Yeremia 35:1-19
-
Abena Rekabu bali sana ne cumfwila (1-19)
35 Yehova alilandile na Yeremia ilyo Yehoyakimu+ umwana wa kwa Yoshia, imfumu ya mu Yuda aleteka, amwebele ati:
2 “Kabiye ku ba mu ng’anda ya bena Rekabu,+ uye ulande nabo kabili ubalete mu ng’anda ya kwa Yehova, mu muputule umo uwa kuliilamo; lyena ubapeele umwangashi pa kuti banwe.”
3 E ico nasendele Yaasania umwana wa kwa Yeremia, umwana wa kwa Habasinia, bamunyina, abana bakwe bonse abaume na bonse aba mu ng’anda ya bena Rekabu.
4 Nabengishe mu ng’anda ya kwa Yehova. Mu muputule wa kuliilamo uwa bana ba kwa Hanani umwana wa kwa Igidalia, umuntu wa kwa Lesa wa cine, umuputule uwali mupepi no muputule wa kuliilamo intungulushi uwali pa muulu wa muputule wa kuliilamo uwa kwa Maaseya umwana wa kwa Shalumu, uwalelonda pa mwinshi.
5 Lyena naiswishe umwangashi mu makapu na mu fya kunwenamo fimbi, nauletele pa ntanshi ya baume ba mu ng’anda ya bena Rekabu, kabili nabebele nati: “Nweni umwangashi.”
6 Lelo balandile abati: “Tatwanwe umwangashi, pantu Yehonadabu*+ umwana wa kwa Rekabu, icikolwe cesu, atupeele ifunde lya kuti, ‘Imwe na bana benu tamufwile ukunwa umwangashi.
7 Kabili tamufwile ukukuula amayanda nelyo ukubyala imbuto, nangu ukulima amabala ya myangashi, nelyo ukukwata amabala ya myangashi. Lelo lyonse muleikala mu matenti, pa kuti mukekale inshiku ishingi mu calo umo muleikala pantu muli ba ku calo cimbi.’
8 E ico tukonka ifunde Yehonadabu umwana wa kwa Rekabu icikolwe cesu atupeele, ilya kuti ifwe, abakashi besu, abana besu abaume na bana besu abanakashi, tatufwile ukunwa umwanganshi uli onse.
9 Kabili tatukuula amayanda aya kuti tuleikalamo. Tatwakwata amabala ya myangashi nelyo amabala ya fisabo fimbi ne mbuto.
10 Twikala mu matenti kabili tulakonka fyonse ifyo Yehonadabu* icikolwe cesu atwebele.
11 Lelo ilyo Imfumu Nebukadnesari* iya ku Babiloni yaishile ku kulwisha icalo,+ twalandile atuti, ‘Iseni, natuyeingila mu Yerusalemu pa kuti tufulumuke abashilika ba bena Kaldi na ba bena Siria, kabili nomba twikala mu Yerusalemu.’”
12 Kabili Yehova aebele Yeremia ati:
13 “Yehova wa mabumba, Lesa wa kwa Israele alanda ati, ‘Kabiye, kebe abaYuda na bekala mu Yerusalemu ati: “Bushe lyonse nshalemweba ukuti mulecita ifyo mweba?”+ e fyo Yehova alanda.
14 “Yehonadabu umwana wa kwa Rekabu aebele abatuntwike muli ena ukuti belanwa umwangashi, kabili balakonka ifyo abebele. Tabanwa umwangashi ukufika na buno bushiku, balakonka ifunde ilyo icikolwe cabo+ cabapeele. Nomba ine nalilanda na imwe pa miku iingi,* lelo tamung’ufwila.+
15 Kabili pa miku iingi* nalemutumina+ ababomfi bandi bonse bakasesema, nabo balemweba ukuti, ‘Lekeni imisango yenu iyabipa,+ kabili mulecita ifisuma! Mwilapepa balesa bambi no kubabombela. Lyena mukekala mu calo ico namupeele pamo ne fikolwe fyenu.’+ Lelo tamwabikileko amano kabili tamwang’umfwilile.
16 Abatuntuka muli Yehonadabu umwana wa kwa Rekabu balakonka ifunde ilyo icikolwe cabo cabapeele,+ lelo aba bantu tabang’umfwila.”’”
17 “E ico Yehova, Lesa wa mabumba, Lesa wa kwa Israele alanda ati: ‘Moneni, ndeletela Yuda na bonse abekala mu Yerusalemu ubucushi bonse ubo nabasokelepo ukuti nkabaletela,+ pantu nalilandile nabo lelo tabaleumfwa, nalebeta lelo tabaleasuka.’”+
18 Kabili Yeremia aebele aba mu ng’anda ya bena Rekabu ati: “Yehova wa mabumba, Lesa wa kwa Israele alanda ati, ‘Pa mulandu wa kuti mulakonka ifunde ilyo Yehonadabu icikolwe cenu amupeele, kabili mwalitwalilila ukukonka amafunde yakwe yonse no kucita filya fine fye amwebele ukuti e fyo mulecita,
19 Yehova wa mabumba, Lesa wa kwa Israele alanda ati: “Lyonse mu batuntuka muli Yehonadabu* umwana wa kwa Rekabu mukalaba umuntu uukalabombela pa cinso candi.”’”
Amafutunoti
^ Mu ciHebere, “Yonadabu.” Ifi e fyo balemba ishina lya kuti Yehonadabu mu kwipifya.
^ Mu ciHebere, “Yonadabu.” Ifi e fyo balemba ishina lya kuti Yehonadabu mu kwipifya.
^ Mu ciHebere, “Nebukadresari.” Inshila imbi iyo balelembelamo ili ishina.
^ Mu ciHebere, “nalecelela no kulanda na imwe.”
^ Mu ciHebere, “nalecelela no kubatuma.”
^ Mu ciHebere, “Yonadabu.” Ifi e fyo balemba ishina lya kuti Yehonadabu mu kwipifya.
