Yobo 33:1-33
33 “Nomba iwe Yobo, umfwa ifyo nalalanda;Ukutike fyonse ifyo nalakweba.
2 Mona! Mfwile ukwasamuna akanwa kandi;Ululimi lwandi lufwile ukulanda.
3 Ifyo nanda fifuma mu mutima wandi uwalungama,+Kabili imilomo yandi taibepa pa kulanda ifyo naishiba.
4 Umupashi wa kwa Lesa e wampangile,+Kabili umupu wa Wa Maka Yonse e walengele mbe no bumi.+
5 Nga kuti wanjasuka, njasuka;Njeba ifyo ulefwaya ukulanda; ipekanye ukuipokolola.
6 Na ine wine naba fye nga iwe kuli Lesa wa cine;Na ine wine amumbile ne loba.+
7 E ico taufwile ukuntiina,Kabili ifyo nalakweba, tafyafine sana ica kuti fikushonaule.
8 Amatwi yandi nayomfwa ifyo ulandile,Ning’umfwa amashiwi ulandile aya kuti:
9 ‘Nalisanguluka, nshacita ulubembu nangu lumo;+Ndi wa kaele, nshacita icilubo nangu cimo.+
10 Lelo Lesa alafwailisha ifilubo muli ine pa kuti andwishe;Amona ukuti ndi mulwani wakwe.+
11 Alabika amakasa yandi mu makusu;Alamona konse uko ndeya.’+
12 Lelo ifi ulandile te fya cine, e ico ndekwasuka nati:
Lesa alicila sana umuntu umwina kufwa.+
13 Cinshi uilishanishisha pali ena?+
Bushe ni co takwaswike pali fyonse ifyo walandile?+
14 Pantu Lesa nga alanda, alabwekeshapo ukulanda,Lelo takuba uubikako amano,
15 Alandila mu ciloto, mu cimonwa ca bushiku,+Ilyo abantu bapona mu tulo utwine twine.Ninshi nabalaala pa busanshi bwabo.
16 Lyena alandila mu matwi yabo+Alabakonkomesha ilyo alebeba ifya kukonka,*
17 Pa kuti alenge umuntu ecita ifyabipa+Kabili amucingilile ku cilumba.+
18 Lesa alapususha umweo wakwe* pa kuti wiwila mu cilindi,*+Alapususha ubumi bwakwe ku lupanga.*
19 Umuntu balamulungika na ku fyo akalipwa ilyo ali pa busanshi bwakweNa ku fyo amafupa yakwe yatwalilila ukukalipa.
20 Ica kuti alapata* umukateKabili alakaana* ne fya kulya fye ifisuma.+
21 Umubili wakwe wapwa, ica kuti ashala fye amafupa yeka yekaNa mafupa yakwe ayashalemoneka yatampa ukulamoneka.*
22 Umweo wakwe* wapalamina ku cilindi;*Ubumi bwakwe bwapalamina ku bepaya abantu.
23 Nga nakwata inkombe,*Umo pa bali 1,000, aba kumulandilako,Uwa kweba umuntu icalungama,
24 Lyena Lesa kuti amumfwila uluse kabili kuti atila,‘Mwileka atentemukile mu cilindi!+
Ninsanga icilubula!+
25 Lekeni umubili wakwe utelele* ukucila no wa mwaice;+Lekeni akwate amaka nga yo akwete ilyo ali umulumendo.’+
26 Akapaapaata Lesa+ uukamubelela uluse,Kabili akasekelela ilyo akamona icinso cakwe,Kabili Lesa akatendeka na kabili ukumona umuntu umwina kufwa ukuti mulungami.
27 Uyu muntu akeba* abantu ati,‘Nimembuka+ kabili nshicitile icalungama,Lelo tabankandile.*
28 Nalubula umweo wandi* pa kuti wiya mu cilindi,*+Kabili ubumi bwandi bukamona ulubuuto.’
29 Ukwabula no kutwishika, Lesa alacitila umuntu fyonse ifiKabili alabwekeshanapo,
30 Pa kuti amufumye* ku cilindi,*Pa kuti aipakishe ulubuuto lwa bumi.+
31 Umfwa Yobo! Kutika ifyo nalalanda!
Ikala tondolo, na ine nalakonkanyapo ukulanda.
32 Nga naukwata ifya kulanda, njeba.
Landa pantu ndefwaya ukukulanga ukuti walilungama.
33 Nga taukwete ifya kulanda, ulekutika ifyo nalakweba;Ikala tondolo, kabili nalakusambilisha amano.”
Amafutunoti
^ Mu ciHebere, “alafwatika pa fya kukonka.”
^ Nelyo “ubumi bwakwe.”
^ Nelyo “inshiishi.”
^ Nelyo “ku canso.”
^ Nelyo “umweo wakwe ulakaana.”
^ Mu ciHebere, “ubumi bwakwe bulapata.”
^ Nelyo “yashala fye pa mbilibili.”
^ Nelyo “ubumi bwakwe.”
^ Nelyo “inshiishi.”
^ Nelyo “malaika.”
^ Nelyo “uwamishe.”
^ Mu ciHebere, “akembila.”
^ Nelyo kuti yapilibula no kuti, “Kabili nshinonkelemo.”
^ Nelyo “ubumi bwandi.”
^ Nelyo “inshiishi.”
^ Nelyo “afumye umweo wakwe.”
^ Nelyo “inshiishi.”
