Yeremia 42:1-22
42 Lyena abakalamba bonse aba bashilika na Yohanani+ umwana wa kwa Karea, Yesania umwana wa kwa Hoshaya na bantu bonse, ukutendekela ku bantu yaweyawe ukufika kuli bashimucindikwa, balipaleme.
2 Kabili baebele kasesema Yeremia abati: “Umfwa ukupaapaata kwesu, kabili tupepeleko kuli Yehova Lesa obe. Upepeleko abashalapo bonse aba, pantu twali abengi nomba tushele fye abanono,+ nga fintu ulemona.
3 Yehova Lesa obe natwebe inshila iyo tufwile ukwendamo ne fyo tufwile ukucita.”
4 Kasesema Yeremia abebele ati: “Naumfwa ifyo mwalanda, kabili nalamupepelako kuli Yehova Lesa wenu nga fintu munjebele; kabili fyonse ifyo Yehova akalanda, nkamweba. Nshakamufise nangu cimo.”
5 Baebele Yeremia abati: “Yehova nabe kambone wa cine kabili uwa cishinka uwa kutushinina nga tatwakacite fyonse ifyo Yehova Lesa obe akakutuma ukwisatweba.
6 Nampo nga ifyo akatweba fisuma nelyo fibi, tukomfwila ishiwi lya kwa Yehova Lesa wesu uo tulekutumako, pa kuti ifintu fikatuwamine pantu tumfwila ishiwi lya kwa Yehova Lesa wesu.”
7 Nomba ilyo papitile inshiku 10, Yehova alilandile na Yeremia.
8 E ico aitile Yohanani umwana wa kwa Karea na bakalamba bonse aba bashilika abo ali nabo na bantu bonse, ukutendekela ku bantu yaweyawe ukufika kuli bashimucindikwa.+
9 Abebele ati: “Yehova Lesa wa kwa Israele, uo mwantumineko ukuti imupaapaatileko alanda ati:
10 ‘Nga mukatwalilila ukwikala muli cino calo, lyena nkamukuula, nshakamubongolole, kabili nkamulimba, nshakamunukule, pantu nkamulangulukilako* pa bucushi ubo naleta pali imwe.+
11 Mwiba no mwenso pa mulandu wa mfumu ya ku Babiloni iyo muletiina.’+
“‘Mwitiina pa mulandu wa iyi mfumu,’ e fyo Yehova alanda, ‘pantu ndi na imwe, pa kuti imupusushe no kumupokolola mu minwe ya iko.
12 Nkamubelela uluse,+ kabili imfumu ikamumfwila uluse no kumubwesesha ku calo cenu.
13 “‘Lelo nga mwalanda amuti, “Awe, tatwatwalilile ukwikala muli cino calo!” kabili mwakaana ukumfwila ishiwi lya kwa Yehova Lesa wenu
14 kabili mwalanda amuti, “Awe, tukaya ku calo ca Egupti,+ uko tushakamone inkondo nangu ukumfwa ukulila kwa ntandala nelyo ukubulisha ifya kulya; kulya kwine e ko tukekala,”
15 ninshi umfweni ifyo Yehova alanda, mwe baYuda abashalapo. Yehova wa mabumba, Lesa wa kwa Israele alanda ati: “Nga mulefwaisha ukuya ku Egupti kabili nga mwaya mu kwikala kulya,*
16 ninshi ulupanga ulo muletiina lukamusanga kulya kwine ku calo ca Egupti, ne cipowe ico muletiina cikamukonka ku Egupti, kabili kulya kwine e ko mukafwila.+
17 Kabili abantu bonse abalefwaisha ukuya mu kwikala ku Egupti bakafwa ku lupanga, ku cipowe na ku cikuko.* Takuli nangu umo uukapusuka ubucushi ubo nkaleta pali bena.”’
18 “Pantu Yehova wa mabumba, Lesa wa kwa Israele alanda ati, ‘Filya fine ubukali bwandi bwaishile pa baleikala mu Yerusalemu,+ e fyo bukesa pali imwe nga mwaya ku Egupti. Kabili mukaba icitiipu, ica kutiinya, mukaseebana,+ kabili tamwakatale amumonapo cino cifulo na kabili.’
19 “Yehova namweba mwe baYuda abashalapo ukuti mwiya ku Egupti, kabili mwishibe ukuti ine nimusoka buno bushiku
20 ukuti icilubo mucitile cikalenga mukafwe.* Pantu mwantumine kuli Yehova Lesa wenu, mwanjebele amuti, ‘Tupepeleko kuli Yehova Lesa wesu, kabili utwebe fyonse ifyo Yehova Lesa wesu alalanda, kabili twakulafikonka.’+
21 Kabili nimweba buno bushiku, lelo tamwakomfwile ishiwi lya kwa Yehova Lesa wenu kabili tamwakacite ifyo acintuma ukuti imwebe.+
22 E ico ishibeni ukuti nangu cibe shani mukafwa ku lupanga, ku cipowe na ku cikuko mu calo umo mulefwaisha ukuyaikala.”+
Amafutunoti
^ Nelyo “nkomfwa ubulanda.”
^ Nelyo “nga mwaya mu kwikala kulya pa nshita iinono.”
^ Nelyo “ubulwele.”
^ Nelyo “cikalenga imyeo yenu ikafwe.”
