Yobo 19:1-29
19 Yobo ayaswike ati:
2 “Ni lilali mukaleka ukukalifya umweo* wandi,+Kabili ni lilali mukaleka ukulanda amashiwi+ ayanshonaula?
3 Pali iyi miku 10 munkalipiile;*Tamuli ne nsoni pa fyo mulencusha.+
4 Kabili nga cine cine nalilufyanya,Ninshi mulandu wandi.
5 Nga mwatwalilila ukumona ukuti mwalicindama ukuncila,Kabili mulelanda ukuti mfwile fye ukuseebana pa mulandu no kucula ndecula,
6 Ninshi mwishibe ukuti ni Lesa e wandufya,Kabili alinjikata mwi sumbu lyakwe.
7 Moneni! Ndapunda mutuule pa mulandu wa kucula kwandi, lelo takuba nangu umo uunjasuka.+Ndapunda mutuule, lelo takuba nangu umo uwa kunandilako.+
8 Alicilika inshila yandi ne linga lya mabwe, pa kuti nipitamo;Mu misebo yandi alibikamo imfifi.+
9 Alimpoka ubukata bwandiKabili alimfuula icisote ca bucindami bwandi.
10 Ndi nge cikuulwa ico babongolola fye conse, alanshonaula mpaka nafwa;Alanukula isubilo lyandi nga filya banukula icimuti.
11 Ubukali bwakwe ububilima ngo mulilo bwaisa pali ine,Kabili amona ngo mulwani wakwe.+
12 Abashilika bakwe banonganina kabili banshinga,Kabili bapanga inkambi ukushinguluka itenti lyandi.
13 Natalusha bamunyinane kuli ine,Kabili bonse abanjishiba nabandekelesha.+
14 Abanandi* nabandekelesha,Kabili bonse abo naishibene nabo nabandaba.+
15 Abeni abesa pa ng’anda yandi+ na babomfi bandi abanakashi bamona kwati ndi mweni;Bamona ukuti ndi wa ku calo cimbi.
16 Nga naita umubomfi wandi, tanjasuka;Ndamupaapaata ukuti ang’umfwile uluse.
17 Umukashi wandi napata umupu wandi,+Kabili bamunyinane* tabalefwaya ukumpalama pa mulandu wa kuti ndenunka.
18 Nangu fye baice balinsuula;Nga naima balatendeka ukungweela.
19 Abanandi bonse balimpata,+Kabili bonse abo natemenwe balinjalukila.+
20 Amafupa yandi yalambatila ku nkanda yandi na ku munofu wandi,+Kabili mpuswike fye kwempe.*
21 Mung’umfwile uluse mwe banandi, mung’umfwile uluse,Pantu ukuboko kwa kwa Lesa kwanjikata.+
22 Cinshi ico muncushisha nga filya Lesa ancusha,+Bushe tamutendwa ukunjeba amashiwi yabipa?*+
23 Kanshi ifyo ndelanda nga kuti bafilemba,Kanshi nga kuti bafilemba mwi buuku!
24 Kanshi nga bafilembele pa cilibwe pa kuti fiikafuutika,Nga bafilembele ku kalembelo ka cela na ka mutofwe,
25 Pantu nalishiba bwino ukuti kalubula wandi+ e po aba;Akesa pa numa kabili akeminina pa calo.*
26 Nga baonaula inkanda yandi,Lelo ilyo ncili no mweo, nkamona Lesa,
27 E o nkaimwena,E o amenso yandi yakamona, te muntu umbi iyo.+
Lelo mu kati mwena ninshonaika.*
28 Pantu mutila, ‘Tulemucusha shani?’+
Kwati nine naba no mulandu pa fyo ncula.
29 Muletiina ulupanga,+Pantu nga mwalufyanya bakamukanda ku lupanga;Mufwile ukwishiba ukuti kwaliba kapingula.”+
Amafutunoti
^ Nelyo “ukunkalifya.” Moneni Amashiwi ya mu Baibo ne fyo Yapilibula.
^ Nelyo “munsalwile.”
^ Nelyo “ba lupwa lwandi.”
^ Mu ciHebere, “abana baume aba mwi fumo lyandi,” e kutila aba mwi fumo umo nafumine (ifumo lya kwa mayo).
^ Mu ciHebere, “Mpuswike fye ne nkanda ya meno yandi.”
^ Mu ciHebere, “Bushe tamwikuta umubili wandi.”
^ Mu ciHebere, “pa lukungu.”
^ Nelyo “Imfyo shandi nashileka ukubomba.”
