Yeremia 49:1-39
49 Yehova alanda pa bena Amone+ ati:
“Bushe Israele takwata abana abaume?
Bushe takwata impyani?
Cinshi Malkamu+ apokela Gadi?+
Kabili cinshi abantu bakwe bekalila mu misumba ya kwa Israele?”
2 “‘E ico moneni! inshiku shileisa,’ e fyo Yehova alanda,‘Ilyo nkalenga icongo ca nkondo cikomfwike mu Raba+ iya bena Amone.+
Akaba ifitantaala,Kabili imisumba ya uko iinono* bakayoca.’
‘Na Israele akapokolola imisumba iyo bamupokolwele,’+ e fyo Yehova alanda.
3 ‘Loosha we Heshebone pantu Ai nabamonaula!
Lileni mwe misumba iinono iya kwa Raba.
Fwaleni insamu.
Lileni kabili endaukeni mu macinka ya mabwe,Pantu Malkamu balemusenda mu kuyaba nkole,Kumo na bashimapepo bakwe ne ntungulushi shakwe.+
4 Cinshi uitakishisha pa mipokapoka,*Pa mpanga umupita amenshi, we mwanakashi uushaba ne cishinka,We wacetekela ifyuma fyobeKabili we ulanda auti: “Nani akansansa?”’”
5 “‘Mona, ndekuletela ifya kutiinya,’ e fyo Shikulu Mulopwe, Yehova wa mabumba alanda,‘Ndefifumya kuli bonse ababa mupepi na iwe.
Bakamusalanganishisha konse konseKabili takwakabe nangu umo uukalonganika abakafulumuka.’”
6 “‘Lelo pa numa ya ifi, nkalonganika bankole abena Amone,’ e fyo Yehova alanda.”
7 Yehova wa mabumba alanda pali Edomu ati:
“Bushe amano nayapwa mu Temani?+
Bushe ukupanda amano kwa beluka nakupwa?
Bushe amano yabo nayabola?
8 Fulumukeni, cimbeni!
Kabiyeni mu kwikala mu mikonko iyashika, mwe bekala mu Dedani!+
Pantu nkaleta ubucushi pali EsauIlyo inshita ya kumukanda ikafika.
9 Abalonganika imyangashi nga balishile muli imwe,Bushe te kuti bashepo iya kutolelesha?
Abapuupu nga balishile mu nshita ya bushiku,Kuti baonaula ifintu apo balefwaila.+
10 Lelo ine nkapokolola Esau fyonse.
Nkafimbula ne fifulo fyakwe umo afisama,Pa kuti ekafisama.
Abana bakwe, bamunyina na bena mupalamano bakwe bakabonaula,+Kabili takabeko na kabili.+
11 Sheni abana benu abashakwata bashibo,Kabili nkaleka bakabe no mweo,Na bamukamfwilwa benu bakancetekela.”
12 Pantu Yehova alanda ati: “Moneni! Nga ca kuti abo bashapingula ukuti bafwile ukunwa muli kapu bafwile ukunwamo, bushe imwe bafwile ukumuleka fye ukwabula ukumukanda? Tabakamuleke fye ukwabula ukumukanda pantu mufwile ukunwamo.”+
13 “Pantu nailapa ne mwine,” e fyo Yehova alanda, “ukuti Bosera akaba ica kutiinya,+ akaseebana, bakamonaula kabili bakalamulandapo pa kutiipwila; ne misumba yakwe yonse ikaba ifibolya umuyayaya.”+
14 Yehova nantumina amashiwi,Natuma inkombe ukuyaeba inko ati:
“Longaneni kabili kamusanseni;Ipekanyeni ukuya mu kulwa inkondo.”+
15 “Pantu ninenga inko shilekumona ukuti tawacindama,Abantu nabakusuula.+
16 Ulaibepa pa mulandu wa kuti abantu balakutiina,Kabili umutima obe wa cilumba,Iwe we wikala mu cilibwe ca kuubamo,We wikala pa kapili akatali sana.
Nangu ca kuti wapangila icinsa cobe pa muulu nga kapumpe,Nkakutentemushisha panshi,” e fyo Yehova alanda.
17 “Kabili Edomu akaba ica kutiinya.+ Onse uukalapita mupepi nankwe akalamutiina kabili akalalisha umunsoli pa mulandu ne fyabipa ifikamucitikila.
18 Nga filya fine cali ilyo baonawile Sodomu na Gomora ne misumba inono iyali mupepi,”+ e fyo Yehova alanda, “tamwakatale amwikala umuntu nangu umo.+
19 “Moneni! Nga filya inkalamo ifuma mu mpanga umwaba ifimuti ifyatitikana iyaba mu mbali ya Yordani, e fyo umuntu umo akesa mu kusansa impanga ya mulemfwe iyacingililwa,+ lelo mu nshita fye iinono nkalenga akafulumukemo. Kabili nkamusontela uwa kumutungulula uo nasala. Pantu nani uwaba nga ine kabili nani uwingalubulula na ine? Ni kacema nshi uwingeminina pa ntanshi yandi?+
20 E ico umfweni mwe bantu, ifyo Yehova apingwile Edomu ne fyo apingwile abekala mu Temani:+
Nangu cibe shani impaanga ishana bakashikululula.
Akalenga icifulo bekalamo cikabe icibolya pa mulandu wabo.+
21 Isonde lyatenta pa mulandu ne congo ca kuwa kwabo.
Abantu balelila!
Imisowa yabo ilefika na kuli Bemba Wakashika.+
22 Moneni! Nga filya kapumpe acita, akaya mu muulu e lyo akafookele panshi,+Kabili akafungulwila amapindo yakwe pali Bosera.+
Muli bulya bushiku umutima wa bashilika abena EdomuUkaba ngo mutima wa mwanakashi ulepaapa.”
23 Amashiwi pali Damaseke:+
“Hamati+ na Aripadi nabomfwa insoni,Pantu nabomfwa ilyashi ilyabipa.
Nabasunguluka pa mulandu no mwenso.
Abantu na basakamikwa nga nshi, bali nga bemba iilulunkene iyo bashingatalalika.
24 Damaseke naleka ukuba uwashipa.
Nafulumuka, lelo nasakamikwa nga nshi.
Ubucushi no kukalipwa nafisa pali ena.Nga filya fisa pa mwanakashi uulepaapa.
25 Cinshi umusumba uo balumbanya bashaulekelesesha,Umusumba unono umwaba ukusekelela?
26 “Pantu abalumendo bakwe bakawa mu mansa shakwe,Na bashilika bakwe bonse bakafwa muli bulya bushiku,” e fyo Yehova wa mabumba alanda.
27 “Nkasonteka umulilo pe linga lya kwa Damaseke,Kabili ukoca impungu ishakosa isha kwa Ben-hadadi.”+
28 Ifi e fyo Yehova alanda pali Kedari+ na pa mabufumu ya kwa Hasore, ayo Imfumu Nebukadnesari* iya ku Babiloni yaonawile, alanda ati:
“Imeni, kabiyeni ku Kedari,Muyeonaula abana ba ku Kabanga.
29 Amatenti yabo ne mpaanga shabo bakafisenda,Bakasenda na maketani yabo aya mu matenti ne fipe fyabo fyonse.
Ingamila shabo na sho bakashisenda,Kabili bakapunda abati, ‘Konse fye kuli ifiletiinya!’”
30 “Fulumukeni, kabiyeni ukutali!
Kabiyeni mu kwikala mu mikonko iyashika mwe bekala mu Hasore,” e fyo Yehova alanda.
“Pantu Imfumu Nebukadnesari* iya ku Babiloni naimupangila,Naipanga ifyo ikacita pa kumusansa.”
31 “Imeni, kasanseni uluko ulwaikala umutende,Uluko ulwaikala umutelelwe!” e fyo Yehova alanda.
“Talwakwata ifiibi nelyo imipindo. Baikala fye beka.
32 Bakabapokolola ingamila,Ne fitekwa fyabo ifingi bakafisenda.
Nkabasalanganishisha konse uko umwela uya,*Ababeya umushishi mu nsensematwi,+Kabili nkabaletela ubucushi ukufuma konse konse,” e fyo Yehova alanda.
33 “Na Hasore akaba umwa kwikala bamumbwe,Akaba icibolya umuyayaya.
Takuli nangu umo uukekalamo,Tamwakatale amwikala umuntu.”
34 Aya e mashiwi Yehova aebele kasesema Yeremia pali Elamu+ ilyo Imfumu Sidekia+ iya mu Yuda yatendeke ukuteka:
35 “Yehova wa mabumba alanda ati, ‘Moneni, ndekontola ubuta bwa kwa Elamu,+ intulo* ya maka yabo.
36 Nkaleta imyela 4 pali Elamu iyo nkafumya ku mpela 4 isha muulu, nkabasalanganishisha muli iyi imyela. Kabili takwakabe uluko uko abekala mu Elamu abo nkasalanganya bashakaye.’”
37 “Nkalenga abena Elamu bakatiine abalwani babo na bafwaya ukubepaya,* kabili nkaleta ubucushi pali bena, ubukali bwandi ububilima ngo mulilo,” e fyo Yehova alanda. “Kabili nkabatumina ulupanga mpaka nkabalofye.”
38 “Nkabika icipuna candi ica bufumu mu Elamu,+ kabili nkepaya imfumu ne ntungulushi sha muli ici cifulo,” e fyo Yehova alanda.
39 “Lelo mu nshiku sha ku mpela, nkalonganika bankole abena Elamu,” e fyo Yehova alanda.
Amafutunoti
^ Nelyo “imisumba ya mupepi.”
^ Nelyo “impanga ishabatama.”
^ Mu ciHebere, “Nebukadresari.” Inshila imbi iyo balelembelamo ili ishina.
^ Mu ciHebere, “Nebukadresari.” Inshila imbi iyo balelembelamo ili ishina.
^ Nelyo “konse konse.”
^ Mu ciHebere, “intendekelo.”
^ Nelyo “abalefwaya umweo wabo.”
