Yeremia 34:1-22
34 Yehova alilandile na Yeremia, ilyo Nebukadnesari* Imfumu ya ku Babiloni na bashilika bakwe bonse na ma bufumu yonse aya pe sonde ayo aleteka na bantu bonse balelwisha Yerusalemu ne misumba ya iko yonse,+ amwebele ati:
2 “Yehova Lesa wa kwa Israele alanda ati, ‘Kabiye, kebe Sidekia+ Imfumu ya mu Yuda auti: “Yehova alanda ati, ‘Mona, ndepeela uno musumba mu minwe ya mfumu ya ku Babiloni kabili ikaoca.+
3 Tawakafyuke mu minwe ya iko, pantu bakakwikata no kukutwala kuli yena.+ Kabili mukaloleshanya nayo. Ikalanda na iwe icinso ne cinso, kabili ukaya ku Babiloni.’+
4 Lelo umfwa ifyo Yehova alanda we mfumu Sidekia iya mu Yuda, ‘Yehova alanda pali iwe ati: “Tawakafwe ku lupanga.
5 Ukafwa fye umutende,+ kabili bakakocela ifyanunkila ifyo baocelele ifikolwe fyobe, imfumu ishaliko ilyo ushilabako, kabili bakakuloosha abati, ‘Cabipa mwe shikulu!’ pantu ‘ninanda ifikakucitikila,’ e fyo Yehova alanda.”’”’”
6 Lyena kasesema Yeremia aebele Imfumu Sidekia iya mu Yuda aya amashiwi yonse mu Yerusalemu,
7 ilyo abashilika ba mfumu ya ku Babiloni balelwisha Yerusalemu ne misumba yonse iya mu Yuda iyasheleko,+ e kutila Lakishi+ na Aseka;+ pantu e misumba ya malinga ayakosa iyashelepo fye pa misumba ya mu Yuda.
8 Yehova alandile na Yeremia ilyo Imfumu Sidekia yapangene icipangano na bantu bonse abali mu Yerusalemu, ica kubilisha ukuti baleke abasha baye.+
9 Umuntu onse afwile ukuleka umusha wakwe umuHebere, umwaume no mwanakashi aye, pa kuti kwiba nangu umo uulekwata umusha umuYuda munankwe.
10 E ico intungulushi shonse na bantu bonse balyumfwilile. Balipangene icipangano ca kuti umuntu onse afwile ukuleka umusha wakwe umwaume no mwanakashi aya, kabili tabalingile ukubaleka batwalilila kuba abasha babo. Balyumfwilile kabili balibalekele baya.
11 Lelo pa numa balibweseshe abasha babo abaume na banakashi abo balekele baya, kabili balibapatikishe ukuba abasha na kabili.
12 E ico amashiwi ya kwa Yehova yaishile kuli Yeremia ukufuma kuli Yehova, yaleti:
13 “Yehova Lesa wa kwa Israele alanda ati, ‘Nalipangene icipangano ne fikolwe fyenu+ pa bushiku nabafumishe mu calo ca Egupti, mu ng’anda ya busha,+ napangene nabo ati:
14 “Imyaka 7 nga yapwa, bonse mufwile ukuleka munyinenwe umuHebere uo mwashitile kabili uwamubombela imyaka 6; mufwile ukumuleka aya.”+ Lelo ifikolwe fyenu tafyang’umfwilile kabili tafyabikileko amano.
15 Kabili papitile fye inshita iinono* mwalipilibwike kabili mwalicitile icalungama mu menso yandi ilyo mwalekele abantu banenu baya, kabili mwalipangene icipangano pa ntanshi yandi mu ng’anda iyainikwa ishina lyandi.
16 Lelo mwalyaluka kabili mwalisaalula ishina lyandi+ pantu mwalibwesha abasha benu abaume na banakashi abo mwalekele baye ukulingana ne fyo balefwaya,* kabili mwalibapatikishe ukuba abasha na kabili.’
17 “E ico Yehova alanda ati, ‘Tamwang’umfwila pantu tamwaleka munyinenwe no muntu munenu aya,+ e ico nkaleka mukaye,’ e fyo Yehova alanda, ‘ilyo ulupanga, icikuko* ne cipowe+ fikamwipaya, kabili nkalenga mukabe ica kutiinya ku mabufumu yonse aya pe sonde.+
18 Kabili ifi e fikacitikila abatobele icipangano candi, abashakonkele amashiwi yali mu cipangano bapangene pa ntanshi yandi. Baputwile ing’ombe iyana pa kati no kupita pa kati ka fipimfya fibili,+
19 e kutila intungulushi sha mu Yuda, intungulushi sha mu Yerusalemu, ababomfi ba kwi sano, bashimapepo na bantu bonse aba mu calo abapitile pa kati ka fipimfya fya ng’ombe iyana.
20 Nkalenga abalwani babo abafwaya imyeo yabo bakabacimfye, kabili ifitumbi fyabo fikaba ifya kulya fya fyuni fya mu lwelele ne fya nama sha pe sonde.+
21 Kabili nkapeela Imfumu Sidekia iya mu Yuda ne ntungulushi sha iko mu minwe ya balwani babo abafwaya ukulofya imyeo yabo, na mu minwe ya bashilika ba mfumu ya ku Babiloni+ abalekele ukumulwisha.’+
22 “‘Moneni nkatuma amashiwi,’ e fyo Yehova alanda, ‘kabili nkababwesesha kuli uno musumba, nabo bakaulwisha no ku-ucimfya kabili bakaoca;+ nkalenga ne misumba ya mu Yuda ikabe icibolya, tamwakekale nangu umo.’”+
Amafutunoti
^ Mu ciHebere, “Nebukadresari.” Inshila imbi iyo balelembelamo ili shina.
^ Mu ciHebere, “buno bushiku.”
^ Nelyo “ukulingana ne fyo umweo wabo walefwaya.”
^ Nelyo “ubulwele.”
