Yeremia 48:1-47
-
Ubusesemo pali Moabu (1-47)
48 Yehova wa mabumba, Lesa wa kwa Israele alanda pali Moabu+ ati:
“We bulanda kuli Nebo+ pantu nabamonaula!
Kiriataimu+ nabamuseebanya kabili nabamucimfya.
Icubo* nabaciseebanya kabili nabaconaula.+
2 Balileka ukulumbanya Moabu.
Mu Heshebone+ e mo balepangana ukumuwisha, balelanda abati:
‘Iseni tumulofye pa kuti etwalilila ukuba uluko.’
“Na iwe we Madmeni, ufwile ukwikala tondolo,Pantu ulupanga lulekukonka.
3 Kuleumfwika ukulila ku Horonaimu,+Kuleumfwika icongo ca konaula no kubongoloka kukalamba.
4 Moabu nabamonaula.
Abana bakwe abanono balelila.
5 Ilyo bale-enda mu nshila iyaya pa muulu iya Luhiti, balelila.
Kabili ilyo baletentemuka ukufuma ku Horonaimu, baumfwa abantu balelila pa mulandu wa fyabipa ifibacitikiile.+
6 “Fulumukeni pa kuti mupusushe imyeo yenu!
Mufwile ukuba nge cimuti ca mukupri mu matololo.
7 Apo wacetekela ifyo ucita ne fyuma fyobe,Na iwe wine bakakwikata.
Kabili Kemoshe+ bakamusenda akayeba nkole,Kumo na bashimapepo bakwe ne ntungulushi shakwe.
8 Uonaula akesa mu musumba onse,Kabili takwakabe umusumba uukapusuka.+
Umupokapoka* ukaloba,Ne mpanga iyabatama bakayonaula nga fintu Yehova alandile.
9 “Bikileni Moabu icishibilo,Pantu ilyo bakalamonaula akafulumuka,Kabili imisumba yakwe ikaba ica kupapa,Tamwakekale umuntu nangu umo.+
10 “Abe uwatiipwa uuba no mulekelesha pa kubomba umulimo wa kwa Yehova!
Abe uwatiipwa uushibomfya ulupanga lwakwe ku kusumya umulopa!
11 “Abena Moabu bekala umutende ukutula fye ilyo bali abaice,Baba ngo mwangashi uutekele pa fiseekwa.
Tababetulwilapo mu cipe cimbi,Tababasendapo ku calo cimbi mu kuyaba bankole.
E mulandu wine bomfwikila fye cimo cine,Kabili akacena kabo kaba fye cimo cine.
12 “E ico moneni! inshiku shileisa,’ e fyo Yehova alanda, ‘ilyo nkatuma abaume abakabetulula ngo mwangashi. Bakabetulula ngo mwangashi kabili baketulula fyonse ifyaba mu fipe fyabo, bakatobaula ne mitondo yabo iikalamba.
13 Kabili abena Moabu bakomfwa insoni pa mulandu na Kemoshe, nga filya aba mu ng’anda ya kwa Israele baumfwa insoni pa mulandu wa Betele iyo bacetekeele.+
14 Cinshi mulelandila amuti: “Tuli bashilika ba maka abaipekenye ukuya mu kulwa inkondo”?+
15 “‘Moabu nabamonaula,Imisumba yakwe nabaisansa,+Kabili abalumendo babo aba maka sana nababepaya,’+
E fyo Imfumu yalanda, iyo ishina lya iko ni Yehova wa mabumba.+
16 “Ubucushi buleisa nomba line pa bena Moabu,Kabili ukonaulwa kwabo kuleisa bwangu bwangu.+
17 Bonse ababashinguluka bakabomfwila uluse,Bonse abaishiba ishina lyabo.
Bakabeba abati: ‘Iye ifyo inkonto ya maka baikontaula, inkoto ya bukata!’
18 “Fuma pa bucindami bobe,Kabili ikala ne cilaka,* we mwana mwanakashi uwaikala mu Dibone,+Pantu uwaonaula Moabu naisa ku kukulwisha,Kabili aleonaula ififulo fyobe ifyacingililwa.+
19 “Iminina mu mbali ya musebo no kumona ifyo abekala mu Aroere+ balecita.
Ipusha umwaume uulebutuka no mwanakashi ulefulumuka auti, ‘Cinshi cicitike?’
20 Moabu nabamuseebanya kabili ali no mwenso.
Lileni no kuloosha.
Bilisheni mu Arnone+ ukuti Moabu nabamonaula.
21 Lesa napingula icalo icabatama,*+ napingula Holone, Yahasi+ na Mefaati;+
22 napingula Dibone,+ Nebo+ na Bete-diblataimu;
23 napingula Kiriataimu,+ Bete-gamuli na Bete-maone;+
24 napingula Keriote+ na Bosera; napingula ne misumba yonse iya mu calo ca Moabu iyaba ukutali ne yaba mupepi.
25 “‘Amaka ya kwa Moabu nayapwa;*Ukuboko kwakwe nabakukontola,’ e fyo Yehova alanda.
26 ‘Lengeni akolwe,+ pantu alaitutumuna kuli Yehova.+
Moabu ayalangana mu malushi yakwe,Kabili balamuseka.
27 “‘Bushe tawaleseka Israele?+
Bushe na o aali mupuupu,Ica kuti ulemupukunishisha umutwe no kulanda ifyabipa pali ena?
28 “‘Fumeni mu misumba, muye mu kwikala mu cilibwe mwe bekala mu Moabu,Kabili mube nge nkunda iipanga icinsa mu mbali ya mukonko.’”
29 “Twalyumfwa ifyo Moabu aba ne cilumba, alaitutumuna nga nshi,Twalyumfwa ifyo aituntumba, ifyo aba ne cilumba, ifyo aitutumuna ne fyo umutima wakwe waba ne cilumba.”+
30 “‘Nalishiba ifyo aba ne cipyu,’ e fyo Yehova alanda,‘Lelo ifyo alanda malanda kanwa fye,
Tabakacite nangu cimo.
31 E co nkaloosesha Moabu,Nkaloosha icalo conse ica MoabuNkaloosha na baume abena Kiri-herese.+
32 “‘Nkakuloosha ukucila ifyo ningaloosha Yasere,+We mwangashi wa mu Sibma.+
Utumisambo tobe utwalelema natwabuka bemba.
Natufika kuli bemba, ku Yasere.
Pa fisabo fyobe ifya mu lusuba ifyo wasombola na pa mwangashi obe,E po uonaula+ atentemukile.
33 Ukusekelela no kusansamuka nabafifumyamo mwi bala lya fisaboNa mu calo ca Moabu.+
Ninenga umwangashi uleke ukukonkoloka ukufuma mu ca kukaminamo umwangashi.
Takwakabe nangu umo uukalanyantaula imyangashi ninshi alesekelela.
Takwakabe icongo ca kusekelela.’”+
34 “‘Amashiwi ya bantu abaleloosha yaleumfwika ukufuma ku Heshebone+ ukuyafika ku Eleale.+
Basansula amashiwi yabo ica kuti yaumfwika na ku Yahasi,+Yaleumfwika ukufuma ku Soari ukuyafika ku Horonaimu+ na ku Egelati-shelisha.
Na menshi ya mu Nimrimu yakakama.+
35 Yehova alanda ati ‘nkalofya mu Moabu,Umuntu uutwala imituulo pa fifulo fya kupepelapoNo utuulila kalesa kakwe amalambo.
36 E co umutima wandi ukaloosesha Moabu ngo kulila kwa mutoolilo,*+Kabili umutima wandi ukaloosha abaume ba mu Kiri-herese ngo kulila kwa mutoolilo.*
Pantu ifyuma ifyo anonka fikapwa.
37 Pantu pa mutwe onse pali ipala,+Kabili umwefu onse nabaubeya.
Nabaitetaula mu minwe,+Kabili mu ntungu shabo muli insamu!’”+
38 “‘Pa mitenge yonse iya kwa MoabuNa mu mansa shakwe shonse,Muli fye imisowa.
Pantu nintobaula MoabuNgo mutondo uo bapoosa,’ e fyo Yehova alanda.
39 ‘Iye ifyo omfwile umwenso! Loosheni mwe bantu!
Iye ifyo Moabu afulumuka ninshi naseebana!
Moabu balemupumya,Kabili bonse abamushinguluka balemutiina.’”
40 “Pantu Yehova alanda ati:
‘Moneni! Nga filya fine kapumpe afookela ico alefwaya ukwikata,+E fyo umo akafungulula amapindo yakwe pa kufookela Moabu.+
41 Imisumba iinono bakaipoka,Bakapoka ne fifulo fyakwe ifyacingililwa.
Muli bulya bushiku umutima wa bashilika ba kwa MoabuUkaba ngo mutima wa mwanakashi uulepaapa.’”
42 “‘Kabili abena Moabu bakabepaya, tabakatwalilile ukuba uluko,+Pantu nabaitutumuna kuli Yehova.+
43 Umwenso, ubucinga ne citeyo fili pa ntanshi yenu,Mwe bekala mu Moabu,’ e fyo Yehova alanda.
44 ‘Onse uukabutuka pa mulandu no mwenso akawila mu cilindi,Na onse uukafuma mu cilindi akekatwa mu citeyo.’
‘Pantu ndeleta pa bena Moabu umwaka wa kubakanda,’ e fyo Yehova alanda.
45 ‘Mu cinshingwa ca kwa Heshebone, e mo abafulumwike beminine ninshi tabakwete amaka.
Pantu umulilo ukafuma mu Heshebone,No lubingu lukafuma mu Sihone.+
Ukoca impumi ya kwa MoabuNe mitwe ya bashilika bonse abankalwe.’+
46 ‘We bulanda kuli iwe Moabu!
Abantu ba kwa Kemoshe+ nabaloba.
Pantu abana bobe abaume nababasenda mu kuyaba bankole,Kabili abana bobe abanakashi nabaya mu kuba bankole.+
47 Lelo mu nshiku sha ku mpela, nkalonganika bankole abena Moabu,’ e fyo Yehova alanda.
‘Pano e papwila amashiwi ya bupingushi pali Moabu.’”+
Amafutunoti
^ Nelyo “ulupili lwakubutukilako pa kuti umuntu acingililwe.”
^ Nelyo “Impanga iyabatama.”
^ Nelyo kuti yapilibula no kuti, “ikala pa mushili uwauma.”
^ Nelyo “impanga iyabatama.”
^ Mu ciHebere, “ulusengo lwa kwa Moabu nabalukontola.”
^ E kutila, umutoolilo uo balisha pa cililo pa kuloosha.
^ E kutila, umutoolilo uo balisha pa cililo pa kuloosha.
