Yeremia 38:1-28
38 Nomba Shefatia umwana wa kwa Matani, Gedalia umwana wa kwa Pashihuri, Yukali+ umwana wa kwa Shelemia na Pashihuri+ umwana wa kwa Malkiya, balyumfwile ifyo Yeremia ale-eba abantu bonse ati:
2 “Yehova alanda ati, ‘Onse uukatwalilila ukwikala muli uno musumba akafwa ku lupanga, ku cipowe na ku cikuko.*+ Lelo uukayacimba* ku bena Kaldi akatwalilila ukuba no mweo. Ubumi* bwakwe bukaba nge co bapokolola abo bacimfya* kabili takafwe.’+
3 Yehova alanda ati, ‘Nangu cibe shani uno musumba bakaupeela mu minwe ya mfumu ya ku Babiloni kabili ikaucimfya.’”+
4 Intungulushi shaebele imfumu ashiti: “Ipayeni uyu muntu,+ pantu ale-eba abashilika abashalapo muli uno musumba na bantu bonse aya amashiwi pa kuti abafuupule.* Pantu uyu muntu tafwaya abantu baba no mutende, lelo afwaya ifyabipa fyabacitikila.”
5 Imfumu Sidekia yabebele aiti: “Moneni! Ali mu minwe yenu, pantu imfumu te kuti imuleshe ifyo mulefwaya ukucita.”
6 E ico balisendele Yeremia no kuyamwingisha mu cishima ca kwa Malkiya umwana wa mfumu, icali mu Lubansa lwa Balelonda.+ Babomfeshe intambo pa kwingisha Yeremia mu cishima. Nomba mu cishima tamwali amenshi, mwali fye amatipa. E ico Yeremia atendeke ukutika mu matipa.
7 Ebede-meleke+ mutungwi* umwina Etiopia, uwalebombela mu ng’anda ya mfumu,* alyumfwile ukuti nabengisha Yeremia mu cishima. Nomba imfumu yaikele mu Mpongolo ya kwa Benjamini.+
8 E ico Ebede-meleke afumine mu ng’anda ya mfumu* no kuyaeba imfumu ati:
9 “Shikulu mwe mfumu, ifyo aba baume bacitile Yeremia tafiweme! Nabamupoosa mu cishima, kabili alafwila mulya mwine pa mulandu wa cipowe, pantu mu musumba tamuli umukate.”+
10 Lyena imfumu yaebele Ebede-meleke umwina Etiopia aiti: “Senda abaume 30, muyefumya Yeremia mu cishima ilyo ashilafwa.”
11 E ico Ebede-meleke alisendele abaume, baya mu ng’anda ya mfumu* mu muputule uwali panshi ya mo balesungila ifyuma,+ kabili babuulile insalu ishapwa ne nsamu, bafikaka ku ntambo e lyo bafingisha mu cishima umwali Yeremia.
12 Lyena Ebede-meleke umwina Etiopia aebele Yeremia ati: “Bika insamu ne nsalu mu mapa yobe apo intambo shalapita.” Ifi fine e fyo Yeremia acitile,
13 kabili batintiile Yeremia ku ntambo no kumufumya mu cishima. Kabili Yeremia aleikala mu Lubansa lwa Balelonda.+
14 Imfumu Sidekia yatumine aba kuyaeba kasesema Yeremia ati aye ukwali imfumu, ku mwinshi walenga butatu uwa ng’anda ya kwa Yehova, kabili imfumu yaebele Yeremia ati: “Kuli ifyo ndefwaya ukukwipusha. Wimfisa nangu cimo.”
15 Lyena Yeremia aebele Sidekia ati: “Nga nakweba, nangu cibe shani walanjipaya. Kabili nga nakupanda amano tawang’umfwile.”
16 E ico Imfumu Sidekia yalapile kuli Yeremia mu bumfisolo aiti: “Na pali Yehova uwatupeele ubumi,* nshakwipaye kabili nshakupeele mu minwe ya aba bantu abalefwaya ukukwipaya.”*
17 Lyena Yeremia aebele Sidekia ati: “Yehova Lesa wa mabumba, Lesa wa kwa Israele alanda ati, ‘Nga wacimba* kuli bacilolo ba mfumu ya ku Babiloni, tabakakwipaye,* kabili uno musumba tabakaoce, kabili iwe na ba mu ng’anda yobe tabakamwipaye.+
18 Lelo nga tawakacimbe* kuli bacilolo ba mfumu ya ku Babiloni, uno musumba bakaupeela mu minwe ya bena Kaldi, kabili bakaoca,+ na iwe tawakapusuke mu minwe yabo.’”+
19 Lyena Imfumu Sidekia yaebele Yeremia ati: “Ndetiina abaYuda abailundile ku bena Kaldi, pantu nga bampeela mu minwe yabo, kuti bancusha nga nshi.”
20 Lelo Yeremia ayebele ati: “Tabakakupeele mu minwe yabo. Konka ifyo ndekweba ifyo Yehova alandile, kabili ifintu fikakuwamina, tabakakwipaye.*
21 Lelo nga wakaana ukucimba,* ifi e fyo Yehova anangile ukuti e fikakucitikila:
22 Mona! abanakashi bonse abashalapo mu ng’anda ya mfumu* ya mu Yuda balebatwala kuli bacilolo ba mfumu ya ku Babiloni,+ kabili balelanda abati,‘Abantu abo mwacetekela* nabamubepa no kumucimfya.+
Nabalenga amakasa yenu yatika mu matipa.
Nomba nabamusha.’
23 Kabili abakashi bobe bonse na bana bobe abaume bakabatwala ku bena Kaldi, kabili tawakapusuke mu minwe yabo, lelo imfumu ya ku Babiloni ikakwikata,+ kabili uno musumba bakaoca pa mulandu obe.”+
24 Lyena Sidekia aebele Yeremia ati: “Wileka umuntu nangu umo eshibe ifi wanjeba pa kuti bekwipaya.
25 Kabili intungulushi nga shaumfwa ukuti nacilalanda na iwe, kabili shaisa kuli iwe no kukweba ati, ‘Twebe ifyo wacilaeba imfumu. Witufisa nangu cimo kabili tatwakwipaye.+ Finshi imfumu yacikweba?’
26 ubasuke auti, ‘Nacilapaapaata imfumu ukuti imbwesesha ku ng’anda ya kwa Yehonatani pa kuti nikafwila kulya.’”+
27 Ilyo papitileko inshita, intungulushi shaile kuli Yeremia kabili shalimwipwishe. Na o alishebele fyonse ifyo imfumu yamwebele ukusheba. E ico shaikele fye tondolo, pantu pali shena tapali nangu umo uwaumfwileko ifyo Yeremia alelanshanya ne mfumu.
28 Yeremia atwalilile ukwikala mu Lubansa lwa Balelonda+ mpaka no bushiku Yerusalemu baicimfishe; e ko ali ilyo Yerusalemu baicimfishe.+
Amafutunoti
^ Nelyo “ubulwele.”
^ Mu ciHebere, “uukaya.”
^ Nelyo “umweo.”
^ Nelyo “akafulumuka no mweo wakwe.”
^ Mu ciHebere, “pa kuti anashe amaboko yabo.”
^ Nelyo “umubomfi wa kwi sano.”
^ Nelyo “mwi sano.”
^ Nelyo “mwi sano.”
^ Nelyo “mwi sano.”
^ Nelyo “abalefwaya umweo obe.”
^ Nelyo “uwatupangiile uyu umweo.”
^ Mu ciHebere, “nga waya.”
^ Nelyo “umweo obe tawakafwe.”
^ Mu ciHebere, “nga tawakaye.”
^ Nelyo “tabakepaye umweo obe.”
^ Mu ciHebere, “ukuya kuli bena.”
^ Mu ciHebere, “abantu aba mutende wenu.”
^ Nelyo “mwi sano.”
