Yobo 26:1-14
26 Yobo ayaswike ati:
2 “Yangu ifyo wa-afwa uushakwata amaka!
Yangu ifyo wapususha ukuboko ukushakosa!+
3 Yangu ifyo wapanda amano ayasuma uushaba na mano!+
Yangu ifyo walenga amano yene yene yaishibikwa!
4 Nani ulefwaya ukweba aya mashiwi,Kabili nani walengele ulande ifya musango yu?*
5 Abafwa tabakwata amaka kabili balatutuma;Baba mwi samba lya menshi ne fyaikalamo.
6 Inshiishi* yaba fye ubwamba kuli Lesa,*+Kabili alamona icifulo apo icitumbi cibolela.*
7 Ayansa umuulu wa ku kapinda ka ku kuso* pa mbilibili,+Tabika isonde pa cintu nangu cimo, alibika apashaba kantu;
8 Afungila amenshi mu makumbi yakwe,+Ica kuti nangu yafina, amakumbi tayalepuka;
9 Alacinga icipuna cakwe ica Bufumu,Alafungulwilapo ikumbi lyakwe.+
10 Alashila* apalekanina ulwelele na bemba;+Alibika umupaka pa kati ka lubuuto ne mfifi.
11 Inceshi sha muulu shilasunkana;Kabili shilatiina nga akalipa.
12 Asunkanya bemba ku maka yakwe,+Kabili ku mano yakwe asantaula shimweshimwe*+ wa muli bemba.
13 Awamisha umuulu ku mupu* wakwe;Ukuboko kwakwe kulasa icisoka ica-afya ukwikata.*
14 Mona! Ifyo nalanda finono sana pa fyo acita;+Ifyo twaumfwa pali ena fyaba fye ngo kutepelesha!
E ico nani uwingeluka ukubulukuta kwakwe ukwa maka?”+
Amafutunoti
^ Mu ciHebere, “Kabili mupu (umupashi) wa kwa nani uwafuma muli iwe?”
^ Nelyo “Sheol,” e kutila inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “ena.”
^ Nelyo “alamona Abaddon.”
^ Mu ciHebere, “Ayansa akapinda ka ku kuso.”
^ Mu ciHebere, “Alashingulusha icishilwa.”
^ Mu ciHebere, “Rahabu.”
^ Nelyo “umwela.”
^ Nelyo “icibutukisha.”
