Yeremia 36:1-32
36 Nomba mu mwaka walenga 4 ukutula apo Yehoyakimu+ umwana wa kwa Yoshia, imfumu ya mu Yuda atendekeele ukuteka, Yehova aebele Yeremia aya amashiwi:
2 “Buula icimfungwa* no kulembamo amashiwi yonse aya bupingushi ayo nakwebele pali Israele na pali Yuda+ na pa nko shonse,+ ukutula pa bushiku bwa kubalilapo ilyo nalandile na iwe mu nshiku Yoshia aleteka, ukufika na buno bushiku.+
3 Nalimo aba mu ng’anda ya kwa Yuda kuti baumfwa ubucushi bonse ubo ndepanga ukubaletela, ica kutila kuti baleka ukucita ifyabipa, na ine kuti nabeleela ifilubo fyabo ne membu shabo.”+
4 Lyena Yeremia aitile Baruki+ umwana wa kwa Neria, kabili Yeremia alyebele Baruki amashiwi yonse ayo Yehova amwebele, kabili Baruki aleyalemba mu cimfungwa.*+
5 Lyena Yeremia aebele Baruki ati: “Ine balinkaanya ukwingila mu ng’anda ya kwa Yehova.
6 E ico niwe ufwile ukuyaingilamo no kubelenga mwi shiwi ilikalamba amashiwi ya kwa Yehova ayo nacikweba kabili ayo ulembele mu cimfungwa. Ukabelengele abantu pa ng’anda ya kwa Yehova pa bushiku bakalafunga; e ico ukabelengela abantu bonse aba mu Yuda, abakesa ukufuma mu misumba yabo.
7 Nalimo ifyo balelomba ukuti Yehova ababelele uluse fikafika kuli ena kabili umuntu umo na umo akaleka ukucita ifyabipa, pantu ubukali ubo Yehova akwatile aba bantu bukalamba.”
8 E ico Baruki umwana wa kwa Neria alicitile fyonse ifyo kasesema Yeremia amwebele; alibelengele amashiwi ya kwa Yehova mu cimfungwa* ninshi nasansula ishiwi mu ng’anda ya kwa Yehova.+
9 Nomba mu mwaka walenga 5 ukutula apo Yehoyakimu+ umwana wa kwa Yoshia, imfumu ya mu Yuda atendekeele ukuteka, mu mweshi walenga 9, abantu bonse mu Yerusalemu na bantu bonse abaishile mu Yerusalemu ukufuma mu misumba ya mu Yuda babilishe abati nakube ukufunga pa ntanshi ya kwa Yehova.+
10 Lyena Baruki abelengele amashiwi ya kwa Yeremia mu cimfungwa* ninshi nasansula ishiwi mu ng’anda ya kwa Yehova, mu muputule* wa kwa Gemaria+ umwana wa kwa Shafani+ uwalekopolola amafunde,* mu lubansa ulwali pa muulu, pa mwinshi wa mpongolo iipya iya ng’anda ya kwa Yehova,+ ninshi abantu bonse baleumfwa.
11 Ilyo Mikaya umwana wa kwa Gemaria, umwana wa kwa Shafani aumfwile amashiwi yonse aya kwa Yehova ayali mu cimfungwa,*
12 aile ku ng’anda* ya mfumu, mu muputule wa kwa kalemba. Mulya e mo intungulushi* shonse shaikele, e kutila Elishama+ kalemba, Delaya umwana wa kwa Shemaya, Elnatani+ umwana wa kwa Akbore,+ Gemaria umwana wa kwa Shafani, Sidekia umwana wa kwa Hanania ne ntungulushi shimbi.
13 Mikaya alibebele amashiwi yonse ayo aumfwile ilyo Baruki alebelengela abantu ifyali mu cimfungwa.*
14 Lyena intungulushi shonse shatumine Yeudi umwana wa kwa Netania umwana wa kwa Shelemia umwana wa kwa Kushi kuli Baruki, ku kuyamweba ati : “Isa ne cimfungwa ico wacibelengela abantu.” E ico Baruki umwana wa kwa Neria alisendele icimfungwa mu minwe yakwe no kuya uko bali.
15 Bamwebele abati: “Ikalako, kabili tubelengele ifili mu cimfungwa.” E ico Baruki alibabelengeele.
16 Nomba ilyo fye baumfwile amashiwi yonse ayali mu cimfungwa, baliloleshenye ninshi nabomfwa umwenso, kabili baebele Baruki abati: “Tufwile ukweba imfumu aya mashiwi yonse.”
17 Kabili baipwishe Baruki abati: “Twebe ifyo walembele aya amashiwi yonse. Bushe ni Yeremia alelanda e lyo ulelemba?”
18 Baruki abaswike ati: “E wanjebele aya mashiwi yonse kabili nabomfeshe inki pa kuyalemba muli ici cimfungwa.”*
19 Intungulushi shaebele Baruki ashiti: “Kabiye, kafisame na Yeremia, kabili mwileka umuntu nangu umo eshibe uko mwalafisama.”+
20 Lyena baile mu lubansa umwali imfumu, kabili babikile icimfungwa mu muputule wa kwa Elishama kalemba, kabili balyebele imfumu fyonse ifyo baumfwile.
21 E ico imfumu yatumine Yeudi+ kuti aye asende icimfungwa, na o alile cisenda mu muputule wa kwa Elishama kalemba. Yeudi atendeke ukubelengela imfumu ne ntungulushi shonse ishaiminine mupepi nayo, ifyali mu cimfungwa.
22 Imfumu yaikele mu ng’anda yaleikalamo mu nshita ya mpepo, mu mweshi uwalenga 9,* ninshi imbabula apali umulilo ili pa ntanshi ya iko.
23 Yeudi nga abelenga fye imilongo ya mashiwi itatu nelyo 4, imfumu yaleputulako icimfungwa apaleba iyo imilongo ukubomfya umwele wa kwa kalemba, kabili yalecipoosa pa mulilo uwali pa mbabula, mpaka yaoca icimfungwa conse.
24 Kabili tabaumfwile umwenso; imfumu na babomfi ba iko bonse abaumfwile amashiwi yonse aya tabalepwile ne fya kufwala fyabo.
25 Nangu ca kuti Elnatani,+ Delaya+ na Gemaria+ balipaapeete imfumu ukuti ioca icimfungwa, tayabomfwilile.
26 Ne mfumu yaebele Yeraameele umwana wa mfumu, Seraya umwana wa kwa Asriele na Shelemia umwana wa kwa Abdeele ukuti bayeikata Baruki kalemba na kasesema Yeremia. Lelo Yehova alibafishile.+
27 Yehova alilandile na Yeremia na kabili ilyo imfumu yaocele icimfungwa umwali amashiwi ayo Yeremia aebele Baruki ukulemba,+ amwebele ati:
28 “Buula icimfungwa cimbi, ulembemo amashiwi yamo yene ayali mu cimfungwa ca kubalilapo, ico imfumu Yehoyakimu iya mu Yuda yaocele.+
29 Kabili webe imfumu Yehoyakimu iya mu Yuda auti, ‘Yehova alanda ati: “Naoca icimfungwa, kabili ulandile auti, ‘Cinshi walembeele mu cimfungwa ati: “Nangu cibe shani imfumu ya ku Babiloni ikonaula cino calo kabili ikalofya abantu ne nama”?’+
30 E ico Yehova alanda pa mfumu Yehoyakimu iya mu Yuda ati, ‘Pa bakatuntuka muli ena tapakabe nangu umo uukekala pa cipuna ca bufumu ica kwa Davidi,+ kabili tabakamushiike. Icitumbi cakwe cikalaba pa kasuba mu nshita ya kasuba na mu mpepo mu nshita ya bushiku.+
31 Nkamukanda kumo na batuntuka muli ena* na babomfi bakwe pa filubo fyabo, kabili nkaleta pali bena na pa bekala mu Yerusalemu na pa bekala mu Yuda ubucushi bonse ubo nalandile ukuti nkabaletela,+ lelo tabaumfwile.’”’”+
32 Lyena Yeremia abuulile icimfungwa cimbi no kupeela Baruki umwana wa kwa Neria, kalemba,+ kabili Yeremia atendeke ukulanda amashiwi yonse ayali mu cimfungwa ico Yehoyakimu imfumu ya mu Yuda aocele;+ e lyo Baruki aleyalemba mu cimfungwa.* Alilembelemo amashiwi na yambi ayo Lesa alandile.
Amafutunoti
^ Mu ciHebere, “icimfungwa ce buuku.”
^ Mu ciHebere, “icimfungwa ce buuku.”
^ Nelyo “ibuuku.”
^ Nelyo “ibuuku.”
^ Nelyo “umuputule wa kuliilamo.”
^ Nelyo “kalemba.”
^ Nelyo “ibuuku.”
^ Nelyo “ababomfi ba kwi sano.”
^ Nelyo “isano.”
^ Nelyo “ibuuku.”
^ Nelyo “mwi buuku.”
^ Imilungu ibili iya kulekeleshako iya mweshi wa November ne milungu ibili iya kubalilapo iya mweshi wa December, moneni Ifyebo Fyalundwako pa B15.
^ Mu ciHebere, “ulubuto.”
^ Nelyo “ibuuku.”
