacita ifyabipa ifyalenga imfise uno musumba icinso candi, alanda ati,
6 ‘Moneni ndeundapa umusumba no ku-upeela ubumi ubusuma,+ kabili nkabondapa no kubapeela umutende uwingi ne cine.+
7 Kabili nkabwesha bankole aba Yuda na bankole abena Israele,+ kabili nkabakuula nga filya nacitile pa kutendeka.+
8 Nkabasangulula na ku membu shonse isho bamembukila,+ nkabelela ne membu shabo shonse ne filubo ifyo bancita.+
9 Ishina lya musumba likalenga nkalesekelela, kabili umusumba ukalenga inko shonse isha pe sonde ishikomfwa pa fisuma ifyo nkacitila abantu bandi shikanumbanye no kuncindika.+ Kabili shikatiina no kututuma+ pa mulandu ne fisuma fyonse no mutende ifyo nkaleta pali uyu musumba.’”+
10 “Yehova alanda ati: ‘Muli cino cifulo ico mukalaita ati icibolya, umushaba umuntu nelyo icitekwa, mu misumba ya mu Yuda na mu misebo ya Yerusalemu ifyashala icibolya, umushaba umuntu nelyo uwikalamo nangu icitekwa, abantu bakomfwa na kabili
11 amashiwi ya bantu abalesekelela+ kabili abalesansamuka, ishiwi lya kwa shibwinga ne lya kwa nabwinga, amashiwi ya balelanda abati: “Lumbeni Yehova wa mabumba, pantu Yehova musuma;+ ukutemwa kwakwe ukushipwa kwa muyayaya!”’+
“‘Bakaleta imituulo ya kutootela mu ng’anda ya kwa Yehova,+ pantu nkabwesha bankole ba mu calo nga filya nacitile pa kutendeka,’ e fyo Yehova alanda.”
12 “Yehova wa mabumba alanda ati, ‘Muli cino calo icashala icibolya umushaba abantu ne fitekwa, kabili na mu misumba ya ciko yonse, mukaba na kabili impanga sha mulemfwe umo bakacema bakalatwala impaanga shabo.’+
13 “‘Mu misumba ya mu citungu ca mpili, mu misumba ya mu mpanga iyabatama, mu misumba ya ku kapinda ka ku kulyo, mu calo ca kwa Benjamini, mu ncende ishashinguluka Yerusalemu,+ na mu misumba ya mu Yuda,+ impaanga shikapita na kabili mwi samba lya maboko ya uleshipenda,’ e fyo Yehova alanda.”
14 “‘Moneni! Inshiku shileisa,’ e fyo Yehova alanda, ‘ilyo nkafikilisha ifisuma ifyo nalaile ukucitila aba mu ng’anda ya kwa Israele na ba mu ng’anda ya kwa Yuda.+
15 Mu nshiku shilya na pa nshita ilya, nkalenga umusambo* ukapuukile Davidi,+ umusambo uwalungama, kabili akalenga mu calo mukabe umulinganya no bulungami.+
16 Mu nshiku shilya Yuda bakamupususha+ kabili Yerusalemu akekala umutende.+ Kabili bakalamwita abati: Yehova E Bulungami Bwesu.’”+
17 “Pantu Yehova alanda ati: ‘Takwakabe inshita ilyo kushakabe uukatuntuka muli Davidi uwa kwikala pa cipuna ca bufumu ica ba mu ng’anda ya kwa Israele,+
18 kabili takwakabe inshita ilyo pali bashimapepo abena Lebi tapakabe umuntu uwa kwiminina pa cinso candi pa kuti atuule imituulo ya koca, afutumune icushi ca mituulo ya ngano no kutuula amalambo.’”
19 Yehova alilandile na Yeremia na kabili, amwebele ati:
20 “Yehova alanda ati, ‘Nga ca kutila kuti mwatoba icipangano napangana na kasuba ne co napangana no bushiku, pa kuti akasuba no bushiku fiilabako pa nshita ya fiko,+
21 ninshi icipangano napangana no mubomfi wandi Davidi kuti catobeka,+ ica kutila te kuti akwate umwana umwaume uwa kuteka pa cipuna cakwe ica bufumu,+ kabili ne cipangano napangana na bashimapepo abena Lebi, ababomfi bandi+ kuti catobeka.
22 Nga filya fine ifya mu muulu no mucanga wa mu lulamba lwa bemba bashingafipenda, e fyo nkafusha abana* ba kwa Davidi umubomfi wandi na bena Lebi abamombela.’”
23 Yehova alilandile na Yeremia na kabili, amwebele ati:
24 “Bushe taumfwile ifyo abantu balelanda abati, ‘Yehova akakaana indupwa shibili isho asalile’? Balesaalula abantu bandi, kabili balileka ukubamona ukuti luko.
25 “Yehova alanda ati, ‘Nga filya fine nabikako icipangano ca kasuba no bushiku,+ na mafunde* ayo umuulu ne sonde fikonka,+
26 nshakakaane abana* ba kwa Yakobo na bana* ba kwa Davidi umubomfi wandi, pa kuti nkabuule pa bana bakwe abakalateka abakatuntuka* muli Abrahamu, muli Isaki na muli Yakobo. Pantu nkalonganika bankole babo+ no kubabwesha kabili nkababelela uluse.’”+
Amafutunoti
^ Nelyo “impyani.”
^ Mu ciHebere, “ulubuto.”
^ Nelyo “ifipope.”
^ Mu ciHebere, “ulubuto.”
^ Mu ciHebere, “ulubuto.”
^ Mu ciHebere, “ulubuto.”
