Yobo 2:1-13
2 Kwali ubushiku na bumbi ilyo abana baume ba kwa Lesa wa cine*+ baileiminina pa ntanshi ya kwa Yehova,+ kabili Satana na o aileiminina pamo nabo pa ntanshi ya kwa Yehova.+
2 Lyena Yehova aipwishe Satana ati: “Wafuma kwi?” Satana ayaswike Yehova ati: “Nafuma mu kwendauka pe sonde, mu kumona ifyabapo.”+
3 E lyo Yehova aebele Satana ati: “Bushe naumona* umubomfi wandi Yobo? Takwaba uwaba nga ena pe sonde, mulungami, wa kaele,*+ alatiina Lesa kabili tafwaya ukucita ifyabipa. Acili wa kaele+ nangu ca kuti ulefwaya imwipaye*+ apabula umulandu.”
4 Lelo Satana ayaswike Yehova ati: “Inkanda pa nkanda, umuntu kuti apeela conse ico akwata pa kuti acingilile umweo wakwe.
5 Nomba fungululeni ukuboko kwenu, muume ifupa no munofu wakwe kabili nangu cibe shani akamusaalula pa menso yenu.”+
6 Lyena Yehova aebele Satana ati: “Mona ali mu minwe yobe!* Lelo ukumwipaya kwena wimwipaya!”*
7 E ico Satana afumine pa ntanshi* ya kwa Yehova kabili ailelwalika Yobo ifipute ifikali nga nshi,*+ ukufuma ku makasa ukufika ku mutwe.
8 Kabili Yobo abuulile ici-inga e co alaitulilako ifipute, kabili aleikala mu mito.+
9 Umukashi wakwe asukile amweba ati: “Bushe muletwalilila fye ukuba uwa kaele? Ponteleni Lesa pa kuti mufwe!”
10 Lelo amwebele ati: “Ulelanda ngo mwanakashi uushakwata amano. Nga ca kuti tulapokelela ifisuma kuli Lesa, bushe tatufwile no kupokelela ifibi kuli ena?”+ Nangu ca kuti ifi fyonse fyalimucitikile, Yobo tabembwike muli fyonse ifyo alandile.+
11 Abanankwe* batatu aba kwa Yobo, e kutila Elifasi+ umwina Temani, Bildadi+ umwina Shuhi+ na Sofari+ umwina Naamati balyumfwile amacushi yonse ayo Yobo akwete. E ico cila muntu afumine ku mwakwe pantu balyumfwene ukuti bakakumane pa kuti bakayepempula Yobo no kumusansamusha.
12 Ilyo bamumwene ninshi bali akatalamukila, tabamwishibe. Batendeke ukulila ninshi nabasansula amashiwi yabo kabili balepwile ifya kufwala fyabo, balekuba no lukungu mu muulu e lyo luleponena pa mitwe yabo.+
13 Lyena baikeele nankwe panshi inshiku 7 akasuba no bushiku. Takwali nangu umo uwalemusosha, pantu balimwene ukuti alekalipwa nga nshi.+
Amafutunoti
^ Iyi ni nsoselo ya mu ciHebere iipilibula ukuti bamalaika ba kwa Lesa.
^ Mu ciHebere, “naubika umutima obe pa.”
^ Nelyo “taba na mulandu kabili mulungami.”
^ Mu ciHebere, “imumine.”
^ Nelyo “wi-ipaya umweo wakwe.”
^ Nelyo “niwe ukwetepo amaka.”
^ Mu ciHebere, “pa cinso.”
^ Nelyo “ifilonda fyabipisha.”
^ Nelyo “Abo aishibene nabo.”
