Yeremia 6:1-30
6 Fulumukeni mu Yerusalemu mwe bana ba kwa Benjamini, muye ku cifulo uko mwingacingililwa.
Lisheni intandala+ mu Tekoa;+Kosheni umulilo wa cishibilo mu Bete-hakeremu!
Pantu ubucushi buleisa nomba line. Bulefuma ku kapinda ka ku kuso, ubonaushi ubukalamba.+
2 Umwana mwanakashi Sione aba ngo mwanakashi uumoneka bwino uo batumpika.+
3 Bakacema bakesa ne mpaanga shabo.
Bakatanika amatenti yabo ukumushinguluka,+Cila muntu akalaliisha impaanga shakwe.+
4 “Natuipekanye* tuyelwa nankwe inkondo!
Natwime, tuyemusansa ninshi akasuba kali pa kati!”
“We bulanda kuli ifwe, pantu akasuba kele kalewa,Pantu ifinshingwa fya cungulo filelepelako fye!”
5 “Natwime, tuyemusansa mu nshita ya bushikuKabili tuyebongolola impungu shakwe ishakosa.”+
6 Pantu Yehova wa mabumba alanda ati:
“Temeni ifimuti kabili tuulikeni iloba ukushinguluka Yerusalemu.+
Uyu musumba bafwile uku-ulubulwisha;Muli uyu musumba+ mwaisula fye ubucushi.
7 Nga filya icishima cisunga amenshi ayatalala,E fyo uyu musumba usunga ifyabipa.
Ulukaakala no bonaushi filomfwika muli wena;+Lyonse imona fye ubulwele ne cikuko.
8 Umfwa ifyo ndekusoka we Yerusalemu, nga taumfwile nkakusha* ninshi ninkupata;+Nkalenga ukabe icibolya, takuli umuntu nangu umo uukalaikala muli iwe.”+
9 Yehova wa mabumba alanda ati:
“Abena Israele abashalapo bakabalonganika nga filya balonganika imyangashi iya kulekelesha.
Pisha ukuboko na kabili ngo muntu ulesaba imyangashi.”
10 “Ni bani mfwile ukulanda nabo kabili abo mfwile ukusoka?
Ni bani abakomfwa?
Moneni! Amatwi yabo yalikoma,* e ico tababikako amano.+
Moneni! Balasuusha ifyo Yehova alanda;+Tabafitemwa.
11 E ico muli ine mwaiswile ubukali bwa kwa Yehova,Kabili nintendwa ukubusunga.”+
“Bupongolwele pa mwana uuli mu musebo,+Na pa balumendo abalongene pamo.
Bonse bakabekata, umwaume no mukashi wakwe,Abakalamba na bakote sana.*+
12 Abantu bambi e bo bakapeela amayanda yabo,Kumo na mabala yabo na bakashi babo.+
Pantu nkatambalika ukuboko kwandi pa bekala mu calo,” e fyo Yehova alanda.
13 “Pantu abantu yaweyawe bonse na bashimucindikwa, balenonka ifyuma mu bucenjeshi;+Bakasesema na bashimapepo, bonse balecita ubucenjeshi.+
14 Kabili balesha ukuposha ifilonda fya bantu bandi ninshi tababikileko amano, balanda abati,‘Kuli umutende! ‘Kuli umutende!’
E lyo ninshi takuli umutende.+
15 Bushe balomfwa insoni pa fya bunani ifyo baacita?
Tabomfwa insoni nangu fye panono!
Tabaishiba ne fyo cipilibula ukuseebana!+
E co bakawila mu bawa kale.
Ilyo nkabakanda bakaipununa,” e fyo Yehova alanda.
16 Yehova alanda ati:
“Iminineni apo inshila shakumanina kabili moneni,
Ipusheni pa nshila sha kale,Ipusheni uko inshila iisuma yabela, kabili mwendemo,+Mwalasanga ukutuusha.”*
Lelo balanda abati: “Tatwakulaendamo.”+
17 “Kabili nalisontele abakulonda+ abalebeba abati,‘Bikeni amano ku fyo intandala ilelila!’”+
Lelo balandile abati: “Tatwabikeko amano.”+
18 “E ico umfweni mwe nko!
Kabili mwe bantu abalongeneIshibeni ifikabacitikila.
19 Umfweni mwe sonde!
Ndeleta ubucushi pali aba bantu+Pa mulandu wa mapange yabo,Pantu tababikile amano ku fyo nalebebaKabili balikeene amafunde yandi.”*
20 “Bushe ndabikako amano ku bubani bwabuuta ubwa ku Sheba ubo muletaNa ku cimenwa icalowa* ico mufumya ku calo ca kutali?
Imituulo yenu yonse iya koca nshi-ipokelela,Na malambo yenu tayansekesha.”+
21 E ico Yehova alanda ati:
“Moneni ndebikila aba bantu ifya kuipununako,Kabili bakaipununako,Bawishi pamo na bana,Umwina mupalamano no munankwe,Kabili bonse bakaloba.”+
22 Yehova alanda ati:
“Moneni! Abantu baleisa ukufuma ku calo ca ku kapinda ka ku kuso,Kabili uluko ulukalamba lukema ukufuma ku mpela she sonde.+
23 Bakekata ubuta ne fumo ilinono.
Bankalwe kabili tabakomfwe uluse.
Ishiwi lyabo likomfwika nga bemba iilulunkene,Kabili bakanina pali bakabalwe.+
Bakaipekanya ngo mwaume uulwa inkondo. Bakalwa na iwe we mwana mwanakashi Sione.”
24 Natumfwa ilyashi pali ulu uluko.
Amaboko yesu nayatompoka;+Ubucushi nabwisa pali ifwe,Tulekalipwa ngo mwanakashi uulepaapa.+
25 Mwiya mu mpanga,Kabili mwienda mu musebo,Pantu abalwani bali no lupanga;Abantu bonse baletiina.
26 We mwana mwanakashi wa bantu bandi,Fwala insamu+ kabili akwalangana mu mito.
Loosha kabili lila ngo muntu uuleloosha umwana umwaume uo akwata fye,+Pantu mu kupumikisha abakutonaula bakesa.+
27 “Ninenga waba* ngo muntu uulopolola silfere na golde,Umuntu uufwailisha bwino bwino;Ulebabikako amano kabili ulemona ifyo bacita.
28 Bonse fye ni bacintomfwa sana,+Bendauka nga bacita ulwambo.+
Baba ngo mukuba ne cela;Bonse balacita ifyabipa.
29 Imyuba naipya.
Mu mulilo wabo mwafuma fye umutofwe.
Uule-esha na maka ukulopolola silfere aicusha fye,+Kabili abacita ifyabipa tababafumya pa bantu.+
30 Abantu bakalabeta abati silfere iyo bakaana,Pantu Yehova nabakaana.”+
Amafutunoti
^ Mu ciHebere, “Natuisangulule.”
^ Nelyo “umweo wandi ukakusha.”
^ Mu ciHebere, “ukutwi kwabo takwasembululwa.”
^ Mu ciHebere, “abaisulamo inshiku.”
^ Nelyo “Imyeo yenu yalasanga ukutuusha.”
^ Nelyo “ifya kukonka.”
^ Itete ilyanunkila.
^ E kutila, Yeremia.
