Yeremia 46:1-28
46 Aya e mashiwi ayo Yehova aebele kasesema Yeremia ayakumine inko, amwebele ati:+
2 Aya e mashiwi pali Egupti,+ ayakumine abashilika ba kwa Farao Neko+ imfumu ya ku Egupti, uo bacimfishe mu mbali ya Mumana wa Yufrate ku Kakemishi, kuli Nebukadnesari* imfumu ya ku Babiloni mu mwaka walenga 4 ukutula apo Yehoyakimu+ umwana wa kwa Yoshia imfumu ya mu Yuda, atendekeele ukuteka:
3 “Pekanyeni inkwela ishinono* ne shikalamba,Kabili kabiyeni mu kulwa.
4 Pekanyeni bakabalwe, kabili mwe banina pali bakabalwe ninenipo.
Tantameni kabili fwaleni ifisote fya kucingilila umutwe.
Nooneni amafumo. Kabili fwaleni ifya kucingilila icifuba.
5 “‘Cinshi babelele no mwenso?
Balebwelela ku numa, abashilika babo nababacimfya.
Nabafulumuka pa mulandu no mwenso. Abashilika babo tabaloleshe ku numa.
Abantu bonse bali no mwenso,’ e fyo Yehova alanda.
6 ‘Ababutukisha te kuti babutuke, na bashilika te kuti bafulumuke.
Ku kapinda ka ku kuso, mu mbali ya Mumana wa Yufrate,Baipununa kabili bawa.’+
7 “Nani uyu aleisa ngo Mumana wa Naelo,Uuleisa nge mimana iilulunkene?
8 Egupti aleisa ngo Mumana wa Naelo,+Aleisa nge mimana iilulunkene,Kabili alelanda ati, ‘Ndeyafimba isonde lyonse.
Ndeyaonaula umusumba na baikalamo.’
9 Mwe banina pali ba kabalwe kabiyeni ku nkondo!
Mwe bensha amaceleta, yensheni bushilu bushilu!
Abashilika nabaleya ku nkondo,Abena Kushi na Puti, abali ne nkwela,+Abena Ludimu,+ abaishiba bwino ukutiinta ubuta.*+
10 “Ubushiku bulya, bushiku bwa kwa Shikulu Mulopwe, Yehova wa mabumba, bushiku bwa kulandula abalwani bakwe. Ulupanga lukabalya mpaka lukekute umulopa wabo, pantu Shikulu Mulopwe, Yehova wa mabumba, aletuula* ilambo mu calo ca ku kapinda ka ku kuso mupepi no Mumana wa Yufrate.+
11 “Kabiye usende balsamu ku Gileadi,+We nacisungu Egupti.
Waicusha fye ifi wafusha imiti ya ku kundapilako.Pantu tawakapole.+
12 Inko nashumfwa ifyo useebene,+Kabili ukulila kobe nakumfwika mu calo conse.
Pantu umushilika alei-ipununa mu mushilika munankwe,Kabili bonse balewila pamo.”
13 Aya e mashiwi Yehova aebele kasesema Yeremia pa fyo Imfumu Nebukadnesari* iya ku Babiloni yali no kwisacimfya icalo ca Egupti,+ amwebele ati:
14 “Bilisheni ifi mu Egupti, mubilishe na mu Migidole.+
Na mu Nofu* na mu Tafne.+
Mubilishe amuti, ‘Tantameni kabili ipekanyeni,Pantu ulupanga luleipaya abantu bonse abamushingulwike.
15 Cinshi abaume benu aba maka babapyangila?
Balifilwa ukwiminina,Pantu Yehova alibawisha.
16 Abengi baleipununa kabili balewa.
Cila muntu ale-eba umunankwe ati:
“Ima! Natubwelele ku bantu besu kabili ku calo cesuPantu ulupanga talukwete uluse.”’
17 Kulya e ko babilishe abati,‘Farao imfumu ya mu Egupti alalanda sana lelo tacitapo nangu cimoAlileka inshita ya kusekelela* yapita.’+
18 ‘Na pali ne mwine,’ e fyo Imfumu yalanda, iyo ishina lya iko ni Yehova wa mabumba,Akesa* ‘nga Tabore+ mu mpiliKabili nga Karmele+ mu mbali ya bemba.
19 Longa ifipe fya kusenda uko ukayaba nkole,We mwana mwanakashi wa mu Egupti.
Pantu Nofu* akaba ica kutiinya;Bakamoca* kabili takwakabe nangu umo uukalaikalamo.+
20 Egupti yaba nge ng’ombe iyana iisuma,Lelo ifipobe fikafuma ku kapinda ka ku kuso no kwisa isuma.
21 Na bashilika abo aingisha incito abo ali nabo bali nge ng’ombe ishana ishaina,Lelo nabacimba kabili nabafulumukila pamo.
Nabafilwa ukwiminina,+Pantu ubushiku bwa bucushi nabwisa pali bena,Inshita ya kubakanda naifika.’
22 ‘Ishiwi lyakwe lyumfwika ngo kusakunya kwa nsoka,Pantu aba maka bakamwishila ninshi bali na masembe,Bakamwishila nga abaume abaletema ifimuti.*
23 Bakatema umutengo wakwe,’ e fyo Yehova alanda, ‘nangu ca kuti walemoneka kwati abantu te kuti bapitemo.
Pantu balifula ukucila makanta, takuli uwingabapenda.
24 Umwana mwanakashi Egupti bakamuseebanya.
Bakamupeela ku bantu ba ku kapinda ka ku kuso.’+
25 “Yehova wa mabumba, Lesa wa kwa Israele alanda ati, ‘Nalakanda Amone+ uwa mu musumba wa No,*+ nalakanda na Farao na Egupti na balesa bakwe+ ne mfumu shakwe. Nalakanda Farao na bonse abamucetekela.’+
26 “‘Nkabapeela ku balefwaya ukubepaya,* ku Mfumu Nebukadnesari* iya ku Babiloni+ na ku babomfi ba iko. Nomba pa numa mu Egupti mukekala abantu nga fintu cali kale,’ e fyo Yehova alanda.+
27 “‘Lelo iwe witiina we mubomfi wandi Yakobo,Kabili wiumfwa umwenso we Israele.+
Pantu nkakupususha mu calo icaba ukutali umo wikalaKabili nkapususha na bana bobe* mu calo umo baba bankole.+
Yakobo akabwela kabili akalaikala umutende,Takwakabe nangu umo uukalamutiinya.+
28 E ico witiina we mubomfi wandi Yakobo,’ e fyo Yehova alanda, ‘pantu ndi na iwe.
Nkalofya inko shonse umo nakusalanganishishe,+Lelo iwe nshakakulofye.+
Nshakakusalapule* ukucila mu cipimo,+Lelo nshakakuleke fye ukwabula ukukukanda.’”
Amafutunoti
^ Mu ciHebere, “Nebukadresari.” Inshila imbi iyo balelembelamo ili ishina.
^ Ilingi line abalebomfya ishi inkwela bantu abalepoosa imifwi.
^ Mu ciHebere, “ukunyanta pa buta.”
^ Nelyo “aleipaya.”
^ Mu ciHebere, “Nebukadresari.” Inshila imbi iyo balelembelamo ili ishina.
^ Nelyo “Memfisi.”
^ Mu ciHebere, “inshita yasontwa.”
^ E kutila, uukacimfya icalo ca Egupti.
^ Nelyo “Memfisi.”
^ Nelyo kuti yapilibula no kuti, “Akaba icibolya.”
^ Nelyo “nga balelonganika inkuni.”
^ E kutila, Tepese.
^ Mu ciHebere, “Nebukadresari.” Inshila imbi iyo balelembelamo ili ishina.
^ Nelyo “abafwaya umweo wabo.”
^ Mu ciHebere, “ulubuto lobe.”
^ Nelyo “ukukulungika.”
